JOIBE AI 25 DI FEVRÂR 2016

“Preseât Sorestant, juste almancul cun chestis dôs riis, no dibant par furlan, consegnadis li dal Protocol dal Comun, chês fradaiis culì a tratin di fâ un fregul di memorie di un citadin udinês meritori nassût come vuê cent e cincuante agns indaûr vâl a dî Achil Telin (Achille Tellini, 1866 – 1938): ‘sienziât, campion di Furlanetât, profet dal resuriment del Friûl e de Patrie Ladine’ al è scrit difûr de sô cjase in Spelevilan ven a stâi Vie Canciani in borc di Marcjât Gnûf. Po ben ca si ricuardilu in particolâr che al è stât un dai prins e dai miôr che si vedin spindût, di une bande, par tirâ sù une cussience di lenghe e di nazion distintis de Furlanie e de Ladine in gjenar e, di chê altre, par meti dongje gjernaziis e popui de Europe e dal mont midiant dal lengaç neutrâl dal Esperanto. Locâl e globâl, in sumis: un spieli – mutatis mutandis – ancje pal dì di vuê! Che Diu lu vedi in glorie e Udin in memorie!”. Cun dôs riis par furlan metudis jù dal lôr dean prof. Alberto Travain e destinadis al Sindic di Udin, prof. Furio Honsell, joibe ai 25 di Fevrâr 2016, il moviment civic culturâl alpin-adriatic dal Fogolâr Civic e il circul universitari furlan de Academie dal Friûl a àn ricuardât, a 150 agns de nassite, chê impuartante figure di studiôs udinês che al è stât juste Achil Telin, par un cont grant stombli de particolâr identitât linguistiche-nazionâl ladine-furlane e, par un altri, invezit, esperantist e cosmopolite convint, prudêl di armonie tra personis e popui.