MARTARS AI 13 DI ZENÂR 2015

Il Moviment Civic Culturâl Alpin-Adriatic dal Fogolâr Civic, fradaie che e promôf un sens storic di popul, direzude dal prof. Alberto Travain e ative in Friûl za di un cuart di secul, ai 13 di Zenâr 2015 al à mandât fûr une note cun chê di pandi la sperance che Pape Checo, prest in visite tes Filipins, al vedi ben di ricuardâ che in chês isulis, daûr di studis e memoriis dal lûc, al pararès che la prime Sante Messe le vedi dite tal 1324 a Bolinao un frari furlan scjampât di une burascje cu la çurme di marinârs arabics dal so barcjon che a levin in Cine. Al veve non “Frater Odoricus de Foro Iulii” ven a stâi Fra Durì dal Friûl o di Pordenon, missionari che tes Filipinis al varès batiade ancje propit la piçule e lezendarie principesse Urduja, deventade po campion di popul dal puest, e al veve vût sapulture a Udin intune arcje di marmul bielone che lu rafigure che al ten dôs bandieris par simbul di Orient e Ocident. Ve mo un contribût, un riclam culturâl, un mes antigon e atuâl dut intun, di podê interpretâlu in diviersis manieris ancje sigûr sul plan secolâr, che al ven dal piçul Friûl, cjantonut di Italie e stât simpri cûr internazionâl dal Continent Vieri.