DOMENIE AI 12 DI LUI 2015

“Fats 48 agns di plevan a Udin a Sant Piu X cumò mi àn butât in bande, ma, ce maniere che al dîs il Pape, no mi ten di un scart: o vuei murî vîf, no vivi di muart!”. Cun chestis peraulis, intun mastinis e comutivis, finidis cul sproc “Diu benedissi Palme!” si è sierade, domenie ai 12 di Lui 2015, tal domo de innomenade citât-fuartece furlane, la predicje dal benemerit pre Tarcisio Bordignon, tornât te localitât sô native par inviâ lis celebrazions dal so 60. di sacerdozi. Glesie straplene pe solenitât dal Redentôr, rigjitât di chê antighe Republiche di Vignesie che uficialmentri e veve destinade Palme par vuardie dai siei confins nordorientâi cuintri dal incombent pericul dal Turc. Presints sorestants, predis, citadins, rapresentancis di culture e societât: fra chei il dean dal Moviment Civic Culturâl Alpin-Adriatic dal Fogolâr Civic e compagn dal Circul Universitari Furlan de Academie dal Friûl, prof. Alberto Travain, che al à presentade la opare memoriâl in fâsi di pre Bordignon intitulade “’Va’ e fa’!’. Ricordi in bozza di un sacerdote tra Alpi e Adriatico nel 60° della sua ordinazione”, testemoneance di autobiografie promovude e metude adun di chel istès prof. Travain cun chê di stramandâ la interpretazion autentiche di une esperience pastorâl, sociâl, culturâl e umane sigûr meritevul di rimembrance. Nassût a Palme tal 1930 di famee venite di origjin e formât cul eroic e sevêr prevost dal puest bons. Giuseppe Merlino, dal 1955 pre Tarcisio Bordignon, di Tisane a Rabil, di Tarcint a Sant Piu X di Baldassarie a Udin, si à distint simpri, cence polse, promotôr di comunitât: predi dai ultins, dai sempliçs, des perifariis, che al à fat di dut par imbraçâ e riscatâ. Riferiment de sô mission, oltri chel divin si capìs, pre Tarcisio lu à simpri cjatât tal spieli di chel pre Adelindo Fachin, motôr ferbint de societât des parochiis, so predecessôr te frazion di Udin za menzonade li che al à funzionât par scuasit 50 agns. Al jere stât, cun di fat, pre Fachin, che, in pont di muart, lu veve incitât a lâ dret par chê strade juste apont disintji “Va’ e fa’!” (va e fâs).