DOMENIE AI 13 DI SETEMBAR 2015

“Gjeniâl! Lui nus proferìs un fondament storic preziôs pe manifestazion Friuli Doc!” i à dit il sindic prof. Furio Honsell al dean di Fogolâr Civic e Academie dal Friûl, prof. Alberto Travain, promotôr za dal 2001 des celebrazions di popul che ogni an si fasin pal “complean” de citât di Udin, che chel, domenie ai 13 di Setembar 2015, tal plait di auguri pal inovâl dai 792 agns citadins, i à augurât ae capitâl furlane dai sorestants comunâi simpri plui cuntun sens de storie de comunitât che a guviernin: cuntun sens al pont se mai si pues di ricognossi dabon tes fiestis dal aniversari di fondazion de citat-marcjât udinese po no mighe un dai tancj avigniments che si incrosin cu chê kermesse di mangjâ e bevi, culture e buteghe de Furlanie, ma il fat centrâl invezit, che al cûs dut cul non des tradizions citadinis plui gloriosis. “Mancul maluserie e plui union, colaborazion al puest di chê invidie che impen de indivie, cemût che si dîs, e sverdee vivarose tai orts dal Friûl!” i à augurât, inalore, ae sô citât il prof. Travain li che il Sindic al à preseât il valôr de idee di citadinât puartade indevant des dôs fradaiis direzudis di chel docent li e ben incjarnade di figuris storichis tant che chês di tancj patriarcjis aquileiês “forescj”, che rivâts in Friûl a àn cjatade une patrie li che a àn savût spindisi pal so ben. La edizion 15. des celebrazions popolârs dal bas dal aniversari di pastanament in citât de “Capitâl dal Friûl”, promovude ai 13 di Setembar 1223 borc di marcjât citadin dal patriarcje aquileiês di riunde bavarese Bertolt di Andechs e deventade, in graciis soredut di un so sucessôr, il guascon Beltram di Saint Geniès, capitâl politiche e religjose dal Patriarcjât di Aquilee di une volte, prime Mittel-Europe unide, e spieli preseât di democrazie comunâl furlane, e à vût sigûr bon sucès, prin di dut par merit dal rignuvît e gjenerôs impegn dal Moviment Civic Culturâl Alpin-Adriatic dal Fogolâr Civic, prin promotôr de iniziative cui siei coordenaments teritoriâi di Friûl e Litorâl e dai “cuintîrs” urbans di Marcjât Vieri, Marcjât Gnûf, Olee, Glemone e Graçan oltri che cul supuart dal Circul Universitari Furlan de Academie dal Friûl, il favôr dal Sindic e de Sorestanzie municipâl, po dal Club Unesco di Udin dutune cu la Federazion provinciâl dal Istitût nazionâl talian dal Galon Turchin, la confraternite locâl dal Crist, il Coordenament Citadin dal Borc de Stazion di Udin. Rignuvide ancje la colaborazion de Parochie di Sante Marie Nunziade dal Domo, de Retorie di Sant Jacum e dal Comant dai Pompîrs. Chê iniziative, vierte al concors de plui variade societât civîl e culturâl dal teritori, e à vût, par altri, la partecipazion de Accademia Città di Udine, dal Gruppo Arte Mistero Natura, de Associazion Scampanotadôrs Furlans “Gino Ermacora”, de Pro Loco di Citât dal Borc dal Soreli, de Associazion “Udine Futuro e Presente”. Espressions di preseament particolârs ae manifestazion i son rivadis dal propresident de Regjon Autonome Friûl Vignesie Julie, dot. Sergio Bolzonello, e dal assessôr regjonâl arch. Mariagrazia Santoro, oltri che dai assessôrs comunâi dot.e Raffaella Basana e dot. Enrico Pizza. Lis cerimoniis, che la lôr scansion le à ben ilustrade il liceâl udinês Carlo Alberto Moretti, si son viertis di matine a buinore in Place Sant Jacum, cun roture simboliche dai sigjîi dai bossui di consultazion artistics, ispirâts di toratis e tors di Udin des circoscrizions urbanis primarolis, opare liberâl dal mestri prof. Michele Ugo Galliussi, destinâts ae racuelte dal sintiment di popul in cont di vizis e virtûts sociâi in diviers ambients publics de citât, dai borcs e des frazions, par fin dal “Censiment di Popul sui Mâi di Cumò par une Costituzion furlane dai valôrs locâi e universâi”, promovût dal Fogolâr Civic tra scuele e teritori jù pai ultins cinc agns, cun chê di rivâ a une “charta” morâl de societât tal Friûl di cumò: un at di significât, fat dal Prin Citadin, par onôr di un volontariât civic a pro de comunitât e di un so rignuviment identitari. Saludadis lis rapresentancis de culture e des associazions dadis dongje, il Sindic al à passât in rassegne lis delegazions di circoscrizion dai “cuintîrs” dal Fogolâr Civic, compagnât dal dean de fradaie, prof. Travain, e dal vessilîr sociâl sâr Gianfranco Passone. Il Sorestant dal Comun di Udin al à viert partant di persone il bossul di Marcjât Vieri, menaat dongje de siore Eralda Domini Savorgnan e dal dot. Carlo Alberto Lenoci, fat su ispirazion de torate di Puarte Manin; chel istès al à fat cul boçul turizât dal cuintîr di Olee, rivoc dal tor dal Domo, presentât la siore Marisa Celotti e la dot.e Maria Luisa Ranzato; e compagn po cul bossul di Marcjât Gnûf, puartât dal tenôr Gianfranco Savorgnan e de siore Elvia Tosolini, riferît al tor di Sant Pieri Martar; po daspò, stesse operazion con cul casselot di consult dal cuintîr di Glemone, pastanât sul trat dal tor di Sant Cristoful, proferît alì dai siôrs Pietro Maria Crestan e Francesco Nicolettis, e in finâl compagn cun chê di Graçan, sul stamp dal cjampanili di Sant Francesc, in mans dai siôrs Giuseppe Capoluongo e Jole Deana. “No une sdrume indistinte, ma nons e cognons di citadins che, sot di Lui, Professôr, tant che dean, juste ben si dedichin a travuardâ la culture civiche” al à mutivât favorevul Honsell viers de guide di chel ferbint cenacul di popul. Un altri bossul di consultarie, destinât al Consei comunâl, po, par cont dal Fogolâr Civic, al è stât consegnât des citadinis Luisa Faraci e Luigina Pinzano al conseîr dal Comun av. Paolo Perozzo, ufiert di sô di puartâ la iniziative ancje cja dai siei coleghis de Loze dal Lionel. Se Udin lu à vût pastanât di citât juste il patriarcje todesc Bertolt, al è stât il patriarcje francês Beltram a fânt la capitâl dal Friûl e un lampion di democrazie comunâl. Par chel, tal 2001, su domandament di popul mot prin di dut di Fogolâr Civic e Academie dal Friûl e rapresentât benon in Consei comunâl de dot.e Marisanta di Prampero de Carvalho, chel patriarcje alì, l’unic tal mont, al è stât proclamât patron secolâr dal Municipi. Di li, pal complean de citât, ve mo, duncje, tes mans dal Sindic, compagnât di pichet di onôr des Vuardiis di Udin cun tant di Confenon dal Comun, la consegne di une icone artistiche, gjenerose vore dal pitôr Galliussi za menzonât e de ricamadore Antonietta Monzo Menossi, che e figure Beltram di princip, tal at di rezi un garoful, simbul dal so martueri e cumiât dal so popul, in particolâr de zoventût che par secui e à onorade la sô memorie tant che fie devote di “pari de patrie” di une tâl fate. Ve mo parcè che, cul compagnatori di autôrs e santule vâl a dî la dot.e de Carvalho, nomenade di pôc Uficiâl de Republiche, chê icone alì, regâl splendit dal Fogolâr Civic pe comunitât citadine, al Sindic jal àn consegnât, par perpetue esposizion al popul, juste ben doi mûi, students de citât, Marco Ciccarello e Riccardo Cutrino, stâts arlêfs valents dal prof. Travain, ven a stâi une rapresentance scolastiche sielte par simbul de continuazion di un ideâl profitevul rapuart tra ce che al sarà e ce che al è stât chenti. In chel il Prin Citadin al à vût di man dal dean dal Club Unesco di Udin, prof.e Renata Capria D’Aronco, une letare di invît uficiâl pal Renc di popul rimodernât, assemblee di partecipazion dal Citadin pastanade dal patriarcje Beltram e tornade prest a dâ dongje par prove cinc secui agns daspò dal Fogolâr Civic te zornade tradizionâl sô di Sant Michêl (29 di Setembar). Fate compagn di ogni an memoreance di virtuôs citadin trapassât, chest an dedicade ae civiste locâl puare siore Francesca De Marco (“fondadore dal Coordenament citadin dal Borc de Stazion di Udin che par dîs agns al à puartât la vôs di un Udin in cercje di ecuilibris tra un vierzisi salvadi al mont e borghesanarie de Europe di une volte”), cu la profierte al sindic Honsell, de bande de citadine Mirella Valzacchi, une amie de muarte, di un garoful in so ricuart si capìs par cont di Fogolâr Civic, Academie dal Friûl e de societât civîl di chê bande, a son stâts, chest an ancje cun riclams a chê disgraciade di vuere tra Austrie e Italie che e à insanganât cent agns indaûr la piçule patrie furlane, i onôrs culturâi a Udin tant che “Aquilee Gnove” e “Atenis dal Friûl”, chei li de “piche” o colone di place dal Cuatricent chê di Marcjât Gnûf – cun deposizion tradizionâl, par man dai Pompîrs e sul cjant dal imni “Oh ce biel cjiscjel a Udin”, di dediche di popul formade di cinc garofui, benedîts di bons. Francesco Frezza, retôr di Sant Jacum, e memorie des primis circoscrizions urbanis oltri che de interie storie citadine, unîts a un macut di “stelutis alpinis” par malinconiche memoreance de “Vuere dal ’15” –, chescj li di chel poç di Sant Jacum di chê epoche istesse tornât a batiâ di “Ferâl di Diogjin” dal grant storic de art Giovanni Battista Cavalcaselle, pes sôs someancis cuntun monument atenian cun chel non, alì che, menade partant dal Dean e dal Vessilîr di Fogolâr Civic e Academie dal Friûl, une delegazion dal mont academic, culturâl e di associazion dal teritori e oltran e à poiât jù un simbul di rosis par presint viers di chel grant sium di civiltât, che riferintsi al Atenis antîc, scune di culture e di democrazie, il piçul Udin al à volût tai secui inzornâlu in tiere furlane. A guidâ la rapresentance dal mont universitari al è stât l’academic di innomine mondiâl prof. Pietro Enrico di Prampero, li che a deponi la dediche civiche e je stade indicade dal promotôr prof. Travain la deane sô consimilâr de Accademia Città di Udine, siore Francesca Rodighiero. In chel la clape culturâl a pene implantade sù cul non di “Arte Mistero Natura”, sot presidence dal critic Alfredo Barbagallo, i à dedicade onorance specifiche ae figure dal grant filosofari atenian Platon, che a Siracuse, in Sicilie vuê Italie, al veve cirût di concretâ la sô “republiche” ideâl. A son intervignûts po cun lôr resonadis il conseîr comunâl di Udin av. Perozzo, che si à fermât tant su la figure dal Patron Civîl Beltram, om di leç e amant de legalitât oltri che folpeadôr de necuizie, fondadôr di un Renc che te sô istesse lidrîs gjermaniche de peraule “ring”, vâl a dî rincje, si insede un principi basilâr di avualiance e di democrazie, e il tolminot prof. David Bizjak, academic sloven referent dal Fogolâr Civic, che al à pandût un salût fraternâl in lenghe furlane par cont ideâl dal so popul. Subit daûr, la anuâl profierte des dedichis ai Udinês benemerits vignadiçs “forescj” ven a stâi a chei che, vignûts di fûr, ognidun a so mût, a dan une man a miorâ la citât cu lis lôr virtûts, iniziative, chê, che e rimonte al 2010, che l’intent al jere chel di ingloriâ il principi storic cetant atuâl di fradaie civiche parsore di ogni riunde dai citadins. Si riferivisi al at significatîf de consegne, fate dal Comun, des bandieris di combatiment de difese urbane ancje aes confraternitis dai forescj. Ve che alore une semplice targhe cun parsore figuradis chês insegnis udinesis istessis, blancjis e neris cul profîl ros, la place locâl je à ben destinade ae cividine Amelia Cudicio (“int di cumierç esperte e afetuose mari di art”), ae ciociare Silvia De Gasperis (“camarele cetant stimade pal puartament e la umanitât”), al cjargnel Luciano Di Sopra (“architet di non vie pal mont e promotôr di culture citadine”), ae venite Patrizia Gobbo (“int di grant ambient e memorabil anfitrione alì de Cjase de Contadinance”) e a Fabio Viola dal Comun di Rivignan (“sutîl e curient muini di Sant Jacum”). Ogni an, la dì de Sense, lis crôs di dutis lis parochiis de Cjargne a tocjin, “a bussin” par simbul, chê de glesie-mari di Zui: un mût par onorâ lis lidrîs! Po ben, te zornade dal Complean de Citât di Udin si à calcolât, duncje, di meti dongje alc di similâr riclamant lis origjinis storichis dai colôrs blanc-e-neri dal puest, si che si à pensât di proponi une “bussade” di privadis bandieris intor di un standart comunâl di bataie di chei di une volte, rifat sù juste tal 1998 par cont di Academie dal Friûl de sartorie citadine Mirella Valzacchi, basantsi su studis dal famôs storic citadin Vincenzo Joppi, standart puartât, su la ocasion, dal dean provinciâl udinês dal Istitût nazionâl talian dal Galon Turchin fra decorâts al valôr militâr, gjeom. Sergio Bertìni, compagnât de autore e de presidente dal Club Unesco locâl, prof.e D’Aronco. I prins a rispuindi, tra i citadins, cu lis lôr bandieris, al invît a une tâl cerimonie a son stâts il zovin student udinês Riccardo Cutrino e il dean de Associazion “Udine Futuro e Presente”, Daniele Deotto. Aes bandieris rivadis dongje ur è stade, duncje, conferide la gale-ricuart dal avigniment – a forme di cûr tant che i distintîfs storics dai rivendicui dal marcjât di Udin – imbastide pal Fogolâr Civic di sô cortesie de dot.e Maria Luisa Ranzato. Si à vût in finâl il presentîr ae storiche bandiere-mari citadine di vuere de bande di chês circoscrizionâls dal Fogolâr Civic istès, gjenerose opare dal 2012 de confezioniere de fradaie, la siore Rosalba Meneghini: un tant ancje par memoreâ i 650 agns de bataie di Feagne cuintri di une des tantis invasions dal Friûl. Nunziade di une scampanotade di dediche ufierte de Associazion Scampanotadôrs Furlans “Gino Ermacora” e je stade a Sant Jacum in ultin la Sante Messe pal 792. Complean de Citât, dite di bons. Dario Savoia, che al à riclamât te predicje ae proverbiâl indurance furlane tant in pont spirituâl che temporâl, cun preieris tes lenghis storichis de Capitâl dal Friûl e compagnament di tocs classics cun conclusionâl cul arie verdiane “Cara Patria”, dediche liriche ae Mari Aquilee, proponût imni regjonâl dal Friûl Vignesie Julie e de Europe aquileiese, in mans dal tenôr Gianfranco Savorgnan e dal organist Agostino Giacomini, che chês notis e l’inchin des bandieris a àn sierât in grant chê partecipade fieste popolâr li che a àn a dilunc fat rivoc braurosis framieç de int lis peraulis dal sproc proferît ogni an di bons. Frezza par chê ocasion in Place Sant Jacum: “Cuant che o jevi la matine / o cjali ator il mont e il plan / e une vôs tal cûr mi dîs / sta content tu sês furlan!”.