DOMENIE AI 16 DI MARÇ 2014

A Cividât al è stât di gnûf, compagn di ogni an, il presint di popul in ricuart de liende di Iulius Caesar tant che fondadôr di un Forum Iulii crosere e struc di dute la Europe, tal inovâl di chês culminativis Idis di Març dal 44 p.d.C. alì che il statist al fo sassinat di traditore man nobiliâr. Cemût che al sucêt dal 2001 incà, domenie ai 16 di Març 2014, une delegazion dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl, che a àn par dean il prof. Alberto Travain, e à poiât jù dapît dal locâl monument a Caesar un mac di rosis cui colôrs zâl e turchin furlans e europeans formât di vincjevot garofui tant che i Stâts UE, un tant par ribati in zornade presint su la antighe e multiple centralitât dal Friûl in Europe e su la sô mission di fraternitât jenfri lis nazions sot de bandiere morâl di Aquilee, manierôs riclam par popul, culture e sorestanzie, che par chest “ristret dal Marimont” a vedin dabon di pretindi un avignî adat a la funzion che Gjeografie e Storie i àn destinade tal Continent Vieri: un avôt ferbint ve cumò che a son cent agns juscj di chê tremende disgracie che e je stade la Prime Vuere che ancje di chês bandis e à slambrât teritoris, int e cussiencis. Compliments pardabon sincîrs ur ai à pandûts a lis dôs fradaiis il sindic di Cividât, Stefano Balloch, che al à batiât l’avigniment di “iniziative di popul meritorie, che di agns incà e da une man a inricjî cheste nestre citât benamade”. “In chescj agns culì, cun semplicitât – al à motivât il dean Travain -, ancje dispès cjapant dentri scuelis, o vin cirût di tornâ sui trois origjinâi de liende di fondazion furlane riferide a Caesar, cul celebrâ il pari di un Forum Iulii no mighe ridot a avampost latin cuintri dai ‘barbars’ cussì clamâts, ma ben crosere e trassunt di dutis lis nazions e lenghis “citramarinis” ven a stâi europeanis: chestis nestris rosis dapît de statue di Iulius Caesar a trataressin di vêur iniment a la int dal puest e ai turiscj che Cividât e il Friûl no son stâts nome e no àn di sei plui cjamp di bataie, confin di popui in barufe, ma ben pivot, cancar, antîc e gloriôs, di dutis lis gjernaziis dal Continent”. Par cheste deposizion di rosis a son rivât ancje, cu lis fameis, doi zovins students di Udin afezionadons de iniziative, ven a stâi il liceâl Carlo Alberto Moretti e l’arlêf di scuele mezane Marco Ciccarello (che al à puartade ancje une rose a non de “republiche studentescje” che al è storic caporion), in rapresentance ideâl dai scuelârs che dal 2008 si son dade la volte tal ricuardâ il pari che i à dât il non a la regjon umbriçon de Europe: une maniere simboliche un grum par celebrâ il cuart di secul di un Fogolâr Civic che al cjale al avignî fidant tes classis di zoventût.