DOMENIE AI 19 DI LUI 2015

“Il pont nol è nome chel di fâ fieste pai 60 agns di Messe di un predi. I predis no mighe no son ducj compagns, che pre Tarcisio, par un esempli, si à manifestât no par rapresentant di une Glesie vierte al mont e magari sierade al borc. Il mont, cun di fat, al tache cul borc, cul locâl, cun chel teritori su la puarte di cjase. E sei pardabon vierts al teritori nol vûl dî juste metisi in reet sôl o prin di dut cui sorestants che lu guviernin e ancjemò mancul cui potents che alì a sparonsonin ma scoltâ e e cjapâ sù lis istancis, lis istancis dal popul, de int semplice. Pre Tarcisio al parten mancul di altris nome che a chê Glesie che lui i à zurât di ubidî. Al è part, anzit patrimoni, de comunitât civiche, che alore par chel, in rapresentance ideâl di tante societât civîl di Udin, dal Friûl, di dute chê bande jenfri Alps e Adriatic che in fat di culture o vin vude par patrie in ereditât di Aquilee, si capìs che a non dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl e ancje par cont de presidence dal Club Unesco di Udin, o soi culì a dî: ‘Vive pre Tarcisio, om libar!’”. Chest il salût dal dean di Fogolâr Civic e Academie dal Friûl, prof. Alberto Travain, indreçât domenie ai 19 di Lui 2015 al plevan emerit di Sant Piu X a Udin, il benefatôr pre Tarcisio Bordignon, capelan dal “Fogolâr” istès, finide la Messe pai siei 60 agns di predi te parochie li che a ‘nd à fats 50 scuasit de sô mission pastorâl. Pontis di garbure e marum, tal discors dal dean prof. Travain, clamât a fevelâ daûr des felicitazions di parochians, Comun di Udin e localitât zimulade venite di Riese San Pio X, espression di domandis cence rispueste valide e sot vie di un larc dissentiment di popul su lis “manieris” di mandâ in pension chel predi tant famôs e benemerit.