DOMENIE AI 26 DI LUI 2015

Daspò di tante dismentie, domenie ai 26 di Lui 2015 al stât “un civic, internazionâl, afetuôs, magnific, abraç di popul” intor des memoriis di chei “Spartans” ca nostrans, erois montagnûi, contadins e minadôrs, che su lis “Termopilis alpinis” di Cocau, tal 1478, si son fats fruçâ par no daûr strade ai Turcs, al assalt des vals di Carintie e Friûl. Za fa sîscent agns, cun di fat, tal 1415, ancje propit te Europe aquileiese vâl a dî tes regjons mittel-europeanis dal antîc Patriarcjât di Aquilee, a jerin tacadis chês mostris scorsadis di Turcs che a saressin stadis di chês bandis par seculorum juste une tragjedie ma di chês penzis, di muart e ruvine e purpûr di autonome, disperade, gjenerose, resistence di popul. Par ricuardâ un tant, ve mo, alore, che libaris espressions de societât civîl, il Moviment Civic Culturâl Alpin-Adriatic dal Fogolâr Civic, il Circul Universitari Furlan de Academie dal Friûl, atîfs za sul argoment dal 2011, dutune cu la Federazion provinciâl udinese dal Istitût nazionâl talian dal Galon Turchin fra Combatents Decorâts al Valôr Militâr (“Nastro Azzurro”) e il Club UNESCO di Udin, a àn volût clamâ dongje, tal inovâl di chel combatiment, il mont plui svariât dal impegn sociâl e culturâl dal puest e transconfinari, li di chel cjamp istès di bataie, sul incrôs de Europe latine, slave e gjermaniche, in chê gleseute di Sant Nicolau di Cocau – la plui antighe de Val Cjanâl – che sot dal so tor a son i rescj pussibii di tresinte erois, dute int a la buine, muarts in difese di chê diramazion des Alps di Jevât: juste ben tresinte, compagn dai Spartans alì des Termopilis doi mil agns prin! Un incuintrâsi cu la memorie, cu lis lidrîs, duncje, dal sens civic su la crosere dal Continent Vieri. Par chel che si son cjatâts juste in tancj di lôr, curiôs e entusiascj, a la Messe di memoriâl che, cul plevan dal puest, pre Giuseppe Morandini, a jerin ancje il prevost di Cividât, bons. Livio Carlino, e il capelan sociâl dal Fogolâr Civic, pre Tarcisio Bordignon, presint il plevan e vicjari foraniâl di Tarvis, pre Claudio Bevilacqua. Largje e significative e je stade, in sumis, la partecipazion di int, istituzions e clapis: de fradaie dai pulizais (ANPS) ai donadôrs di sanc di Tarvis e Weissenfels (AFDS), cui lôr segnacui sociâi; dai pompîrs volontaris di Cjamparòs (Freiwillige Feuerwehr Saifnitz) ai minadôrs di Rabil (Associazione Minatori Raibl), cu lis lôr divisis elegantis; dal Museu Etnografic di Malburghet e dal Kanaltaler Kulturverein, circul di culture todescje de Val Cjanâl, a la Zveza Slovenskih Organizacij, lee des organizazions slovenis di Carintie. Ancje la Presidence dal Land carintian e la Vicjarie di chê de Regjon dal Friûl Vignesie Julie a àn volût destinâ su la ocasion salûts e compliments. In glesie a jerin po il medaîr provinciâl dal Galon Turchin e la bandiere di onôr dal Cuintîr IV dal Fogolâr Civic. Tra i notabii dal Tarvisian, si à viodût a la Messe il com. Carlo Faleschini li che la storiche dal puest su la art dot.e Francesca Comello e à mandât un salût e il grup dai alpins (ANA) chel di Tarvis si à cjatât impedît a vignî par vie di altris impegns di memorie. Si à proferît, duncje, une rimembrance a mût di preiere, tes lenghis taliane, furlane, todescje e slovene, par cure dal prof. Alberto Travain, il dean di Fogolâr Civic e Academie dal Friûl, sovignût dai siei segretaris linguistics prof.e Anna Buliani e prof. David Bizjak. Po daspò simpri il prof. Travain al à fat li il discors civîl di ocasion indulà che, sul pont culturâl, al à vût marcât, di une bande, il sens european specific di identitât di chel fâ front cjanalot cuintri dal Turc, di chê altre, il so penç significât storic-politic, espression di une sfortunade libare republiche contadine carintiane di chei timps che e à di vee podût ancje ben soflâ domandaments e ribaltons e istituzions dal Citadin dal Friûl de Rinassince. In finâl al è stât il presint a chei muarts in vuere, che une tradizion di popul e dîs che a son juste che a duarmin dentri di une mont insiemit cul lôr caporion, Matie, pronts a saltâ fûr di gnûf par difindi la comunitât dismovûts di un profum fuart di teis flurîts: li che medaîrs, bandieris e insegnis si parecjavin pai onôrs, là de imagjin de Madone cul Frutin a vignivin poiâts une dediche cuntune rame di tei di Udin, ricuart des comunancis storichis di spirt e di intindiments che si à menzonâts, e une stele alpine pontade suntun mac di rosis di lagune cui colôrs dal Citadin di Aquilee, rapresentazion di une union morâl, jenfri Alps e Adriatic, di gjernaziis e di teritoris dâts dongje di fradis tal cûr de Europe de lôr metropul aquileiese antighe. A guidâ la delegazion dal Fogolâr Civic, dongje dal dean prof. Travain, al jere il cancelîr sociâl, siore Jole Deana. A àn proferide publiche peraule, alore, il gjeom. Sergio Bertini, dean provinciâl dal Istitût nazionâl talian dal Galon Turchin (“Cun ricognossince, jo e ducj chei che o sin ca no podìn no decorâ in ideâl chei sempliçs eroics al valôr militâr e civic, cjapant l’impegn di ricuardâju, ancje lôr, dongje di chei che, cun merit compagn, a àn vût chel istès ricognossiment de bande des Istituzions!”), la prof.e Renata Capria D’Aronco, che e à in man il Club Unesco di Udin (“Chê iniziative culì e interprete in ideâl e in concret la teolighe dal Unesco, cul celebrâ, tal ribalton di chê int a la buine, juste un lâ in cercje di libertât e justizie, basament de civiltât nostrane, che al incrose lis storiis dai nestris popui rispuindint ad in plen a chei avôts di svicinament des culturis che chê agjenzie des Nazions Unidis alì si impegne a inviulâlu pal decenâl 2013-2022!”), il storic locâl Raimondo Domenig, rapresentant dal Museu Etnografic di Malburghet e dal Kanaltaler Kulturverein (“Di fats lontans e che no cjapin sul moment la int no si ricuarde scuasit nissun. O rivochìn fintremai di stufâsi, par un esempli, la Prime Vuere. Benon, ma al è ancjemò altri che al vûl ricuardât, tant che chest! Il fat dal riviel contadin tes regjons dal Imperi cuintri des sioriis dominantis al è l’argoment leât a chê storie culì, che e à di testemonis mutis lis crepis di muart di Cocau. Crepis di contadins, che di chês no reste memorie tes cronichis des fameis nobilis!”), il prof. David Bizjak, a non de delegazion slovene dal Fogolâr Civic (“O sin ingropâts tal viodi la prime volte cheste biele gleseute, lûc sacrât de nestre storie, là che e je soterade chê brave int nestre di une volte. Chê bataie storiche vuê memoreade le cognossin pôc, magari cussì no, des nestris bandis mittel-europeanis, che a jerin tancj secui indaûr aquileiesis. O vin nô di dâi une funzion gnove, chê che e merete!“), il dot. Marjan Sturm, dean de Zveza Slovenskih Organizacij de Carintie (“Un incuintri interessant che al pant ce maniere che Slovens, Talians, Austriacs e Furlans a batevin insiemit pe ‘stara pravda’, pe ‘justizie viere’, vâl a dî par indemocratizâ la societât, che e je ancje une sfide dal dì di vuê!”), pre Tarcisio Bordignon, figure de Glesie di Udin benvolude e meritorie, cun finîts cumò 60 agns di predi e gavete fate ancje sù par Tarvis (“Me gjolt che si riscuvierzin memoriis cussì preseosis e mi vergogni di no vee savût nuie di un tant par tancj agns!”). Ducj contents sodisfats. Al è stât juste un “a riviodisi”, un “arrivederci”, un “auf wiedersehen”, un “nasvidenje” al an cu ven, “par mût – al à concludût Travain disint graciis dal bon acet a pre Morandini, plevan dal puest – che dal scûr di une cripte di muarts, dal polvar di archivis vecjons, des pagjinis di cualchi libri di storie locâl o stampât turistic, il ricuart di chei erois alì e di chel fat istoric al puedi ben deventâ ricorence, promemorie tai nestris lunaris, inovâl di sens civic di celebrâlu tai nestris timps!”. Ma cemût ise partide cheste iniziative di memoreazion? Su lis datis dal fat ricuardât no je concuardie. “Ai 26 di Jugn 1478, sui prâts di Cocau dongje Tarvis, sîscent contadins e minadôrs di Bleiberg, bandonâts dai lôr sorestants e ancje dai lôr patriots istès, a spietarin salts une armade turche di vincj mil cavalîrs che e tratave di vignî al assalt de Carintie. A forin drazâts, compagn dai Tresinte des Termopilis, e a jentrarin ben te liende, ma a son sparîts de nestre memorie di comunitât crosere de Europe”: cussì e tacave tal 2011 une letare firmade dal dean dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl, prof. Alberto Travain, destinade ai sindics di Tarvis e di Pradaman, localitâts, la prime, interessade dal fat storic; la seconde, Comun furlan zimulât cu la tiere origjinarie di no pôcs di chei mastins. Chês dôs fradaiis alì in particolâr si riferivin a lis dôs Sorestanziis “par che la memorie e il valôr atuâl di chel sacrifici tal cirî di salvâ une patrie bandonade al so destin a sedin recuperâts di just e tornâts a la comunitât”. Sot dal tor de glesie-fuartece di Sant Nicolau di Cocau, cun di fat, si conservin i rescj di tresinte muarts sul cjamp di chê tragjedie, che e jere stade no dome che i Turcs si jerin po butâts su lis vals de Carintie, dopo vee cirût, ma dibant, di sfondâ sul confin furlan-venit e cjapade une petenade lezendarie sul Plan di Lance par man dai Cjargnei, ma ancje al veve clopât chel esempli ardît di republiche popolâr carintiane direzude di Peter Wunderlich che e podeve pûr a la lontane vee ben ispirât cierts moviments rivoluzionaris furlans de Rinassince, rivâts, daûr dal famôs ribalton de Joibe Grasse, parfin a otignî di meti sù un cuintri-parlament di popul mai stât in Europe: la Contadinance cussì clamade. Câs al à volût che il tribun carintian Wunderlich e chel furlan Antoni Savorgnan a lessin incuintri a la muart, ducj i doi, te valade de Drau, a no tancj agnorum e trops chilometris di distance! Tal mês di Avost dal 2012, dopo vee fat visite di persone a la glesie di Cocau, compagnât de studiose locâl dot.e Francesca Comello, il prof. Travain al veve pesseât a interessâ de facende ancje il president provinciâl di Udin dal Istitût nazionâl talian dal Galon Turchin fra Combatents Decorâts al Valôr Militâr, gjeom. Sergio Bertini, cun chê di svilupâ, a fin di promozion su chel front, comunelis largjis e positivis tal zîr des associazions chês su la culture, chês sul civîl e sul militâr. Par so cont il president Bertini al veve pandût la sô plene concuardie sui intindiments, te prospetive di un ricognossi simpri plui il valôr civîl manifestât tai secui de int semplice che à sacrificât pal ben de comune. Ricuardant chê antighe liende che secont chê il caporion dai sempliçs eroics di Cocau, un ciert Matie, al duarmarès, dutune cui siei, un sium di chei pençs tal grim di une mont, pront simpri a dismovisi cul profum fuart di tei in flôr par tornâ a cjapâ sù lis armis in difese dal so popul, ai 26 di Jugn 2013, sot di un tei maraveôs, ai taulins di un ambient storic dal centri citadin di Udin, Fogolâr Civic e Academie dal Friûl a vevin ricuardât pe prime volte, a la maniere popolâr, te capitâl furlane, l’aniversari di chê bataie. “Tant che a lis Termopilis di Grecie, a Roncesvals sui Pireneus, a Lepant e sot des muris di Viene, a Cocau si son costruidis a cost de vite – al veve dit in chê volte il dean Travain – la storie e la identitât de Europe. A pâr di strani che nome a Udin une clape spontanie di citadins si visi ancjemò dal valôr uman, civîl e lezendari di chel sacrifici. Chest nestri ricuart nol è par tirâ sù une culture dal scontri e de vuere ma ben par rionzi di dirit un sens storic di europeanitât che cence di chel al è dificil che il nestri Continent al puedi cjatâ union profonde”. In chê ocasion ancje il dean dal Club Unesco di Udin, prof.e Renata Capria D’Aronco, e veve pandude une pronte adesion su chei intindiments istès. Ai 28 di Jugn 2014, alì dal santuari di Mont Sante di Lussari, cûr dai popui de Europe, tal centenari di chel atentât di Sarajevo che al veve menât dongje la disgracie de Prime Vuere, Fogolâr Civic e Academie dal Friûl a vevin concuardât su la idee di un impegn diret a ricuardâ sul puest chê storiche resistence di popul, ancje fuarts de preseose colaborazion locâl dade de prof.e Anna Buliani. Ve mo alore che tal 2015 chês dôs fradaiis li, cul Galon Turchin provinciâl e cul Club Unesco di Udin, clamant pûr a larc a condivision e partecipazion sorestants, clapis e citadins de Val Cjanâl e des regjons che juste li a confinin, a àn proponût pai 26 di Lui, une des datis aniversariis segnaladis de discuardade storiografie e ultime domenie dal mês, un spontani, religjôs e secolâr, concors popolâr a Messe di fieste a 11 e mieze di matine a Sant Nicolau di Cocau, dite dal plevan pre Giuseppe Morandini e dal capelan dal Fogolâr Civic, pre Tarcisio Bordignon, cul palês intent di memoreâ chei tresinte coragjôs sapulîts sot dal tor che di cetancj secui a son che a spietin un civic at che ju onori e che ur disi graciis di vê cirût a cost de vite di miorâ e difindi la lôr patrie su la crosere de Europe, lis lôr vals, i lôr fogolârs, simbui di ducj chei che in chês lontanis etis a son stâts batûts e campions dal tignî bot des nestris popolazions cuintri di un simbolic nemì rivât dongje di “un altri mont a puartâmi la fin da la mostrâ puora vita” I fâs dî Pasolini a un contadin furlan tal so tant famôs toc di teatri “I Turcs tal Friùl”. Un tant cun chê di recuperâ une storie e di une cussience comunis peadis ancje cun lontans e pûr significatîfs sacrificis: no par metisi a fâ sù barieris ma par tornâ a tirâ fûr des memoriis des nestris tieris lis lidrîs chês veris une identitât europeane. Une iniziative, duncje, dal dut liberâl e spontanie che, in diviersis formis, dal 2011, lis organizazions promotoris a sumiin di concretâ insiemit cu lis plui variadis e bielis espressions de societât culturâl e civîl di un teritori cerniere splendide tra lis popolazions dal Friûl, de Carintie e dal Cragn, sûrs antighis parmieç de Mari Aquilee. Pe profonditât di significât a meretin sigûr menzon tal specific lis preieris dai fedêi letis intant de celebrazion religjose. Si à tacât cuntune invocazion di preambul in lenghe taliane: “Dio dei nostri popoli affratellati dalla Madre Aquileia, a Te rivolgiamo le nostre preghiere nelle lingue più tradizionali di questo splendido crocevia d’Europa, affinché al nostro dire s’accompagni meglio l’eco di una storia che desideriamo oggi ricordare in sintesi rendendo omaggio ai valorosi popolani che, emulando inconsapevolmente gli eroi delle mitiche Termopili greche, simbolo continentale di disperata e orgogliosa difesa della patria e della comunità, 537 anni or sono, abbandonati dalle Istituzioni e dai propri compatrioti, decisero qui a Coccau di non arretrare di fronte a barbariche orde levantine che dal 1415, sei secoli fa, avevano iniziato a devastare le regioni del nostro glorioso Patriarcato aquileiese e che si sarebbero arrestate soltanto sotto le mura di Vienna davanti alle armate europee coalizzate da Marco d’Aviano” (Diu dai nestris popui dâts dongje di fradis de Mari Aquilee, a Ti nô o indrecìn lis nestris preieris tes lenghis chês plui juste di tradizion di cheste splendide crosere di Europe, par mût che il nestri resonâ si compagni miôr cul rivoc di une storie che o volaressin vuê ricuardâle in struc cul fâur onôr ai valents popolans che, cence savê fasint compagn dai erois des Termopilis greghis, simbul continentâl di difese disperade e braurose de patrie e de comunitât, za fa 537 agns, bandonâts des Istituzions e dai lôr patriots, a deciderin culì a Cocau di no ritirâsi devant di sdrumis levantinis barbarichis che dal 1415, sîs secui indaûr, a vevin tacât a fiscâ lis regjons dal nestri gloriôs Patriarcjât aquileiês e che si saressin fermadis nome che sot des muris di Viene in front des armadis europeanis metudis dongje di Marc di Davian). Subit daûr ve chi la intenzion in lenghe furlane: “Pari gloriôs, passadis a Cocau lis puartis des nestris Alps, difindudis di sempliçs eroics, compagns di chei che a son ca che a polsin sot di cheste glesie, bramôs ladrons rivâts dongje a sdrumis tal 1478 a faserin dibant la prove di slungjâ la çate sul Friûl de bande di tramontan, ma a forin fermâts de indurance cjargnele te bataie lezendarie dal Plan di Lance. Cumò che a son juste sîscent agns des primis tremendis scorsadis dal Turc in chestis nestris tieris, che a faserin tancj muarts e a puartarin dongje tante ruvine usant chel istès la int a fâ cuintri dabon cu la fuarce de disperazion, Signôr, duncje, insegninus a dâsi dongje cuintri dai mâi e dai vêrs pericui che a menacin difûr e didentri cheste civiltât nostrane culì, simpri plui sbarlufide”. Po daspò, la preiere in lenghe todescje: “Herr, vor 537 Jahren rückte ein wilder Eroberer in Kärnten ein, erniedrigte hier in Goggau den heldenhaften Widerstand des Volkes und scheiterte den Wahn einer freien Bauernrepublik, mit Peter Wunderlich als Vorgesetztem, was auch unser naheliegendes Friaul, dessen zuständige Stellen und bürgerliche Ansprüche hätte einbeziehen können. Herr, lass dies klein-grosse Geschichte einfacher Leute, ihre Träume, die missverstandenen Hoffnungen nie erbleichen, lass sie heute noch dem gemeinsamen Wohl unserer Völker nützlich, ja musterhaft sein!” (O Signôr, 537 agns indaûr un crudêl invasôr si butà su la Carintie drazant chi a Cocau la sô eroiche resistence di popul e somierzint chê sô svoladie prove di libare republiche contadine direzude di Peter Wunderlich, ispirazion di plui fortunâts domandaments e moviments civics tal vicinant Friûl. Signôr, fas che cheste piçule grande storie di sempliçs eroics, di sium e sperancis purpûr folpeâts, pardabon no sedi mai dismenteade e che e puedi sei simpri utile al presint, al ben comun dai nestris popui). In finâl, la invocazion in lenghe slovene: “Bog naših prednikov, Alpske Termopile, kot lahko imenujemo Kokovo, so slovenskemu ljudstvu podarile junaškega Leonidasa z imenom Matjaž, ki po legendi dremlje pod goro, a se utegne ob močnem vonju cvetoče lipe vsak čas predramiti ter stopiti v bran svojemu ljudstvu. O, Gospod, stori, da se bo v pravem trenutku v slehernem izmed nas prebudil Matjaž, ki bo deloval v dobro svoje skupnosti in vsakega njenega člana” (Diu dai nestris vons, chestis “Termopilis alpinis” di Cocau a àn regalât a lis popolazions slovenis un eroic Leonide di non Matie che une liende e dîs che al è che al duar tal grim di une mont, pront a dismovisi cul profum fuart di tei in flôr par difindi il so popul. O Signôr, fâs che in ognidun di nô al sei simpri un Matie pront a sveâsi sul moment just pal ben de comune e di cui che le compon). Cetant comovent la preiere o avôt dal Fogolâr Civic ai muarts pe patrie te Europe aquileiese, in chê lenghe furlane erede par dret dal latin popolâr de antighe grande capitâl alpine-adriatiche, preiere dedicade “Agli umili eroi delle nostre Termopili alpine! / Pai sempliçs eroics des Termopilis alpinis nostranis! / An die einfachen Leute, die Verteidiger unserer Alpenthermopylen! / Za preproste junake naših alpskih Termopil!”: “Lum nestre di vite, fâs che tes venis de nestre memorie mai no si sfanti il ricuart di chel sanc nocent e gloriôs spandût jù pai secui in tantis Termopilis su cheste crosere antighe di Europe che e ten par sô mari Aquilee regjine, nobil umôr tornât indaûr a Mediterani e Mâr Neri, grim de sô liende prime, dutune cun aghis che a smontin rampidis dai crets vuardiâts des stelis alpinis”. Simpri par furlan, in ultin, la dedicatorie de rame di tei udinês in memorie di chei muarts in vuere: “Chestis fueis ca a vegnin dai teis implantâts a Udin par ricuardâ lis tradizions di autonomie e di democrazie dai borcs de citât che a son stâts colone de rivoluzion civiche furlane de Rinassince cun Toni Savorgnan, vignude daûr di chê popolâr carintiane guidade di Peter Wunderlich chê scjafoiade dal Turc sui prâts ve culì di Cocau. Ai fradis che a son che a polsin sot di cheste glesie, muarts par vê cirût di salvâ la patrie e la libertât. Che il Signôr ju vedi in glorie!”. Une rame di tei par dâ dongje i popui confinants tal ricuart des bataiis comunis dal Citadin dai timps de Rinassince!

Precedente DOMENICA 26 LUGLIO 2015 Successivo DOMENICA 26 LUGLIO 2015