DOMENIE AI 6 DI LUI 2014

“Chel di mudâ diferencis in divisions su la crosere de Europe, jenfri des Alps e dal Adriatic, salacor al è stât il piês delit che i nazionaliscj vincidôrs de Prime Vuere a vedin imbastît cuintri des nestris tieris e dai nestris popui, sul imprin tirâts dongje dal antîc e gloriôs Patriarcjât di Aquilee. Tornìn, po, a tirâ fûr la Storie che nus met adun!”. Ve culì il test dal plurilengâl, curt “riclam civic dal Friûl pai 100 agns de Prime Vuere Mondiâl”, firmât in public domenie ai 6 di Lui 2014, devant dal Palaç Patriarcjâl di Udin, tal 263. aniversari che al è stât butât jù chel Patriarcjât famôs. Ai 6 di Lui 1751, di fat, chê che par secui e jere stade la plui grande jurisdizion di glesie di dute la Europe, cun centrâl a Udin, in Friûl, e fo sdrumade par resons politichis e spartide tra i Stâts dal timp. E finive cussì une storie di passe mil agns che su la crosere dal Continent e veve dât dongje gjernaziis latinis, gjermanichis, slavis e ongjaris. Po al sarès stât nome che un discjadi di assis cence padin jenfri diferencis dopradis di scuse par creâ division, un discjadiment che al varès cjapât pît par disgracie incrosantsi cun dôs spaventevulis vueris mondiâls, presentant une liste di popui fruçâts e di int dispartade che l’inovâl de “Finis Aquileiae” al è stât proponût di reson par “zornade de memorie civiche euroregjonâl”. Di un tant e ven fûr la particolâr iniziative sociâl di memoreazion e resonament parsore vignude dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl direzûts dal prof. Alberto Travain. Chel riclam alì, che al sarà spedît vie tai mês a vignî là di Istituzions e fradaiis di popul di dute la bande che e jere te Storie sot dal antîc Patriarcjât locâl, jenfri Italie, Austrie, Slovenie, Cravuazie, Ongjarie, Svuizare e Gjermanie di vuê, al è stât metût jù tes cuatri primariis lenghis dal Friûl – talian, furlan, sloven e todesc – oltri che par inglês e indreçât a “sorestants e int de regjon storiche culturâl alpine-adriatiche!” cuntune dediche “ai nestris popui jenfri Donau e Adriatic” rivoc lontan di chê dal fatâl proclame “Ai Miei Popui” che, midiant di chel, tal 1914, Francesc Josef, vieli sovran asburgjic, ur veve juste nunziât ai siei sudits un tacâ vuere che al varès puartât al disfasiment di un imperi sorenazionâl mittel-european, model di perfezionâlu par une unitât continentâl future imbastide su la convivence des diferentis nazionalitâts. Intant de comemorazion, presint l’assessôr su cumierç e turist dal Comun di Udin dot. Alessandro Venanzi, mandât dal sindic prof. Furio Honsell a rapresentâ la Sorestanzie de capitâl storiche dal Friûl e dal famôs Patriarcjât, e je stade ancje ben la consegne al Fogolâr Civic de bandiere di Aquilee benedide di Pape Checo ai 15 di Zenâr 2014 a Rome, in mans dal predi furlan pre Tarcisio Bordignon, co al è stât il regâl dal pali de innomenade ricamadore Antonietta Monzo Menossi. Il zovin dot. Venanzi al à confermât la atenzion e l’agrât dal Comun viers des dôs fradaiis promotoris di tancj invîts a resonâ parsore des lidrîs dal teritori, contribût impuartant soredut – al à dit – pes ultimis gjenerazions. Ferbint il discors tignût in lenghe furlane dal prof. Travain che al à guidât po lis delegazions in visite al Palaç Patriarcjâl, tra lûcs e simbui di chê antighe istituzion di glesie che e fasè di Udin la capitâl ultime de prime Mittel-Europe. Tra lis rapresentancis culturâls convignudis, ancje la sezion dal Fogolâr Civic dal Litorâl sloven menade dal prof. David Bizjak e il Club UNESCO di Udin. Te compagnie a jerin dentri ancje i conseîrs dal Moviment gjeom. Sergio Bertini, prof.e Renata Capria D’Aronco, siore Marisa Celotti e siore Jole Deana e po, dai banderârs, la mestre Manuela Bondio e siore Elvia Tosolini, in plui dal vessilîr gjenerâl sâr Gianfranco Passone, cu la bandiere patriarcjine.