DOMENIE AI 9 DI AVOST 2015

Par 50 agns juscj i amîs sparniçâts vie pal mont si son dade la pueste tal aniversari par ricuardâlu cuntune Messe te gleseute di Musi, framieç des monts parsore di Lusevare, tal Friûl di antighe fevele slave: Augusto Volpe, di Tarcint, memorie tant cjare di om gjenerôs une vore atîf sul sociâl, muart tal 1965 intun incident di montagne, al è, aduncje, il mutîf di un tant. “Une testemoneance vive dal valôr incjarnât de amicizie te nestre societât furlane!” al à mutivât il prof. Alberto Travain, dean dal Moviment Civic Culturâl Alpin-Adriatic dal Fogolâr Civic e ancje ben dal Circul Universitari Furlan de Academie dal Friûl, presint domenie ai 9 Avost 2015 a la cerimonie religjose funzionade dal benemerit pre Tarcisio Bordignon, za fa 50 agns capelan a Tarcint. “Une testemoneance – al è lât dilunc Travain – che tal so condurâ e à il savôr dal epic, de liende des grandis passions umanis che a àn soflade sigûr la plui grande leterature. Un esempli uman, morâl, culturâl, si capìs mertevul di sei fat cognossi, ancje ben tes scuelis, juste par base di civiltât. A àn fat ben chei amîs a no dismenteâsi dal lôr amì e cumò a dedicâi une targhe artistiche li di chê glesie che celebrantlu lui e celebre ancje ben la lôr indurance tal restâi fedêi, afezionâts, confradis, distès che al è lât in chel altri mont! Juste di ingropâ il cûr: nome che grandiôs!”. E po, finide la cerimonie comemorative, nol podeve mancjâ, adat in plen, il cjant “Stelutis Alpinis”, in mans de corâl bravone di Cuie e di Samardencje.