EuroAquileienses 03.04.2022/I (fur)

Note FOGOLÂR CIVIC pe stampe taliane – Udin, 3 Avrîl 2022

LA ME PATRIA A È TA LA ME SÈIT DI AMÒUR”

Tradizionale messaggio ai “furlans” dal presidente di Fogolâr Civic e Academie dal Friûl, prof. Travain, in occasione della “Fieste de Patrie dal Friûl”, nel 945° di fondazione dello Stato friulano bassomedievale.

Furlans! Cheste nestre fieste dai 3 di Avrîl, nazionâl nostrane, complean, si sa, di une dominazion di predis passade republiche dai siorats che no volevin stâ sot di lôr, nus clamarès juste a cetancj pinsîrs e resonaments. E, a mi, prime robe, mi ven di pensâ che, ben diferent di altris piçui popui nestris dongjelaltris, nô no vin rivât a tirâsi sù un Stât moderni dut nestri, che i nestris siorats e ancje il borghesam, chei mo che a podevin vê vôs in cjapitul, a àn preferît butâsi talians e sta cu la Italie pluitost che bessôi tant che il Lussemburc. Che dal Lussemburc – miei de sô cjasade regnant di Boemie – ca a Udin si à i mûrs tapeçâts di stemis ma nancje une ongule come rest!Indipendents o par nestri cont – simpri sot talpe, però, ben si intint – nus voleve ancje chel matucel di Hitler, ma co i furlans, chei pôcs o ben trops, si àn stufât di lui e i àn ancje voltade la sclope cuintri, chel, di regâl, ur à mandât i cosacs! Lis corieris de Storie, ve! Ma, in chest câs, ciertis corieris al è miôr pierdilis, co di cierts tranvîrs nol è di infidâsi. I slovens, invezit, popul contadin mighe diferent dal nestri furlan, a àn vût caporions, siorie e çavatins, che prin i àn tignût di puartâ la lenghe, ancje propit dentri de Austrie-Ongjarie, e po a àn fat un Stât, in barbe ai cocâi vicinants dal Friûl che o saressin noaltris, vuardians su la puarte di un Stât lontan, vicin sôl par spelâ e meti gjambadoriis. Si à sielt cussì. Si à sielt? Invasion talianote di chês potentis e cu la arme in man: prin cuintri dai mucs e po in face dai sclâfs bolsevics! Si à di dî, però, che i sorestants nestris sigûr no àn lusît par fâ ribelion. No si son butâts sigûr no partesans o brigants bandîts sicu tal Meridion. O migrade pal mont, la biade int nostrane, o pûr monturade cul cjapiel di alpin par fâi biele vuardie al confin di Italie, che ogni dì si viôt ce afâr che o vin fat. No vin ni podût ni volût sei di plui. Sôl e reste, inalore, la malincunie tal pensâ a cierts stamps tant che un Toni di Vât, trente agns indaûr, che, ai timps, al sberlave par Onde Furlane “Vive il Friûl libar!”, ripetint un sproc scrit suntune cjase sul stradon di Grau, là che al jere ancje scrit par sonziac “Viva l’Austria!”: la malincunie chê dai massepassûts ma ancje dai disperâts che no viodin salustri. Sbrochìnsi, aduncje, cun chestis bandieris, cun chescj ricuarts, cun chestis istoriis e fantasiis che nus judin almancul une dì intun an a insumiâsi di sei ce che no podìn o che ben sul seri no volìn sei par milante resons, che la prime e je chê che no sin disponibii, la plui part di nô, a sacrificâ sostancis, carieris, salût, timp e impegn par un Friûl diferent di chel che si cjatìn. E disìn la veretât: un Friûl indipendent saressial dabon stât mancul carogne di chê tiranie in abit di republiche democratiche in stât di emergjence che e à prin concedude libertât di sielte su lis vacinis e po ur à gjavade la paie a chei che a àn sielt di no vacinâsi, imbolantju di egoiscj galiots cence gran di sens civic? Indipendent chest nestri Friûl si guviernaressial miôr di cumò? “Indipendent” e je une peraule gruesse: che vuê tal mont nol è indipendent nissun. Ma saressial plui virtuôs un Friûl indipendent? A molâju i furlans saressino miôr ancje viers di lôr stes, de lôr int, de lôr tiere, di chei batûts e di chei che a bramin libertâts e dirits? No mi sa mighe trop! “Biei o bruts ma parons a cjase nestre!” a scrivevin su pai mûrs chei che a speravin, cualchi an indaûr, che Milan al fos mancul tiran di Rome madrigne. Ancje chê e je vere: “Biei o bruts ma parons a cjase nestre!”. Ma la patrie chê vere no isal chel fogolâr dulà che si sintisi a cjase? Saressial bon un Friûl indipendent di sei fogolâr par ducj i furlans o fasaressial fîs e fiastris tant che e à fat la Italie cumò, vergognose, cun vacinâts e no? Vuê, salacor, nome o podìn sei, anzit, prime robe, o vin di bramâ di podê almancul sei une nazion de anime, che nissun Stât nol pues comandâle, ma no di une anime magari pelose. Un gno brâf student, za indevant tai studis, ciert Pauli Cescut, mi à vût iniment chê altre dì un viers bielon di Pasulin nestri: “La me patria a è ta la me sèit di amòur”. E alore, cirìn, te nestre societât, di sei fogolâr e bastion di umanitât. Chel al è il teren che nome su chel a frontin i pîts lis nazions che no clopin.

Vive il Friûl miôr di ce che al è!

prof. Albert Travain di Udin

dean dal Moviment Civic Culturâl Alpin-Adriatic “Fogolâr Civic” e dal Circul Universitari Furlan “Academie dal Friûl” 

Udin, ai 3 di Avrîl 2022 (Fieste de Patrie dal Friûl)

Con questa nota, il presidente del Movimento Civico Culturale Alpino-Adriatico “Fogolâr Civic” e del Circolo Universitario Friulano “Academie dal Friûl”, prof. Alberto Travain, si rivolge “in marilenghe” ai friulani in occasione della loro festa nazionale 2022, commemorativa della fondazione, il 3 aprile 1077, dello Stato patriarcale aquileiese all’interno del quale il Friuli ebbe il ruolo di territorio metropolitano nonché di autodeterminata comunità politica. Rivolgendosi ai suoi “furlans”, il leader fogolarista udinese si sofferma sulla mancata esperienza storica di uno Stato friulano contemporaneo sull’esempio del Lussemburgo, concludendo come oggi comunque sia innanzitutto fondamentale “une nazion de anime” ovvero un contesto socioculturale accogliente, affiatato, inclusivo, solidale, protettivo, “fogolâr e bastion di umanitât”, vera sostanza ed ultimo orizzonte di ogni consorzio civile in cui la “sèit di amòur” di cui scriveva Pasolini, cifra dell’umanissima sua idea di patria, possa trovare effettivamente virtuosa soddisfazione.

Precedente EuroAquileienses 03.04.2022/I (it) Successivo EuroAquileienses 03.04.2022/II (en)