ISAL PAR CHESTE LIBERTÂT CA CHE A SON MUARTS I PARTESANS SETANTE AGNS INDAÛR?
Libertât? O vin doprade la libertât par disfâ lis nestris fameis, in discapit no dome nestri ma prin di dut dai fîs che di lazars ur vin insegnât a metisi propit il cûr in pâs su lis nestris sieltis e i nestris capriçs, ancje cul persuadiju a familiarizâsi cun gnûfs morôs o morosis che o vin tirât dongje e la lôr fiolance, cirint a marzoc di rindiur normâl l’esercizi ordenari dal nestri sacrât dirit di egoiscj legalizât in democrazie, che un tant al passe ben e no mâl l’intent meschinat di comprâ cul viziâlis il perdon e l’afiet des nestris creaturis, che a son conseguencis di chest distrutivis e sparniçadis a larc di malstâ sui afiets e i compuartaments, cun riflès su la societât di une tâl gravece che lis Istituzions in plene onestât no podaran lâ dilunc trop ancjemò a dî pardabon di rivâ a gjestîju. E mighe nol baste. O vin doprade la libertât par disfâ la scuele publiche, ultin riferiment pussibil par dreçâ ben la societât nostrane, scuele insotanade al capriç particolâr dai gjenitôrs passât par legâl usance di un democratic vê vôs in cjapitul diret, dineât invezit in pratiche in politiche e aministrazion, che la robe e je fûr di scuare. O sin libars e pûr fin cumò o vin juste falît, tant che paris e citadins. Un resonament di fâ, ancjemò plui cui, tant che il Moviment Civic Culturâl Alpin-Adriatic “Fogolâr Civic”, piçule vuardie e farie di agnorum di culture civiche partint dal Friûl, crosere storiche tra Europe latine e chê slave e gjermaniche, che ancje ben e à il fin di netâ la place di ciertis cjacaris demagogjichis o di vueide uficialitât. Isal par cheste libertât culì che a àn batût, a son muarts e a àn vinçût juste setante agns indaûr i partesans rivoltâts incuintri dal Nazifassist? Pe libertât di autodisfasiment cul esercizi de libertât? No pescjâ la memorie di chei!
Prof. Alberto Travain
Coordenadôr Gjenerâl
FOGOLÂR CIVIC
Zenâr 2015