JOIBE AI 12 DI FEVRÂR 2015

“Pe figure bislache fate dai students superiôrs di Udin intervistâts de Rai regjonâl su la Zornade dal Ricuart si starès pôc, che al sarès ancje comut, a dâ colpe a carencis dai lôr professôrs se a chei pardabon – a lis lôr capacitâts, facoltâts e volontâts – si podès riferîur vuê ancjemò un podê e un pês concrets su lis decisions tal sisteme scolastic talian. Ore presint in Italie e in Friûl la scuele publiche e je simpri di plui in balie dai gjenitôrs, masse dispès sindacaliscj dai lôr fîs ma a ribàs, pronts a parâju di une severitât – e di une cualitât – professorâl simpri plui rare, salutâr, e purpûr contestade. Une scuele publiche taliane sot ricat di viodudis privatistichis che a contrastin cetant cuntun sens vêr des Istituzions e de democrazie. Une democrazie che se, di une bande, e je un grum ristrete, inibide scuasit, pal Citadin sul front de politiche – che si pensi nome che a chê naine, che no à mai fin, su leçs di votazion di no nancje proponilis, che a stramudin la rapresentance civiche intune sorte di oligarchie votade –, di chê altre bande, invezit, cence slaifs – e si olsarès ben di dî cence cjâf – ur ven concedude, dade fûr a grampis, a aventôrs des scuelis simpri plui turbolents e prepotents, rivâts a pretindi di meti il peteç parfin in cont dal mût di insegnâ, ultime prerogative dal tant strapaçât mistîr dai insegnants. A son i gjenitôrs, magari cussì no ben dispès poiâts dai diretôrs di scuele, chei che, in pratiche, a detin vuê al docent il program che al à di seguî! A son i gjenitôrs chei che tantis voltis, vuê, Istituzions complicis e regulis dubiosis, si fasin di judiçs e mestris in pont dal insegnament, magari sot menace di gjavâ vie i fîs di scuelis in carence di numars e duncje in prospet pussibil di sierâ! I insegnants no da râr a son ridusûts – ma no si pues dîlu? – a privâts precetôrs, sometûts ai capriçs des fameis, no uficiâi publics di un Stât cuadrât che, pardut compagn e purpûr tal rispiet dal particolâr, ‘dall’Alpi a Sicilia’ al pretint, e cence tornâ a contratâju, che si aplichin juste programs coordenâts, espression dabon di democrazie cul meti sù leç. Malandrete chê autonomie scolastiche, che e à parât a flics il telâr de istruzion e mudadis lis singulis scuelis in aziendis in gare par cirî clients simpri plui insurîts e pretenziôs fûr puest! Malandrets chei Decrets Delegâts dai Agns dal ’70, che, in pratiche, a àn sometude la Scuele statâl al mateç plaçarûl dai privâts e no al ben pardavêr comun di un consorzi civîl figurât, tal so democratic complès, juste dome des leçs stabilidis! Se mestris e professôrs a mandin dut su la ostie, a fasin benon. Che po, no si trate di une sconfite specifiche lôr, ma ben de disfate – cussì al somee, magari cussì no – juste propit di un Stât, dal so implant e in particolâr di un popul, di une societât, che di libertât e dirits e à dabon fat abûs fûr misure. Students malpreparâts? Colpe dai inscueladôrs o dai gjenitôrs, ‘parons’ simpri plui de Scuele e campions dai capriçs dai lôr fîs?”. Ve chi la sostance de note mandade fûr de sorestanzie dal Moviment Civic Culturâl Alpin-Adriatic dal Fogolâr Civic daûr di chê grame prove di malpreparazion storiche in pont de tragjedie des foibis dât sot cinepresis de television taliane di Stât di cierts students des scuelis di Udin rivâts dongje pe memoreazion uficiâl. “Tv di Stât che a ogni mût – ve la prionte dal Fogolâr Civic –, di so, nol somee, sul cjamp nazionâl, che e vedi mostrade atenzion cuissà ce in chê zornade, ancje te scjalute dai telegjornâi, al tribul dai esui di Istrie e Dalmazie”.