JOIBE AI 15 DI OTUBAR 2015

Ve une posizion dure dal dean dal Circul Universitari Furlan de Academie dal Friûl e dal Moviment Civic Culturâl Alpin-Adriatic dal Fogolâr Civic, prof. Alberto Travain, in cont di un scabrôs argoment di atualitât: culì il test. “Un student i trai une scarpe a un professôr li dal ‘Malignani’ di Udin (cirî sul Messaggero Veneto dai 15 di Otubar 2015)? La colpe e je di un Stât che, di fat, al pâr che nol sei o, par dîle miôr, che al à sbolognât aes singulis scuelis dutis lis magagnis pastanadis o ben ametudis des sôs bielis leçs che su chês dabon al sarès ce contindi: tantis magagnis cun dutis chês formis che a son ator di disadatament sociâl, di compuartament, di cjâf, che par dret o pûr par ledrôs, zire e volte, si pues riferîlis ancje propit a chês leçs istessis. Une societât che no sa daûr ai fîs une famee stabile, cun dut ce che al ven po daûr e lis conseguencis sociâls dal câs, cemût puedie sei titulade par leç a tamesâ chê Scuele che e je clamade a ridusi i dams che a puedin vignî di tancj privâts disastris al condurâ dal civîl consorzi. Scuele vâl a dî populisim di Stât! Ducj ametûts, ducj promovûts, ducj brâfs, ducj di capîju, di seondâju; e chest soredut par evitâ che i gjenitôrs a gambiin di scuele i lôr pôc o trop ‘piçui princips’, cun conseguencis sul numar di classis, di puescj di vore e ancje propit su lis paiis dai Dirigjents. Un ricat biel e bon! Se un insegnant al proteste, i disin che nol sa insegnâ o ben ‘tignî la classe’, li che al è il Stât, invezit, che lu inibìs cu lis sôs regulis di democrazie juste par mût di dî e dut in plen discapit, che si capìs, de societât di vuê e di doman! Prin pont, alore: parâ fûr i gjenitôrs de scuele! Secont: oblic teritoriâl (tes scuelis dal oblic): i gjenitôrs no àn di marcantâ il lôr capriç cu la menace di trasferî i lôr canais intune altre scuele! Pandi fûr un tant vuelial dî sei cuintri de democrazie o ben denunciânt un abûs orent? Ce ise cheste: asse? Po sì, disdegn, fote, riviel palês! Soredut passion, sens de comunitât. La Scuele e pues sei farie de societât e, anzit, il coretôr, in particolâr tal câs di une societât propit disastrade tant che e je la nestre. Une clamade sul orgoi ae rivolte civîl, di chei pôcs o trops insegnants, ‘presidis’, gjenitôrs, students, che ur tegnin ae lôr sigurece e ae lôr dignitât… Il sens vêr dal Public e il ben, chel vêr, dal Friûl e ancje ben de Italie… Vonde cumbinâ, vonde sei masse bogns, vonde contâ sflocjis: il disordin che di ogni bande e simpri di plui si cjate tal guvier de Scuele publiche taliane (par no dî de ‘vistude’ e ‘suriane’ realtât dal privât), che a disin ce che a vuelin chei che di bessôi si fasin colpevui butant fum tai voi in cont dal argoment, al scuen movi il control e l’impegn di ducj cuancj o di tancj o ben almancul la testemoneance di cui che nol acete, ubidient e cidin, di fâsi compliç di disfatis di une tâl. ‘Buona Scuola’ di ce? Il disastri, però, al è començât cu lis riformis dei agns dal ’70. Renzi al à nome finît il lavôr”.

Precedente GIOVEDÌ 15 OTTOBRE 2015 Successivo SABATO 17 OTTOBRE 2015