JOIBE AI 17 DI AVRÎL 2014

Il president regjonâl venit dot. Luca Zaia ur à scrit un ringraziament a Moviment Civic Culturâl Alpin-Adriatic dal Fogolâr Civic e Circul Universitari Furlan de Academie dal Friûl, fradaiis furlanis euroregjonalistichis direzudis dal prof. Alberto Travain, che setemanis indaûr a Udin a vevin manifestade “solidarietât viers di ciert venetisim legjitim di vuê” tirant fûr par altri la bandiere storiche de Serenissime, “no plui par riverî – si a specificât – un domini ‘forest’, ma par at gjenerôs di rispiet de storie e dal democratic domandament di guviernâsi bessôl di un popul dongjelaltri, ancje chel par antîc leât cu la metropul ‘furlane’ di Aquilee”. Un tant al jere stât “chest an, ai 3 di Avrîl, tal inovâl tradizionâl de Fieste dal Friûl sul 937m aniversari di fondazion dal principât patriarcjâl aquileiês tant gloriôs che par 343 agns al à vût dât dongje in fat di politiche, tal cûr de Europe, Furlans, Julians, Istrians, Venits, Slovens, Carintians: popui che o sin usâts a calcolâju – a scrivevin chês clapis intune note al president Zaia – par… nestri popul”. “Al displâs che un at simbolic di solidarietât culturâl e politiche interregjonâl al puedi sei stât – trop in buine fede no savarès – juste stracapît dentri di cierts circui locâi e localistics e passât par ‘eretic’ e par sotan: un tant al palese viodudis ristretis che no si compagnin cu la prospetive euroregjonalistiche che la tradizion furlane e derive di chê aquileiese” al à dit Travain che, in cont dal scrupulât prossim plebissît dal Friûl, inviulât di un comitât a pueste, al à pandude la sperance che si orientisi su iniziativis che, cence scugnî lâ cuintri de Leç, a vedin dabon di scandaiâ il pinsîr dal popul no par fuarce parsore de indipendence, ma ben su la autodeterminazion, vâl a dî su la juste ricupare di un dirit di sei consultâts come comunitât su lis decisions, che il Stât talian za lu veve ametût tal 1866 pe vecjis provinciis venitis austriachis, comprendude sigûr ancje chê dal Friûl. “La Italie unitarie si à fate sù, cun di fat, ancje propit cui plebissîts, pûr cetant discutibii in fat di manieris. E chei plebissîts a formin te Storie precedent politic e culturâl juste di une autodeterminazion, daurman scancelât di memorie e cussience des popolazions dal Stivâl. E chel precedent al podarès ancje segnâ la strade no tant par fuarce di un gnûf fruçonâsi ma chê di une cree, scompartide, cunvinte e judiziose organizazion dal consorzi civîl talian e european” al à comentât il dean di Fogolâr Civic e Academie dal Friûl.