JOIBE AI 20 DI MARÇ 2014

Une delegazion dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl, menade dal prof. Alberto Travain, e je rivade di Udin ai 20 di Març 2014 te Serenissime là che e je stade ospite de Sorintendence pai bens di architeture e ambient di Vignesie e Lagune, sot dal arch. Renata Codello. La delegazion, compagnade cun cordialitât di sâr Antonio Amoroso, dal personâl di Segretarie, e à podût cussì ancje visitâ chê sale dal Plovi di Palaç Ducâl, sierade par solit al public, li che par secui e je stade ogni an chê cerimonie un grum particolâr dulà che i dôs la dì de Joibe Grasse a sdrumavin jù dodis modei di cjistiei simbul de prepotence dai potents de Furlanie, rituâl antîc riviodût in clâf morâl, civiche e scolastiche, e rionzût in Friûl des dôs fradaiis dal 2000 incà, tirant dentri int, scuelis, sorestants, tal aniversari che si ricuarde il scjassôs riviel di popul de Joibe Grasse o “Crudel Zobia Grassa” locâl dal an 1511, prin grant ribaton sociâl de storie europeane moderne. Chest an culì lis cerimoniis dal cussì clamât “Carnevâl Civic Studentesc”, cun alegoriis di toratis sdrumadis, fatis sù dai scuelârs e intestadis a lis necuiziis dal vivi di vuê, pe prime volte si son davueltis a Cividât e a Udin, la capitâl morâl viere e chê gnove de furlanetât, cuntune biele partecipazion. “O vin sielt, duncje, chel rituâl di Carnevâl li – al ricuarde Travain – par creâ un moment cerimoniâl e di resonament che al formàs un tic, in simbul, une sorte di ‘Cinise’ dal podê o inmò miôr de prepotence, des inicuitâts de vite di cumò tal nestri teritori. Nol è stât par nie un celebrâ la Serenissime tant che spieli di une justizie ben aministrade tra lis popolazions de Tiereferme, cundut che une idee di une tâl une volte e veve un so seguit. Vignesie e à sfrutât il Friûl compagn sigûr di une colonie, ma metint un slaif, tant che dominante, ai vecjos sorestants dal puest, in automatic e fin a un ciert pont e à podût presentâsi di difensore dal popul sotan de regjon. Chê cerimonie li, partide tal 1162 e rivoc dal condurât contrast fra chê antighe republiche marinare e juste la estreme Tiereferme feudâl de Mittel-Europe, e met dongje ancje, in ultin, dôs animis fondamentâls di une culture interregjonâl alpine-adriatiche che si disarès cumò “euroregjonâl”. I rivocs storics di chel rituâl rionzût an par an si sfantin simpri a ogni mût e di just, volte par volte, te atualitât dal moment, te inocente utopie, te goliardiche rivoluzion, tradizionâl stamp antropologjic dal Carnevâl”. Te delegazion movimentâl a Vignesie a jerin il dean prof. Travain e i siôrs Giuseppe Capoluongo, Eralda Domini, Rosalba Meneghini, Gianfranco Savorgnan e Gloria Vello.