JOIBE AI 22 DI MAI 2014

Sfantade, par resons parsore, la zornade di manifestazions sociâls-culturâls batiade “Mai Civic di Udin disore”, che e varès juste vût di incrosâ la perifarie storiche udinese “disore” e i Comuns vicinants dal contor, iniziative che le veve programade par domenie ai 18 di Mai 2014 la Pro Loco di Citât dal Borc dal Soreli, in colaborazion cul Moviment Civic Culturâl Alpin-Adriatic dal Fogolâr Civic e cul Circul Universitari Furlan de Academie dal Friûl che une sô delegazion, menade dal dean prof. Alberto Travain, e varès ricevût, juste par une tape comemorative, i partecipants de cicloturistiche, organizade a pueste simpri de Pro Loco, li de lezendarie “Crôs di Cjasemate”, la crôs campagnole di Buinevile, sît antigon di devozion e cimeli de liende di popul dal Beât Beltram, dilunc de storiche vie Trevisane che cumò e marche il confin tra i Comuns di Martignà e di Pasian di Prât e che une volte e jere il stradon che al colegave Udin e cul Ocident. Su particolâr consei dal so banderâr dal “Cuintîr” sociâl di Glemone, sâr Franco Dorigo, il Fogolâr Civic nol à volût chel istès rinunziâ di lâ in visite in chel lûc “sacrât, pai religjôs; magjic, pai romantics; sugjestîf, pai laics” tant che lu à piturât il prof. Travain, ricuardant l’impegn a favôr, di pionîrs, che al è stât in fin dal secul passât li che la “Academie” cul moviment sociâl-culturâl tirât dongje ator a son stâts indevant. Ve mo, alore, che joibe ai 22 di Mai 2014, une delegazion di Fogolâr Civic e Academie dal Friûl, cul dean Travain e il banderâr Dorigo, e je tornade par chê strade antighe, dutun cui amîs de Pro Loco dal Borc dal Soreli di Udin Disore menâts dal lôr president, arch. Giuseppe Vacchiano, daûr de ferade di une memorie e di une epiche di popul che il so rivoc ancjemò al pues vibrâ tal cûr di cui che al è bon di scoltâ.

Precedente GIOVEDÌ 22 MAGGIO 2014 Successivo VENERDÌ 6 GIUGNO 2014