JOIBE AI 3 DI AVRÎL 2014

“3 di Avrîl 2014, Fieste dal Friûl: il popul furlan al meretarà rispiet dome cuant che le finarà di anulâsi par malintindût rispiet di chei altris!”. Ve la penze note di pocjis peraulis, metude fûr pal inovâl storic-politic regjonâl dai 3 di Avrîl di chei dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl direzûts dal prof. Alberto Travain, fradaiis che a son juste stadis lis primis, tal 1996, a fâ meti fûr in chê ricorence lis bandieris dal Friûl sui palaçs li che a Udin a àn sede Comun e Universitât. “Al è ce pensâ, cun di fat, sul presint e sul avignî de identitât regjonâl furlane – al dîs Travain – e dai siei dirits di citadinât te vite di ogni dì moderne. Trops parfin dai istès grancj sostignidôrs politics e culturâi de lenghe furlane par solit le doprino ancje juste tes Istituzions e te societât? I volarès che un bon gjornalist si cjapàs sù di scrutinâ trops che a son stâts i intervents par furlan, dopo dal ricognossiment de ‘marilenghe’, in Consei regjonâl e in chei provinciâi e comunâi dal Friûl. E chel istès o un altri bon gjornalist al podarès ben ancje imbarcjâsi tal domandâur ai Comuns trops che a son documents par furlan presentâts dai citadins e manezâts dai uficis publics tai ultins scuasit vincj agns. Alì dal Comun di Udin si cjataressin fûr salacor nome o scuasit documents firmâts dal culì presint, in diviersis mansions dal moviment civic che vuê si dîsi Fogolâr Civic. E chest al vûl dî che al è stât predicjât e scrit e spindût, ma cence dâ ancje chel tant l’esempli. E i Furlans, dopo scuasit vincj agns di pupilance linguistiche, a van dilunc a strenzi simpri plui il cjamp dulà doprâ la lôr lenghe storiche par un rispiet malintindût dal prossim, malintindût e no dovût par nuie viers dai vignadiçs che no àn voie di integrâsi (che tantis voltis a son plui Talians di altris regjons che imigrâts forescj) o piês ancjemò viers dai purtrops Furlans origjinaris che no dome a sielzin di no fevelâle la lenghe furlane (vive la libertât!) ma nancje di imparâle par fâ comunele cui patriots che no intindin di smenteâle. Se par rispiet, in Friûl, o vessin di bandonâ la lenghe furlane, chê e murarès cence fal e saressin ducj compliçs di vê copade, di vê scancelade, une culture di mil agns e passe. A mancjin o a clopin i esemplis ‘dal alt’. Nô dal Fogolâr Civic o vin molât di doprâ il furlan in dut e pardut – che o jerin famôs ai timps propit par chel – come at di denunzie e proteste incuintri di une ciertefurlanarie di proforme montade in scagn”.