JOIBE AI 6 DI NOVEMBAR 2014

“Zentîl Professôr, il President de Republiche al à ricevût il regâl simbolic di ricuart dal centenari de Prime Vuere destinât a lui tes fiestis di popul pal inovâl di fondazion urbane de Citât di Udin, che di cortesie Lui jal à mandât vie a non dal moviment civic culturâl dal Fogolâr Civic e dal Circul Universitari Furlan de Academie dal Friûl midiant dal Prefet di Udin. Cul esprimiI il so agrât, il Prin Sorestant al trate di pandiI la stime plui sclete pe dedizion a favôr di un rionzi e un invalorî i principis di pâs e fraternitât e pes iniziativis inviuladis sù cul intent di incressi un sens di comunitât tra lis popolazions di diferent stamp dadis dongje de storiche Citât di Udin. Cun chest spirt, il President Napolitano, proferintJi une medaie memoriâl, par segnâl dal rivuart di chest Palaç, al indrece di cûr un salût a Lui, a ducj chei che a son dentri des sociis che Al rapresente e a chê siore che e à fat il panel artistic…”. Cheste la note dal Quirinâl, che il Prefet di Udin, dot.e Provvidenza Delfina Raimondo, joibe ai 6 di Novembar 2014 je à riferide al president des dôs fradaiis, prof. Alberto Travain, invidât cuntune delegazion a riceviment uficiâl tes salis di rapresentance de cjase prefetizie furlane dutune cui sindics di Aquilee e Udin – al è rivât il sorestant parsore aquileiês Gabriele Spanghero e il prodean udinês Carlo Giacomello -, clamâts a partecipâ a un moment impuartant di ricognossiment istituzionâl de ativitât volontarie di promozion sociâl in zornade di vuê di un sens civic transconfinari, internazionâl, che al partissi di lidrîs di culture e morâl peadis cu la liende storiche consecuente des dôs citâts, la capitâl alpine-adriatiche antighe, troiane e romane, e la sô ereditarole pastanade dai Uns in mieç de Furlanie. L’agrât de Presidence de Republiche al è stât il riscuintri adat pal regâl di un artistic grop di Salomon, simbul antigon di union di diferencis cjolt dai mosaics de basiliche aquileiese e lavorât di mestri cul pont Aquilee de innomenadone ricamadore furlane Antonietta Monzo Menossi, che si à dât a jê, po daspò, in specific, la medaie chê dal President: un regâl, chel ricam, intindût di Fogolâr Civic e Academie dal Friûl tant che une dediche particolâr al Prin Sorestant statâl sot un “complean” citadin di Udin juste compagnât cul centenari di chê Grande Vuere tra nazions e imperis sorenazionâi che, Diu nus vuardi, la citât e je stade capitâl taliane dopo une liende di metropul ultime transconfinarie alpine-adriatiche tal spirituâl daûr dai segnacui dal gloriôs Patriarcjât nassût in rive al Natisse. “In pont di simbui, Aquilee par noaltris no je – sôl che – Italie, ma la nestre maniere di sei Europe. Un tant, il president Napolitano, dut intun sorestant di une nazion e europeist ferbint, sigûr lu à capît e preseât par vie che si trate di un spieli spontani di trop che di une storie particolâr si puedin gjavâ fûr no dome memoriis di divisions e contrascj, ma ancje ben tradizions e ideis di vierziduris e compagn di unions internazionâls che, in complès, la istesse ‘italicitât’ primarole, che il Fogolâr Civic le ten in valôr par stamp antigon di citadinât universâl vualîf, no di confondilu cun cierte ‘talianitât’ nazionalistiche vignude daûr, dabon, par chel cont, e risulte siorone” al à dit il prof. Travain ricuardant la speciâl vocazion di centrâl e di incuintri di continent e di mont dal agri aquileiês antîc e intun cuant de furlanetât, interpretant par “cuintri nature la condizion di frontiere imponude a la regjon de Storie soredut chê resint, condizion contrarie di une liende di identitât di crosere e di cûr, di ‘forum’ di popui e lenghis de Europe, intestât ben o mâl a Iulius Caesar, patron juste di chel imperi intercontinentâl european, african e asiatic li che a van sot lidrîs di tancj valôrs di civiltât di chei che a metin dongje”. “E je la tierce volte che il Quirinâl al à la cortesie di rispuindi al piçul Fogolâr Civic, diferent, par un esempli, de plui part des sorestanziis dai teritoris dal Friûl Vignesie Julie. Al minût cenacul di citadins di cjase a Udin i àn dât riscuintri agns indaûr la Presidence federâl austriache e chê de istesse Comission Europeane, presidents e vescui de Mittel-Europe, dut diferent di cetante ‘siorie’ paisane” al à zontât Travain pandint vive stime sigûr pal rispiet e pe cortesie mostradis dal prefet Raimondo viers de iniziative civiche, “ande zentîl, savie e cul sens di trope bisugne che e je, ancje midiant propit di piçui ats, di tornâ a strenzi i leams di fiducie cumò slentâts tra citadins e Istituzions publichis che in cheste ponte di Nordest italic a rimontin indaûr fintremai a la liende civîl de Austrie-Ongjarie”. “Un rispiet e une volontât – al è lât dilunc Travain – rivâts pursì, câs râr, biade la ore a fâ incuintrâ tor ator di un riclam popolâr a cierts simbui rimodernâts de pensative culturâl aquileiese lis Sorestanziis dai Comuns modernis di Aquilee e Udin, citât mari e fiolance morâl, clamade la ultime, dal Fogolâr Civic, a volê menzonâ chê parintât li ancje ben tal riviodi il statût locâl”. Par testificâ un contracambi di stime, Fogolâr Civic e Academie dal Friûl a àn, inalore, volût regalâi al Prefet il stamp di une rose di magnolâr ricamât de Menossi, rivoc simbolic de storie de plui famose des organizazions civistichis inviuladis di chês dôs fradaiis, vâl a dî il Coordenament Citadin dal Borc de Stazion di Udin, “dal 2003 juste metût di vuardie de cualitât de vite dilunc di une frontiere particolâr tra locâl e globâl che e je chê dal storic cuartîr de Stazion udinese dai trains. Un impegn, chel dal Coordenament, che a son passe dîs agns aromai e che, pûr dispès menaçât di sei doprât e straviât de politiche e de stampe, al à simpri, prin di dut, seguît trois di colaborazion pronte tra popul e Istituzions cul fin di risolvi problemis chei plui momentôs e di interès public, metint in pratiche, cussì, ogni dì, te vite concrete di un borc de capitâl furlane, chei ideâi civics che di un cuart di secul chês dôs fradaiis alì ju propagandin. ConsegnantJi chest simbul – si diseve tal test di chê dediche -, che si metii dongje une piçule ‘cjarte di identitât’ culturâl di chel curiôs cuartîr citadin, ‘cjarte’ imbastide pal inovâl dal so 150m ‘complean’ in memorie de scree de locâl Stazion austrovenite, si tratarès ancje di vêI iniment a la Sô Autoritât juste la deane di chel Coordenament civistic, siore Francesca De Marco, che e je mancjade di pôc e no si dismenteile, figure mertorie che in so ricuart si à dabon fat domande di intestâi la jeche taronde tal mieç dal Plaçâl de Republiche. PresentantJi cun chest il dean gnûf di chê clape li, il primari dot. Fernando Luisi, persone valide e par culture une vore leade a lis sociis in firme, si calcole di inzornâ e di rionzi, cussì, chel avôt di colaborazion civîl che e sta tes sperancis di ogni bon citadin”. Chê delegazion che e à compagnât in Prefeture il prof. Travain, componude dai conseîrs movimentâi gjeom. Sergio Bertini, prof.e Renata Capria D’Aronco, siore Marisa Celotti, siore Jole Deana, siore Antonietta Monzo Menossi e sâr Gianfranco Savorgnan, cun di fat, e agregave ancje ben il dean a pene votât dal coordenament di popul dal Borc de Stazion di Udin, organizazion sociâl ispirade undis agns indaûr di Fogolâr Civic e Academie dal Friûl. Il sorestant di chês dôs fradaiis, che a tirin sù cetancj domandaments dal teritori, i à ancje proferît al Prefet di Udin une letare popolâr destinade a lis autoritâts massimis de Republiche, in cont de cuistion, che a son agnorum che e va indevant, de garanzie statâl mancjade pe continuitât dal insegnament tes scuelis publichis, carence che e intache, si capìs, ancje ben la ufierte formative de rêt scolastiche regjonâl. Il tenôr Gianfranco Savorgnan, conseîr dal Fogolâr Civic pal Friûl udinês, al à volût, po daspò, fâ savê al Rapresentant di guvier de tremende fote dal Moviment cuintri di part no minime de stampe locâl, che devant de sô grivie censure su lis iniziativis sociâls la organizazion cumò e reagjirà instradant e sburtant altris formis di informazion a servizi de int.