JOIBE AI 9 DI LUI 2015

Une letare par inglês sierade di un furlanon “Mari Grecie, graciis!”, voltât par grêc cuntun “Ευχaριstώ µηtέρa Ελλάda!”, e vierte di chel che dal 2013 al è sproc rapresentatîf dal rapuart tra il piçul Moviment Civic Culturâl Alpin-Adriatic dal Fogolâr Civic, di scuasit 30 agns, cun cuartîr a Udin in Furlanie, e la idee istesse di une Europe Unide: “No cuintrieuropeiscj ma europeiscj rivoluzionaris!”. Chest i à scrit a Tsipras chê fradaie civistiche e euroregjonalistiche che le dirêç il prof. Alberto Travain, dutune cul Circul Universitari Furlan de Academie dal Friûl e altris sogjets sociâi colegâts, daûr dal referendum che midiant di chel il popul grêc si à pandût in cont dal puartament di vê tal tratâ cun cierts implants internazionâi europeans e mondiâi. “Vint une Europe Unide dai banchîrs e mancjant une Europe Unide dai popui e dai citadins in stât di dirit di dominâle, si capìs che lis comunitâts si sintin dispossessadis e che la Europe tant che valôr te cussience dai Europeans vuê e sedi in calâ” al à mutivât Travain: “Parcè po fin cumò no si à costruide une Europe politiche? Par impedî che cheste e podès metiur i bastons tra lis ruedis ai potents de economie, ae Europe economiche e finanziarie! ‘Vis unita fortior’, par mût di dî ‘Union e fâs fuarce’: chê e je la scrite che si proferìs ancje sul municipi de nestre piçule capitâl dal Friûl. Che la unitât dai citadins, che la lôr concuardie, a àn simpri fat pôre ai potents dal mont. Il fat di tornâ la paronance al popul ancje in misure di continent al à di coincidi pai citadins, però, tant di plui cuntun coletîf, seri, cjapâsi sù responsabilitât di maneç dal Public ancje propit cul vuardeâ ben atents la condote di chei che ju rapresentin. Ni Grêcs ni Talians ni altris in avignî no varan di podê permetisi di sostentâ, magari cun bêçs ancje di altris popui, sistemis politics, sociâi e economics in faliment, fats di privileçs, imbrois e strassariis di publiche pecugne! Si sta pôc a dâi dutis lis colpis ae Merkel. Se a fossin, par un esempli, dabon tes stessis condizions economichis-finanziariis, la Grecie e la Italie siguraressino nivei di vite sociâl e politiche compagns o miôr di chei de Gjermanie? Ai siei timps za Dante, poete sopran, juste disperât pal puartâsi cence sintiment di cetancj Talians, al clamave l’imperadôr todesc. Par rispiet ancje di une antigone tradizion furlane – e va dilunc la note di presidence di Fogolâr Civic e Academie dal Friûl – no si poin par nuie vuê ciertis ondadis cuintrigjermanichis prevignudis: i Furlans di une volte, chei salts pardabon, par mentalitât a vevin ben plui a ce fâ cui Todescs che cu la int dal Mediterani! Sotans, però, mai! La miôr robe e je chê di imparâ di chei altris il miôr, cemût che a fasevin i Romans antîcs. Cence amôrs di patrie juste fûr di puest o cui voi sfodrâts, anzit ben cun spirt patriotic chel vêr, frontât suntun cjapâ cussience sincîr des propriis carencis e suntune volontât patoche di fâur front cuntune serietât!”. “’Mari Grecie, graciis!’, antighe mari culturâl de Europe, par vênus dât l’esempli cuntun ‘no’ al europeisim dai financîrs, ma, cumò, cu la cure dal bon gjenitôr – che e je simpri plui rare – ancje che e sepi menânus su la strade juste di une alternative che no pues sei di gnûf la division e il contrast dai nestris popui! Vuê la Europe no va sprofondade, ma rifondade!”.