LUNIS AI 10 DI FEVRÂR 2014

Pe Zornade dal Ricuart 2014, il Moviment Civic Culturâl Alpin-Adriatic dal Fogolâr Civic e il Circul Universitari Furlan de Academie dal Friûl, direzûts dal prof. Alberto Travain, a publichin chê note culì, tal intent di fâ resonâ sul valôr in zornade di vuê e su lis lidrîs antighis di ciertis disgraciis che a àn implaiadis lis popolazions di confin de bande alpine-adriatiche. “Ricuardâ ducj gjenocidis concretâts o tentâts in cheste nestre crosere di Europe, segnalant e condanant di brut par ‘nemîs’ lis parts, i regjims e i Stâts responsabii di un tant e compagn par ‘malose’ juste chê istesse comune fonde tibiadore e disseparadore che e à intacât tant il spirt des gjernaziis di chel incrôs di diferencis che une volte si compagnavin in armonie sot des bandieris di Vignesie e Viene, ma prin di dut de Mari Aquilee, incrôs ridusût a frontiere opressive di nazionalisims e intolerancis vignûts di fûr, metûts tal cjâf di podês ‘forescj’ a popolazions usadis a vivi insiemit o ben a no dividisi par fuarce daur de etnie. Anìn a cirî, duncje, lis lidrîs dal mâl insedât tal nestri convivi tra popui diviers di milante agns! E covente une zornade de memorie o ben dal ricuart ‘euroregjonâl’, par visâsi cemût, ce e cui che te Storie al à metudis a mâl lis nestris comunitâts e trop che invezit chês, di iniziative lôr o sburtadis des Istituzions, a àn savût meti dongje parie un vivi civîl tal rispiet concret des diferencis! La date dai 6 di Lui, dì de abolizion, par resons politichis vergognosis, tal 1751, dal antîc Patriarcjât internazionâl di Aquilee, stamp di prime Mittel-Europe unide, che in fat spirituâl e culturâl par mil agns zire e volte e veve dât dongje di fradis ladins, sclâfs, mucs e ongjars, jenfri Donau e Adriatic, jenfri Lombardie e Ongjarie, e podarès lâ ben come simbul plui di tancj altris par chê funzion. Chel soldât cun in man la spade, piturât in chê volte dal Tiepolo tal Judizi di Salomon dentri dal Palaç Patriarcjâl di Udin, che al è daûr a taiâ in doi il frut contindût de liende, al pararès juste un riferiment tetri al grivi destin che ur sarès tocjât tal avignî ai popui di un cûr de Europe che al à di tornâ a cjapâ il troi de sô mission esemplâr in favôr de pâs.”