LUNIS AI 15 DI SETEMBAR 2014

Cortês bon acet ai 15 di Setembar 2014 alì dal Palaç dal Guvier di Udin, sot de ricorence dal 791. complean de citât, par une delegazion dal Moviment Civic Culturâl Alpin-Adriatic dal Fogolâr Civic, menade dal so dean, prof. Alberto Travain, compagnât dai conseîrs sociâi gjeom. Sergio Bertini, prof.e Renata Capria D’Aronco, siore Marisa Celotti, siore Jole Deana e tenôr Gianfranco Savorgnan, che e à podût consegnâi al Prefet de capitâl furlane, dot.e Provvidenza Delfina Raimondo, une dediche particolâr pal President de Republiche sul centenari de Prime Vuere, vâl a dî un piçul panel artistic, fat de famose ricamadore udinese Antonietta Monzo Menossi, ancje jê in delegazion, cu la inficje di un grop salomonic, sorte di arc di Sant Marc ingropât, simbul antîc trassendent di aleance vâl a dî di unitât te varietât, gjavât dai mosaics de Basiliche di Aquilee: un tant cun chê di palesâ l’avôt popolâr di pâs e concuardie internazionâls di un Udin che prin di sei capitâl taliane di une Grande Vuere europeane “tra fradis” al jere te Storie metropul minude di chê Europe unide in ristret pastanade dal Patriarcjât aquileiês antîc. “Pal President chest regâl culì al sarà sigûr un pont di emozion” al à dit il Prefet, ancje ricuardant lis maraveis di amirazion dal Sorestant Parsore cuant che al è stât di resint in visite al patrimoni culturâl di Aquilee e pandint l’agrât e la stime presidenziâi par iniziativis civichis dal bas di chê fate li, cun laut particolâr pe vore de Menossi, che cu la art dal ricam e cul “pont Aquilee” che lu à inventât jê, e rimande, dutune cul Fogolâr Civic, a principis grancj inlidrisâts te storie di une tiere che e je une crosere de Europe.