LUNIS AI 21 DI DICEMBAR 2015

Se l’imperi di Carli il Grant al è stât il prin butul di une Europe unide, Berengari di Cividât al è stât il so imperadôr ultin, coronât a Rome tal mês di Dicembar dal 915. Un aniversari che no ur è scjampât a chei dal Moviment Civic Culturâl Alpin-Adriatic dal Fogolâr Civic e a chei dal Circul Universitari Furlan de Academie dal Friûl, che a son un trente agns che a son impegnâts a promovi a gratis culture civiche inlidrisade dentri te storie dal teritori, che, dopo vêur scrit ai 216 Comuns che a son tal Friûl Vignesie Julie che a contribuissin juste ognidun cuntune so note di memoriâl al ricuart sociâl programât li dal municipi di Cividât pai 1100 agns de incoronazion dal patriot regjonâl deventât “imperadôr ultin de prime Europe”, a àn celebrade la ricorence, lunis ai 21 di Dicembar 2015, ospits dal Comun de citât native di chel ultin Caesar carolin che al è stât ancje l’unic furlan mai rivât ae cjadree politiche europeane plui alte. A ricevi lis delegazions e jere l’assessore comunâl su la culture di Cividât, Angela Zappulla, che “tant che sorestante e tant che citadine” e à volût pandi espressions sinceris di preseament pe lungje vore di Fogolâr Civic e Academie dal Friûl ancje propit te Citât Ducâl, in particolâr in cont de ricupare e dal inzornament de liende storiche di fondazion dal Forum Iulii di Caesar. Il dean des dôs clapis culturâls, prof. Alberto Travain, al à piturade, cussì, la vicende dal imperadôr furlan coronât undis secui prin par finîle copât di un complot di notabii venits: “Marchês dal Friûl, tal 888 prin re di Italie indipendent e tal 915 imperadôr ultin carolin de Europe mezane e bande bonât, Berengari, cividin di cjase reâl francje, si jere cjatât a frontâ un sglavin di vueris civîls e invasions ‘barbarichis’ che al veve cirût, chês, ancje di doprâlis par contrastâ i siei nemîs internis: la Marcje istesse di dulà che al vignive, a dilunc salde simpri de sô bande – la resistence juste di tresinte soldâts triestins che a vevin di vêlu salvât de muart intune bataie disastrose stade su la aghe Trebie e veve fat scjas –, si jere cjatade propit drazade ma ben e no mâl. Chê di copâ l’imperadôr alore al è stât il finâl di une disfate mighe no tant o no dome personâl ma di un sisteme italic degradât che za Rome antighe lu veve implantât e tignût sù. L’imperadôr ultin e l’ultin dôs: al pâr di strani che tant l’Imperi carolin prin che la Republiche di Vignesie daspò si sedin cjatâts ducj i doi a meti la lôr fin in mans di sorestants furlans! Berengari di une bande e di chê altre Luduì Manin, judicâts par bogns di nuie ancje di putrope int, a son stât no dome ma ancje sigûr ‘vitimis espiadoris’ di falopis politichis dal alt, che la Storie magari cussì no ur à dade la colpe a lôr: plui curadôrs di faliment’ di Stâts clopâts che sperançôs salvadôrs de patrie’ destinâts a sei segnâts a dêt a ogni mût par malpratics adets o ben pizighets di passadis grandecis. L’auguri al è chel che cheste nestre biele regjon, che il so non al rivoche la liende di Caesar culì fondadôr di une crosere di popui, in avignî e puedi – al à finît Travain – no sei dabon scune di sorestants juste robe di nuie ma farie di gnûfs e valits modei di cunvigne umane, sociâl e civîl, che Italie e Europe soredut cumò al somee che a vedin cetante bisugne. O riscataressin, salacor, cussì il ‘nestri’ tribulât Berengari, fi di timps neris lontans che dal ciert, mutatis mutandis, al sarès ben di evitâ che a tornassin”. Des rispuestis vudis dai Comuns de regjon forojuliane atuâl, di particolâr significât e je stade sigûr la note spedide dal manierôs sindic Mario Ongaro di Cordenons, che, vint iniment il “leam culturâl un grum stret” tra il so paîs e la figure di chel dibatût imperadôr furlan – “che i ven di fat riferide a lui une bergamine che pe prime volte e nomene la comunitât dal futûr Cordenons” – e judicant la iniziative par vere “cunvigne cu la storie”, “avigniment impuartant no dome pe comunitât di Cividât che e à l’onôr di sei stade scune di Berengari”, al à pandût po sigûr l’avôt che a vedin di sei scambis culturâi cu la Citât Ducâl e ancje segnalade une deliberazion resinte de zonte “folpe” che e à destinât di meti un clap memoriâl par ricuart juste dal diplome di Berengari dal 897 “actum Naones corte regia”. In fin de cerimonie te sale dal Consei, cjapant mani di bielis sugjestions culturâls proponudis dal critic e studiôs roman Alfredo Barbagallo, i convignûts a àn fat memoreance di Berengari e de cjasade ducâl/marchesâl furlane dai Unrocs cul poiâ un garoful – compagn di chei che a figuravin parsore de oriflame di Carli il Grant – li dal poç storic cividin famôs che si dîsi “di Calist”. Tra lis rapresentancis sociâls, civichis, academichis e studentescjis rivadis dongje a jerin ancje l’assessôr za stât su la culture dal Comun di Udin, dot.e Marisanta de Carvalho di Prampero, preseade studiose, e par vicin in plui dissendents de innomenadone cjasade furlane di Savorgnan, non di lûc che la sô menzon cognossude plui indaûr si riferìs juste a un diplome di Berengari dal 922.