LUNIS AI 22 DI SETEMBAR 2014

Lunis ai 22 di Setembar 2014, li di Palaç Flori, te Universitât de capitâl storiche dal Friûl, il Club UNESCO di Udin, sot direzion de prof.e Renata Capria D’Aronco, par celebrâ la Zornade Internazionâl de Pâs, al à invidât il dean dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl, prof. Alberto Travain, a fâ une conference in lenghe furlane dal titul “Il simbul de place tal spirt di pâs e vierzidure al mont de tradizion furlane dal incuintri des diferencis”. Travain in particolâr al è tornât fûr cu la liende medievâl de fondazion di une furlanetât crosere e trassunt di lenghis e popui de Europe, imbastide ator di chel “forum”, di chel marcjât, internazionâl, riferît e intitulât a Iulius Caesar, che il so monument cividin – regâl dal ditatôr talian Mussolini, metût tal 1935 devant dal municipi di Cividât par rapresentâ la latinitât cuintri de stimade barbaritât vicinante dai Sclâfs e dai Mucs – a son passe dîs agns che il Fogolâr Civic e la Academie dal Friûl a matein par disbatiâlu e tornâ a batiâlu come cu va, par rionzi chê liende locâl di Caesar cul so mes storic di europeistiche centralitât e no di sieradure nazionalistiche. Lis laudis vignudis dal public a àn somierzudis lis isoladis protestis di cui che al à dit che nol jere just, une discriminazion di nature etniche, doprâ il furlan intun incuintri public, ma Travain ur à fat ben front, ribatint su la brucje che doprâ chê lenghe al è ametût de leç e no si à di intindilu, in pont di culture, par une maniere di comunicâ sôl che tra natîfs ma sociâl di dut il teritori che chel lengaç al è espression storiche de sô vicende. “Cui che al vîf in Friûl nol scuen fevelâ par furlan ma nol pues proibî al prossim di fâlu in ogni ocasion de vite sociâl e culturâl” al à dit il prof. Travain. “Siamo in Italia!” i àn sbarât cuintri. “Culì la Italie si clame Friûl o pûr no si clame!” e je stade la rispueste dal relatôr: “no si pues invocâ il Stât nazionâl par tibiâ lis identitâts locâls. Al vûl dî discreditâlu!”. Coment amâr chel dal professôr: “Zire e volte dîs agns indaûr mi soi ritirât dal cjamp, de prime linie, di une bataie o resistence linguistiche ce maniere che si vûl clamâle, che no jeri nancje calcolât sul front di promozion de lenghe furlane, promozion fate istituzionâl, ‘governative’ e pôc disponibile a scoltâ idealiscj e volontaris di chei pardavêr, di une cierte fate, in particolâr chei no imberdeâts par dret o ledrôs cun teolighis e fuarcis politichis o congreghis di chês in grant. Mi soi gjavât fûr pensant che il gno impegn nol fos no plui util e che dute chê furlanarie ufiziâl e bastàs dal sigûr aromai par difindi e puartâ indevant une lenghe cenglade a stret di une mondializazion salvadie e di un spirt nazionalistic talian carampan, cul rionzii o vuadagnâi un spazi vitâl te societât. Passâts dîs agns, se ancjemò, a Udin, intune sale di conferencis, a fevelâ par furlan si cjatisi contestâts, salacor al vûl dî che o ai vût tuart”.