LUNIS AI 28 DI LUI 2014

“Francesco Andrian, Remigio Beltram, Domenico Bergamasco, Giovanni Bergamasco, Antonio Bertogna, Felice Pietro Bertogna, Giovanni Brach, Giuseppe Cossar, Roberto Cossar, Giovanni Delneri, Luigi Delneri, Francesco Donda, Augusto Falchet, Giuseppe Folla, Santo Folla, Luigi Fontana, Aquilio Fonzar, Remigio Forchiassin, Giovanni Furlan, Michele Ermagora Furlan, Arturo Gardenal, Giovanni Gardenal, Antonio Gereon, Giuseppe Gereon, Erminio Isidoro Gleria, Luigi Macor, Antonio Magron, Lorenzo Menon, Leonardo Mian, Leonardo Mian, Giuseppe Miceu, Luciano Moro, Giordano Morsut, Graziano Padovan, Giuseppe Paulin, Giuseppe Pelos, Francesco Domenico Pontin, Celeste Pozzar, Edoardo Pozzar, Antonio Puntin, Francesco Domenico Puntin, Giovanni Puntin, Giacomo Ret, Eugenio Sandrigo, Libero Sandrigo, Luigi Sandrigo, Remigio Sandrigo, Domenico Sandrin, Luigi Sandrin, Normanno Sandrin, Lorenzo Scarpin, Dionisio Scuz, Gino Stabile, Guido Stabile, Valentino Stabile, Giuseppe Sverzut, Fortunato Terpin, Domenico Toso, Carlo Violin, Giovanni Virgulin, Luigi Visintin, Rosario Placido Zorat, Giovanni Zorzenon, Giuseppe Zorzenon, Mario Zorzin,…”. Cun chê di rapresentâ une cussience di identitât regjonâl e transconfinarie parsore des divisions imponudis de Storie a lis popolazions dal Friûl Vignesie Julie che al è cumò, di iniziative dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl sot presidence dal prof. Alberto Travain, cul prudêl morâl de federazion provinciâl udinese dal Istitût nazionâl talian dal Galon Turchin jenfri decorâts al valôr militâr, in cunvigne cul Club UNESCO di Udin, cu la Confraternite locâl dal Crist, cul Coordenament Citadin dal Borc de Stazion, partecipante la Pro Loco di Citât dal Borc dal Soreli di Udin Disore e intervignude la sorestanzie comunâl, lunis ai 28 di Lui 2014, te zornade dal centenari de Prime Vuere Mondiâl, si è tignude, li de Capele Civiche di Sant Zuan te capitâl dal Friûl, capitâl taliane di chê Grande Vuere, une cerimonie in ricuart di ducj cuancj i muarts in monture asburgjiche e ancje savoiarde fîs de comunitât di Aquilee, localitât che cent agns indaûr e jere sot de Austrie-Ongjarie, citât simbul, mari di Udin, de Furlanetât e de Mittel-Europe. Il prof. Travain, udinês, che cun solenitât al à let i nons dai muarts in vuere di Aquilee li che lis delegazions sociâls ur àn fat i onôrs cun medaîrs, bandieris e standarts e poiant jù une zoie di orâr cu la gale civiche europeane e une dediche “Ai muarts de Marie Aquilee te Prime Vuere Mondiâl”, al à batût un grum, tal so discors di memoreazion, tignût in buine lenghe furlane, “che ducj i muarts si à ben di onorâju, ma no lis ideis, parcè che i principis nazionalistics, razistics, disferenceadôrs, trionfants te Prime Vuere Mondiâl cuintri di stamps, ancje di perfezionâju, di Stât sorenazionâl in condizion di meti adun tal rispiet etniis diferentis – di un tant l’imperi asburgjic sdrumât al è stât di spieli, precursôr di unitât europeane e po stâi ancje uniche formule par risolvi problemis di agnorum sul pont dal convivi te Tieresante! -, a àn puartade la nestre Europe juste a viodi il sfondar des copadicis di popui di vie pal Nûfcent e des lotis etnichis dal gnûf mileni”. “Ce maniere che la plui gloriose nestre storie passade di comunion internazionâl e à non Aquilee, che de sô ereditât morâl Udin al à titul di tignîsi in bon plui di altris localitâts, ve che l’avignî, alore, dai nestris popui o che si clame Europe o pûr no si clame!” al à sierât Travain, cjalcjant su la impuartance no dome culturâl dal presint di onôr destinât te “Capitâl dal Friûl” in chê ocasion particolâr ai “fradis” muarts in vuere di Aquilee. Pal Comun di Udin al è intervignût, in rapresentance dal Sindic, l’assessôr dot. Enrico Pizza che al à rignuvide la stime dai Sorestants de citât “pal condurâ, pal valôr e pe zentilece des iniziativis dal Fogolâr Civic e fradaiis colegadis par tignî sù la cussience civiche e il gust di scuvierzi lûcs e memoriis di costruî parsore un avignî di pâs”. A son intervignûts po ancje, resonant sul câs, il president provinciâl dal “Istituto del Nastro Azzurro”, gjeom. Sergio Bertini, la prof.e Renata Capria D’Aronco, deane dal Club UNESCO di Udin, e il sorestant de Pro Loco citadine dal Borc dal Soreli di Udin Disore , arch. Giuseppe Vacchiano. Une vore ferbint al è stât il discors dal priôr de Confraternite dal Crist, Giuseppe Capoluongo, che lis à ditis penzis cuintri di vueris e sticevueris di ogni ete e nazion. Il preseât mestri Alfredo Orzan, udinês vignadiç dal Gurizan, al à vût iniment ai presints che la plui part dai Furlans in chê volte, di ca e di là dal clap, no voleve in cûr so la vuere e ancjemò mancul, de bande orientâl de regjon di cumò, no suspirave ‘liberazions’ dal so legjitim e valit guvier. “La int – al à concludût Orzan – le àn tradide, sturnide, cu la propagande a servizi soredut dai interès des fabrichis di armis!”. In fin de cerimonie il prof. Travain al à volût fâ publiche laude a la sô insegnante di todesc des superiôrs, la prof.e Anna Buliani Gozzi, che cul tenôr Gianfranco Savorgnan e à deponût pe ocasion la zoie in memorie dai muarts in vuere di Aquilee, e cun chê al à ricuardade la sô impuartante testemoneance culturâl tes scuelis a pro di une culture mittel-europeane di armoniose cusidure di diferentis lenghis e nazions. Une dediche par furlan “Ai muarts in difese di une Europe civîl 1914-1918” dongje di un zirasol, riclam al soreli dal diu celtic Belin, difensôr, patron classic de metropul di Aquilee antighe, e ancje ben rose cui colôrs zâl e neri de Cjase di Austrie, che Udin cun chê ben o mâl al è in debit par vie de sô prime ferade, e je stade metude jù in ultin te capele, dapît de Statue de Glorie Alade, dal Coordenament Citadin dal Borc de Stazion di Udin, ricuardant la sô deane di no smenteâle, Francesca De Marco, spieli lusint di sens civic, mancjade di pôc. Pe ocasion a àn fat di banderâr, cui segnacui dai cinc “cuintîrs” dal Moviment, i siôrs Marisa Celotti, Jole Deana, Elvia Tosolini, Adriano Zoccolo, Gianna Zuccolo, e al jere ancje il vessilîr gjenerâl sâr Gianfranco Passone, cu la bandiere storiche aquileiese. Presints po il Medaîr provinciâl dal Istitût nazionâl talian dal Galon Turchin, il Confenon de Fradaie dal Crist e il standart de Pro Loco di Citât dal Borc dal Soreli di Udin Disore.

Precedente LUNEDÌ 28 DI LUGLIO 2014 Successivo MERCOLEDÌ 30 LUGLIO 2014