LUNIS AI 29 DI DICEMBAR 2014

Tant che al sucêt ogni an in chê date dal 2010 incà, li de glesie di Sant Jacum a Udin, lûc di tradizion destinât in citât al ricuart di chei che no son plui, indulà che, indaûr jù pe Ete di Mieç, il popul udinês i veve dedicade une capelute a Sant Laurinç Martar là che e jere impiade simpri une lum pes animis dai condanâts che a vignivin copâts su la place devant che ai timps i disevin Cjamp di Justizie, lunis ai 29 di Dicembar 2014, di iniziative dal Moviment Civic Culturâl Alpin-Adriatic dal Fogolâr Civic, president il prof. Alberto Travain, e je stade une “Sante Messe pai Muarts de Societât Civîl ” locâl e globâl, tal inovâl che al jere stât scanât l’arcivescul medievâl inglês Tomâs di Cjantervuris, liende storiche internazionâl dal tignî bot cuintri des prepotencis, che al jere stât ancje ben un spieli pal patriarcje aquileiês Beltram, patron civic udinês e furlan. La celebrazion religjose, cun preieris tes lenghis storichis de regjon, le à presiedude il preseât “capelan” dal Fogolâr Civic, pre Tarciso Bordignon, funzionant pre Luigi Zuliani, dal servizi gleseastic locâl. Une Sante Messe, partant, dedicade ai testemonis di un impegn sociâl di ogni fate, di ogni timp e di ogni bande di mont, funzionade doprant un cjaliç dal benemerit bons. Giuseppe Merlino, il prevost di Palme che al è il 60m chest an de sô muart, che cun trat eroic tal 1945 al veve salvât di distruzion la citât stelade dal Friûl. Daûr de cerimonie, li dal “Altâr dai Muarts”, lis bandieris dal Fogolâr Civic ur àn fat i onôrs a “precursôrs e compagns mancjâts di un impegn a favôr e difese di umanitât e justizie, libertât e dignitât dal singul e de comunitât intindudis in mil mûts e simpri bramadis”: jenfri di chei lis socis puaris siore Iesina Caporale e siore Francesca De Marco, president dal Coordenament Citadin dal Borc de Stazion di Udin, muartis tal 2014. Tes delegazions dal Moviment a jerin ancje i conseîrs gjeom. Sergio Bertini, prof.e Renata Capria D’Aronco, siore Marisa Celotti, siore Jole Deana, dot. Carlo Alberto Lenoci, sâr Eugenio Pidutti, dot.e Maria Luisa Ranzato, tenôr Gianfranco Savorgnan, i banderârs siore Laura Nazzi e siore Elvia Tosolini cul vessilîr gjenerâl sâr Gianfranco Passone.