LUNIS AI 29 DI SETEMBAR 2014

“Il Moviment Civic Culturâl Alpin-Adriatic dal Fogolâr Civic, nassût a Udin, in Furlanie, a cavalot di malandrets confins che a àn separât i popui dal antîc e gloriôs Patriarcjât di Aquilee, nestre prime memorie di union spirituâl, si complimente cetant cun Lui pal sucès tes ultimis votazions che Lu àn puartât al tamon dal So Stât. Si confide che Al cirarà di miorâ la vite de sô cjare int che, par un toc, e je ancje la nestre. I racomandìn ancje di procurâ di fâ tornâ a scuvierzi simpri plui al so popul la Storie in comun positive che al à cun chei des regjons dongjelaltris di là di vieris sorpassâts confins. Che nus judi ancje Lui a sintîsi plui fradis e a frontâ lis disfidis dal avignî tant che une famee unide di volontât e di tradizion. Bon pro par Lui e pai Sei citadins!”. Ve ce che a àn scrit, lunis ai 29 di setembar 2014, il coordenadôr gjenerâl dal moviment euroregjonalistic dal Fogolâr Civic, vâl a dî l’udinês prof. Alberto Travain, e chel regjonâl dal Litorâl, ven a stâi il tolminot prof. David Bizjak, intune letare di salutazion destinade al gnûf sorestant dal guvier sloven, prof. Miro Cerar, un tant tal spirt di une comunance ideâl che lis sôs lidrîs plui insot si à di cirîlis te miôr storie passade in comugnâl tra gjernaziis jenfri Alps e Adriatic.