LUNIS AI 30 DI JUGN 2014

Lunis ai 30 di Jugn 2014 une delegazion dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl, menade dal prof. Alberto Travain, e je stade ricevude a Udin, in municipi, dal Sindic, prof. Furio Honsell, e dal Assessôr su Cumierç e Turist dal Comun, dot. Alessandro Venanzi. L’incuintri, cordiâl e positîf, al à vût di argoment judizi e propuestis culturâls presentadis des dôs fradaiis in cont dai vincj agns de manifestazion “Friuli Doc”, che si à dit che si spere che e zovi di plui a sparniçâ in mieç de int une identitât di Udin no dome metropul storiche regjonâl ma ancje internazionâl alpine-adriatiche traviers ereditât dal Patriarcjât aquileiês di une volte, prime Mittel-Europe unide che la citât furlane e je stade sô capitâl ultime. “Friuli Doc”, in sumis, intun Udin “Aquilee Gnove”, cûr dal Friûl ma ancje ben dai popui che la Prime Vuere cent agns indaûr e à cirût di dividi cence remission. “Prin di dut – si lei tal document presentât a chei doi sorestants – si domande di dâ une armonie in fat di costrut, ven a stâi di compagnâ ben in pont di culture, che al fili il discors, chê manifestazion che si trate culì e lis fiestis di popul pal complean de citât che, sabide ai 13 di Setembar 2014, e finìs 791 agns. Si propon, in pratiche, che la piçule cerimonie chê che si va a meti jù lis rosis li de Colone di Marcjât Gnûf in Place Sant Jacum, rituâl che al condure te tradizion des celebrazions dal inovâl citadin instradadis tal 2001, e vedi no dome ancjemò presints Sindic e rapresentance buine di Zonte e Consei comunâi, ma ben ancje e sedi propagandade dal Comun stes tant che iniziative vignude dal bas e incuadrade benon te manifestazion che si trate, fat par so cont e dut intun leât, anzit che i da savôr cul dâ une lidrîs al sagron “Friuli Doc” tirant fûr juste lis fondis de citât che i da ricet, vâl a dî chês di centrâl atrative e di rapresentance, in pont di cumierç, ma ancje di culture e politiche dal teritori. In cont di chest riclam su lis origjins de identitât citadine e su la funzion teritoriâl di Udin, si sugjerirès, ancje propit te suaze di chê manifestazion alì, di viodi di tirâ sù framieç de int il sens di rapuarts e di comunancis storics che a van de citât al Friûl insin di chê primarole dimension alpine-adriatiche o ben mittel-europeane che la capitâl de Furlanie e je stade sô metropul ultime co e jere sede dai Patriarcjis di Aquilee. Cierts riferiments a la storiche centralitât no dome regjonâl ma internazionâl di Udin soredut midiant de ereditât aquileiese, a puedin voltâsi ancjemò di plui intun invît a passâ parsore dai nazionalisims trionfants te Prime Vuere Mondiâl che a son cumò i centenaris, ma ancje a tornâ a tirâ fûr e a rionzi, sul plan secolâr, culturâl e civîl, chê “mission” sorenazionâl che e fo dal antîc Patriarcjât locâl, mission inibide par cetant timp a une tiere dividude e ridusude a sentinele di confins oltrans. Un invît di chê fate, cun sigûr largjis prospetivis di aplicazion utile, si spere che al puedi sei cjapât sù prin di dut dal Sindic e di dute la Sorestanzie di un Udin ‘Aquilee Gnove’: un tant ancje ben pe scree de manifestazion-vitrine internazionâl dal mangjâ e bevi furlan”. I domandaments presentâts si son incuintrâts in plen cun intindiments e disponibilitâts dal Sindic e dal Assessôr, cun buine sodisfazion de delegazion sociâl menade dal dean prof. Travain e componude dai conseîrs gjeom. Sergio Bertini, prof.e Renata Capria D’Aronco, siore Jole Deana e tenôr Gianfranco Savorgnan.