LUNIS AI 5 DI OTUBAR 2015

“Insegnâ sot ricat: la scuele publiche sot di une false democrazie”: ve culì il titul de conference tignude a Udin, lunis ai 5 di Otubar 2015, dal prof. Alberto Travain, Dean dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl, ancje Delegât dal Club Unesco di Udin par Formazion Civiche e Citadinance Ative, fate li de sede universitarie di Palaç Solari, dentri te suaze des celebrazions de Zornade Mondiâl dai Insegnants promovudis te capitâl furlane dal Club Unesco dal puest, sot tamon de prof.e Renata Capria D’Aronco. “Scuele ven a stâi monument al populisim di Stât!” al à tamburât il prof. Travain sigurant in partence “o disarai ancje salacor robis che a tancj no ur pochin e in disconcuardie cun ce che par solit si predicje ator. A ogni mût o speri di no fa la fin dal gri di Pinocchio, stampât tal mûr par vie che i roseave la cussience a un pipinot di len aspirant a dignitât di persone. Nol sarà il câs ca di cui che mi scolte!”. “O disarai robis in plen contrariis – al è lât dilunc Travain – des liniis di guvier des scuelis plui adotadis cumò in Europe e vie pal Ocident, li che i sorestants a tirin a frenâ la partecipazion di popul in politiche licuidânt la pretese tant che populisim volgâr e le ametin fûr di puest a scuele magnificantle par democrazie e magnificant lôr stes juste par siei campions. Parcè fasino un tant? Par parâsi di chel popul che al ambìs simpri plui di controlâju cul dâi il content di concedii un control su scuelis e insegnants sometûts al capriç di aventôrs di une supierbie cence redenzie. Cemût ise tacade cheste storie in Italie? E je tacade tai agns dal ’70 cu lis leçs che a àn mudadis lis scuelis publichis talianis in comunitâts partecipadoriis e e je lade indevant tai agns dal ’90 e imprin dal mileni co ur àn concedût ai singui istitûts autonomiis di bêçs e di regulis e di programs che ju àn in pratiche stramudâts in aziendis sot regjim di concorence libare, a cjace disperade di ‘clients’ che sigûr nol reone in pont di economie di contrestâju in nuie. Un tant al à cressût cence limit la fuarce ‘contratuâl’, ‘politiche’, de component dai gjenitôrs dentri di comunitâts scolastichis partecipadoriis deventadis autonomis e lassadis, cussì, in balie di cuarps di usazîrs simpri plui dominâts di elements cence sintiment e responsabilitât. Insegnâ sot ricat’, duncje? Po sigûr. Il ricat al sta tal malindât dirit dai gjenitôrs clients di scrivi i lôr canais intune altre scuele li che il lôr ‘capriç’ nol è sodisfat! Ve mo alore che, di une bande, i dirigjents, par no pierdi aventôrs e premis, di chê altre, i docents, par no pierdi par mût di dî il puest, tant dispès si plein a cheste democrazie butade intune velegnose barzalete che il so non plui adat al è chel di une ‘tiranie coletive’, di une ‘siorie plurâl’ tantis voltis nancje rispietose des maiorancis e saldo usade a invadi prerogativis che di logjiche – se no di leç – a varessin di sei par istituzion e mistîr dai docents e no mai di arlêfs e dai gjenitôrs lôr ‘sindacaliscj’. ‘False democrazie’? Po sigûr. Une scuele li che lis regulis si lis trate no je une palestre di democrazie e un tant soredut alì che lis parts no àn fuarce compagne te tratative!”. “Soluzion?” al à domandât il public de Sale dal Clavîr di Palaç Solari plene di int. “La rivolte – al à rispuindût, sec, Travain – : la rivolte morâl, civîl, pacifiche se mai si pues; la rivolte no di une categorie nome, ma di dute une citadinance che e viôt a ‘clopâ’ chês ‘sigurecis’ e chês ‘ciertecis’ di une volte, rapresentadis te Storie, almancul in Friûl Vignesie Julie, des Istituzions scolastichis. Al è di mieç, po si sa, il vuê e il doman de nestre societât, de sô mentalitât, de sô capacitât di unissi in armonie e justizie!”.

Precedente LUNEDÌ 5 OTTOBRE 2015 Successivo GIOVEDÌ 15 OTTOBRE 2015