MARTARS AI 10 DI FEVRÂR 2015

“O sin un sôl popul!”. Ingusîts onôrs “euroregjonalistics” te capitâl de Furlanie Storiche pe tragjedie de profugance di Istrie e Dalmazie. In pîts dute une sale di conferencis, te Universitât dai Studis di Udin, par un minût di cidin devant de bandiere che plui a dilunc e à unît, jù pai secui, passant ogni diference e parsore di tancj confins, lis popolazions jenfri des Alps e dal Mâr Adriatic: la bandiere chê di Aquilee e in specific chê istesse, che so paron al è il Fogolâr Civic, benedide di Pape Checo ai 15 di Zenâr 2014 in mans dal benemerit plevan furlan pre Tarcisio Bordignon. Un tant al è stât juste martars ai 10 di Fevrâr 2015, di iniziative dal Moviment Civic Culturâl Alpin-Adriatic dal Fogolâr Civic, ospit, tes personis dai relatôrs prof. Alberto Travain e dot. Carlo Alberto Lenoci, di un incuintri public inmaneât di pueste dal Club Unesco di Udin direzût de prof.e Renata Capria D’Aronco. I à tocjât al dot. Lenoci di tornâ a fâ la storie dal drame dai esui e di disegnâ ancje lis responsabilitâts penzis dal Stât talian viers di lôr. Il prof. Travain invezit, in plui di riclamâ lis lidrîs comunis di Furlans e Istrians che parfin Dante ju imparintave par vie de istesse lenghe ladine (chê, par so cont, dal orent “ces fastu?”), al è tornât fûr cu la idee proponude dal Fogolâr Civic di une Zornade dal Ricuart “Euroregjonâl” par memoreâ ducj i frucepopui stâts o tentâts in dam des popolazions confinariis de bande alpine-adriatiche, “crosere naturâl di varietâts dal Continent alì che malandrets nazionalisims e totalitarisims ideologjics di riunde ‘foreste’ a àn stramudât jenfri Vot e Nûfcent diferencis in divisions, il convivi in no plui sopuartâsi”: une Zornade dal Ricuart “Euroregjonâl” che il Fogolâr euroregjoanalistic al à scomençât a celebrâle l’an passât ai 6 di Lui, tal inovâl de “Finis Aquileiae” vâl a dî de abolizion, tal 1751, par resons politichis vergognosis, de plui antighe e condurade istituzion di coordenament sorenazionâl de Mittel-Europe: il Patriarcjât di Aquilee juste apont.

Precedente MARTEDÌ 10 FEBBRAIO 2015 Successivo FEBRUARY, THURSDAY 12TH, 2015