MARTARS AI 15 DI SETEMBAR 2015

Martars ai 15 di Setembar 2015, te suaze des celebrazions de Zornade Mondiâl de Democrazie, organizadis dal Club Unesco di Udin dentri de Universitât dal Friûl, in Sale dal Clavîr di Palaç Solari, il prof. Alberto Travain, Dean dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl oltri che Delegât dal Club pe Formazion Civiche e pe Citadinance Ative, al à tignût, in lenghe furlane, une lezion dal titul “Lidrîs di democrazie tal ‘Atenis dal Friûl’: fondamentis di storie civiche di Udin”, li che al è tornât su lis tapis plui impuartantis de formazion e de costituzion politiche dal Comun capitâl dal Friûl, dal 1223, fondazion de citât-marcjât, al 1513, abolizion dal Renc. Atenzion particolâr si le à dedicade aes riformis istituzionâls riferidis de tradizion al patriarcje medievâl di Aquilee Beltram, il Patron Civîl dal Comun, paragonât cul atenian Clistene che al veve incrosât cuarps teritoriâi e sociâi di divierse estrazion te sperance di inibî il formâsi di stagns di privileç salacor in contrast cul guvier. Ve spiegade la anession ae citât dal contor contadin, saponte governative cuintri di nobii e borghesans dal Centri, cun chê di sigurâur ai vescui-princips regjonâi il control politic de localitât sielte par residence. “Di li al è partît il slargjâ fra il popul – al à dit il prof. Travain – dal dirit di votâ che al à vût puartât al svilup de assemblee partecipadore locâl batiade cul non di Renc, similâr de ‘Eclesie’ di Atenis antîc”. Une assemblee, chê dal Renc, che Fogolâr Civic e Academie dal Friûl si preparin a rinovâle tant che imprest di mobilitazion e partecipazion spontanie di popul in vuê.

Precedente MARTEDÌ 15 SETTEMBRE 2015 Successivo VENERDÌ 18 SETTEMBRE 2015