Cinccent agns indaûr pre Bortul Pauluç di Mortean al jere stât condanât a Vignesie a murî tra lis dôs colonis di Sant Marc e Sant Todar, dongje di Palaç Ducâl, par vie che al veve cirût di tornâ a meti sù il patriarcjât politic aquileiês parant fûr dal Friûl l’invasôr venezian cul jutori des armis asburgjichis. Ve che alore sul puest e je rivade di Udin, pal aniversari, une delegazion dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl, menade dal prof. Alberto Travain, che e à ricuardât juste chel personaç e poiât jù li des colonis là che al jere stât fat il patibul une gale cui colôrs di Aquilee e de Furlanie. “Une memorie, chê di pre Bortul di Mortean, che i à fate reson – al dîs Travain – un gnûf studi, brilant e profont, di Roberto Tirelli, vignût fûr tal 2013, là che si torne a fâ sù cun maestrie la storie, fin cumò infamade o dismenteade, di che ‘patriot’ dal Patriarcjât di Aquilee di une volte. Un tant al conferme trop preseôs sul front culturâl che al pues jessi il lavôr dai storics locâi”.
EuroAquileienses
+ NOTIS DI LIBARE CULTURE CIVICHE DAL CÛR FURLAN DE MITTEL-EUROPE / NOTE DI LIBERA CULTURA CIVICA DAL CUORE FRIULANO DELLA MITTELEUROPA / NOTES OF FREE CIVIC CULTURE FROM THE FRIULIAN HEART OF CENTRAL EUROPE +
