MARTARS AI 23 DI JUGN 2015

“Apollini Beleno et Herculi Aquileiensium”, par Belin apolian e pal Ercul di chei di Aquilee: ve culì la dediche dal particolâr “mac di Sant Zuan” puartât a Udin dal Fogolâr Civic ae vilie de ricorence di Sant Zuan Batiste in Place Libertât o Contarene, in Centri, li de statue di Ercul (Florean), “presint pal gnerf dai nestris basavons”, onorance di popul ae indurance dai vons che za fa 1777 agns, sot fiestis di solstizi chês antighis in onôr di Ianus e de Fortune, cristianizadis cul intitulâlis al Sant Batiadôr, liende mastine di saldece e testemoneance cuintri dal abûs, a àn viodût a sierâsi in glorie di vitorie la lôr plui epiche resistence a une tiranie supuartade dal plui fuart esercit dal mont. In adesion libare a un flash mob culturâl internazionâl ad hoc inviulât de innomenade artiste furlane Roberta Masetti, il Moviment Civic Culturâl Alpin-Adriatic dal Fogolâr Civic, sot presidence dal prof. Alberto Travain, al à crodût ben di dâ une man su la propueste di rignuvî tradizions e memoriis dal Friûl in cont de ricorence di Sant Zuan Batiste cul ricuardâ il plui rimarchevul fat di storie civîl locâl e no nome stât juste ben in chê date vâl a dî la vitoriose resistence di popul a Aquilee dal 238 cuintri de armade imperiâl romane, colaborant il mitic diu celtic Belin ven a stâi il Soreli. Mighe no dibant in chel “mac di San Zuan” alì, vendeme di jerbis e flôrs cuintri dai malans, che il Fogolâr Civic jal à destinât, dutune cul Circul Universitari Furlan de Academie dal Friûl e cul Club Unesco di Udin, al monument dal puest ae fuarce ercoline, juste a dominavin i ziresôi, simbul trionfâl dal Soreli che al varès combatût in chê volte de bande di chei di Aquilee! E li a jerin rapresentancis di dutis lis delegazions dal Fogolâr Civic, rivadis parfin de Valteline, confin di bonât de Aquileiesitât, fidêl in particolâr aes dretis de antighe metropul alpine-adriatiche! Oltri al prof. Travain, te part dople di dean dal Fogolâr Civic e de Academie dal Friûl, a son intervignûts i siei parelis dal Club Unesco di Udin, prof.e Renata Capria D’Aronco, e de Federazion provinciâl dal Istitût nazionâl talian dal Galon Turchin fra Combatents Decorâts al Valôr Militâr, gjeom. Sergio Bertini. Infalibil il “vessilîr gjenerâl” dal Fogolâr Civic, cu la bandiere storiche aquileiese, sâr Gianfranco Passone. Tra lis rapresentancis, ancje i conseîrs movimentâi sâr Giuseppe Capoluongo, siore Marisa Celotti, siore Jole Deana, dot. Carlo Alberto Lenoci, dot.e Maria Luisa Ranzato (“santule” dal “mac di Sant Zuan”) e il cjantant liric Gianfranco Savorgnan. Pe clape dai sustignidôrs a jerin la mestre Manuela Bondio e i siôrs Carmelo Fiore, Rosalba Meneghini e Mirella Valzacchi. Tra la int che e à partecipât ae cerimonie memoriâl a jerin ben ancje dai miôr arlêfs dal prof. Travain, compagnâts des fameis. Presint, in rapresentance dal Comun di Udin, l’assessôr dot. Enrico Pizza, che al à rinovât al Fogolâr Civic la stime e il sburt dal sindic prof. Furio Honsell. “Ce sens puedial vê vuê chel di ricuardâ, di svantâ par lidrîs di un teritori di compartîlu cence abadâ a diferencis di origjin, chê tâl resistence valorose e vitoriose de popolazion civîl cuintri de fuarce arude dal esercit plui possent de Tiere?” si à domandât par mût di dî Travain: “Al vûl dî inzornâ te proprie vite chel trat di saldece, chê storiche mastinetât deventade liende e slungjade a pueste po dopo tal brût di une Furlanetât pustice nome che sotane dal paron di zornade! I fats dal 238 a son dibatûts: chel nol gjave però che par secui ju vedin tignûts juste ben di spieli di une tignince che par antîc si veve gust di riferîle adiriture ae une lontane e braurose lidrîs troiane!”.

Precedente MARTEDÌ 23 GIUGNO 2015 Successivo MERCOLEDÌ 24 GIUGNO 2015