MARTARS AI 25 DI FEVRÂR 2014

“Stimât Sâr President, tirant dongje i resonaments de int dal puest in cont di ce sens che al è ator di sei part di une comunitât in misure di Europe cumò che a son prossimis lis votazions, chês fradaiis culturâls che chi a firmin a àn ricevût ancje il scrit che si zontiI culì di lei, metût jù di un fantat di 22 agns, che il so sium, no dome sul front dal lavôr, al pararès ancjemò chel merecan, chel di une Americhe che, prin di sei un Stât e un sisteme economic, e je une idee. Ve un contribût zovin, Sâr President, di cheste antighe crosere de Europe che e je la regjon dal Friûl: ve un stombli par une politiche taliane che e ciri di miorâ e di infuartî une unitât europeane presentabil prin di dut par liende positive e plan util pal avignî”. Cussì i scrivin Fogolâr Civic e Academie dal Friûl al premier Renzi sui cantins tant contestâts dal europeisim, zontant une letare dal zovin di Udin Francesco Nicolettis, che e marche la dibisugne di concretâ une Union Europeane prin di dut politiche e ideologjiche di implant federâl, su stamp merecan. Cun snait colorît, Nicolettis al piture, di fat, il malstâ di tancj de sô etât che in zornade di vuê “no si sintin a part di un continent che al fevele cuntune vôs sole, ma ben tal mieç di un grant scjas di suns discompagnâts che, invezit di formâ armonie, a fasin un davoi di no sopuartâsi” e al siere motivant che “al sarès il câs, salacor, par une volte, che Europe e Europeans a metessin di bande un tic il lôr orgoi e si paragonassin ancje cun chei ‘cowboy’ che di 238 agns a tegnin in pîts une federazion di Stâts cetant diferents un dal altri e ognidun cu la sô storie! Salacor, par une volte, o podaressin imparâ di lôr alc di bon, parcè che ogni tant ancje i zovenuts a insegnin ai vielis. E sarès ore un fregul di riviodi cheste Union, di tornâle a fâ sù su fondamentis saldis e soredut di fâle cognossi e sintî tal cûr dai siei citadins. Isal dificil? Po stâi, ma se a àn rivât a petâle i ‘cowboy’ a puedin rivâ ancje i Europeans!”.