MARTARS AI 25 DI MARÇ 2014

Un grum agradît il discors in memorie fat dal sindic Honsell, rivât cu la fasse e il confenon dal Comun, par presentâ i onôrs de citât “a une citadine esemplâr, dut intun amante de tradizion e vierte al avignî e a lis sôs problematichis”. Li che il tenôr Gianfranco Savorgnan al intonave l'”Ave Verum” di Mozart e la puartevôs dal coordenament dal cuartîr, siore Laura Paviotti, e leieve l’ultin salût dal comitât, su la casse e jere ben in mostre la bandiere dal Borc de Stazion, blancje e nere cul profîl colôr ferovîr des divisis di une volte; tor ator, i segnacui de plui mastine societât civîl udinese e furlane: des insegnis dai cinc cuintîrs dal Fogolâr Civic furlan e sloven ai confenons de Academie dal Friûl, de clape dal Bordolee Antîc e de Confraternite dal Crist. Tantonis lis rapresentancis di associazion: dal Club UNESCO di Udin a la Pro Loco citadine dal Borc dal Soreli, dal Cordicom regjonâl a la fradaie de Bancje dal Timp. In ideâl, Udin, il Friûl e no dome, i politics – chei che a comandin e chei che a son cuintri – e la societât impegnade, si son dâts dongje, duncje, de bare di Francesca De Marco, intimpade e salde promotore di un spirt civic locâl rignuvît e cun sintiment viert al mont tant che a pandin zaromai di dîs agns di ativitât dal coordenament citadin dal borc feroviari de storiche capitâl furlane. Prin dal funerâl, stât alì de glesie udinese dal Carmin ai 25 di Març 2014, di cetantis bandis a jerin rivâts mes di corot afetuôs, no di ultin chel dal cuestôr di Triest, dot. Giuseppe Padulano (“O ricuardi la Siore Francesca cun tant afiet”), passât là di Udin e promotôr convint di une “sigurece partecipade” dal teritori che e movi in ben ancje i citadins, tant che e bateve ancje la De Marco al comant dal so comitât civic. Comozion po pe dediche de dot.e Anna Peruch, part fondadore dal coordenament dal Borc de Stazion: “Nol è facil savê fâ bocje di ridi cuant za il cûr al slente il so bati, ma tu tu lu âs fat, coragjose e dolce compagn di simpri. La tô vite e je stade un regâl di amôr che o conservarai tal scrign des robis miôr. Cun Gjo, cjare amie, o sai che serene tu passarâs chel puint sul arc di Sant Marc, riduçantnus inmò, di là sù”. “Puare la nestre Francescje, nus displâs cetant. E jere une grande femine, e sarà simpri vive tal nestri cûr” al à scrit in furlan perfet l’academic prof. David Bizjak, coordenadôr dal Fogolâr Civic de Primorska (Litorâl Sloven), rivât pes esecuiis cuntune delegazion di Tolmin. Prin di ducj i sorestants di Udin, l’assessôr dot. Enrico Pizza al veve mandât un messaç passionât di corot in memorie de mertorie citadine. Tal zîr des associazions che la De Marco e veve dentri une part di rivuart za si fevele de intestazion minim di une jeche a la Siore dal Borc de Stazion che il sindic Honsell in amicizie le batiave par “cret”: il prof. Alberto Travain, dean dal
Fogolâr Civic e component di prosorestanzie di chel coordenament borghesan di Udin, al propon il strop di Plaçâl de Republiche, “che di li si viodin tant la Stazion che Palaç Daronc, borc e citât, cuartîr e Comun, emblemis di chês dôs misuris dal vivi civîl e sociâl che la De Marco e à savût compagnâ e fâ incuintrâ cun sens civic”. Al merete ripuartât ca daûr prin di dut il test de dediche memoriâl des sorestanziis di Fogolâr Civic e Academie dal Friûl a la benemerite mancjade. “‘Cuant che si è anzians no si à pôre e si è in dovê di salvâ la zoventût! Mai molâ!” (Francesca De Marco) / MANDI, FRANCESCA! / Il deferent e afetuôs cumiât di Fogolâr Civic e Academie dal Friûl par une amie e une consûr che no si dismenteile sul pont dal impegn a favôr de comunitât in timp di mondializazion… / Duncje, Francesca De Marco e je muarte. E je muarte la amie, la intimpade deane dal Coordenament Citadin dal Borc de Stazion di Udin, preseade une vore e cetant ferbinte, figure impuartante ancje tal Moviment Civic Culturâl Alpin-Adriatic dal Fogolâr Civic e compagn tal Circul Universitari Furlan de Academie dal Friûl, cence peraulis pal displasê grant cumò di une pierdite che e je tant grivie che cence rimiedi. Une pierdite grivie no dome pes clapis che a àn vût l’onôr di vê la nestre Francesca tra i lôr confradis e di conferîi ancje funzions di rivuart. Une pierdite grivie mighe no dome pai siei amîs, che a àn simpri gjoldût de sô buine peraule, de sô scletece, de sô onestât, dal so benvolê. Une pierdite grivie no dome pal cjâr so borc alì che e je nassude e che fin tal ultin lu à vût iniment, che i tignive tant. Il trapàs di Francesca De Marco al è cun di fat une pierdite grivie, anzit, grivie ma tant, pe citât interie, pai citadins ducj, pe societât civîl dute cuante, pal mont civist di Udin e Friûl cjapâts dentri ducj, che cumò a son vuarfins di une persone che, a ‘nd è sigûr pocjis in chei timps culì, che e à mostrât di vê un tacament salt, ferbint e munific al ben de sô tiere e a chel de sô int. Francesca De Marco par nô e restarà tant che un santul in cîl, une bielestele, un riclam, un spieli, pe sô umanitât e come vuide storiche di chel che al è stât fin cumò dabon il plui vivarôs, combatîf, atent e propositîf comitât citadin di borc dal centri di Udin di chel secul ca. Une femine che e veve fat dal privât de sô vite un regâl gjenerôs pe sô comunitât. Sigûr le avilivin la incomprension e ciertis facilis sfuarçaduris che e jere sogjete ogni tant la sô opare e chê dal coordenament sot di jê, une opare sclete, dute a favôr di une integrazion che e fos rispietose dai ultins rivâts ma ancje des tradizions di une tiere, a favôr di une sigurece che no fos parvence e par un lavorâ concret e sincîr di citadins e sorestants insiemi… Scomençant, ancjemò di frute, di vivandiere dai depuartâts passâts pe stazion dai trens ca di Udin te Ultime Vuere e finint come santule e come pioniere di une idee di borc citadin furlan di chest secul, miscliç armoniôs di tradizion e mondializazion, il ritrat di Francesca si presente a ducj propit tant che un model te societât civiche dal Udin dal dì di vuê. ‘Cuant che si è anzians no si à pôre e si è in dovê di salvâ la zoventût!’: cheste frase culì, proferide ai 2 di Otobur 2013 pe Fieste dai Nonos de Citât, inmaneade dal so tant stimât pre Tarcisio Bordignon, co la salût za i deve suspiet, e baste pardavêr par palesâ misure e prospetive dal personaç in cont dal so amôr pal prossim. Sul moment di un cumiât dal gjenar lis peraulis sigûr no bastin o no si cjatin, no son avonde, par fâi onôr a une tâl figure dal nestri Udin: mût di riverîle al è dome chel di cjapâle di spieli e di lâi daûr su chê strade istesse. ‘Duri al pezzo! Mai molâ!’ al jere il sproc di Francesca, che al jere ancjemò di puar so pari che jê i voleve tant ben. Sù alore, duncje, in particolâr i amîs dal Coordenament Citadin dal Borcde Stazion di Udin: ancjemò indevant, simpri, insiemi ducj cuancj, tal ricuart di chê “crete” – che le veve batiade une volte cussì, cun afiet, il Sindic – che tal nestri cjâf e je lade in cîl cumò a cjapâ puest framieç des stelis plui luminosis dal firmament de nestre citât”. Des rapresentancis movimentâls dal Fogolâr Civic si ricuardin in particolâr, in plui dai coordenadôrs furlan e sloven, prof. Alberto Travain e prof. David Bizjak, i banderârs di sezion siore Marisa Celotti, sâr Franco Dorigo, sâr Francesco Nicolettis, siore Luigina Pinzano e siore Jole Deana, e po il vessilîr gjenerâl sâr Gianfranco Passone.