MARTARS AI 25 DI NOVEMBAR 2014

Il prof. David Bizjak, linguist tolminot, academic di Cjaudistrie, fidelissim dal Moviment Civic Culturâl Alpin-Adriatic dal Fogolâr Civic e sostenidôr ferbint de “marilenghe”, al è ore presint il dean gnûf dal storic Circul Universitari Furlan de Academie dal Friûl, fradaie che in chescj ultins vincj agns si à butât fûr, lidrîs primarole e vuê rame nobile dal Moviment za fa menzonât, sul puartâ indevant juste ben la lenghe e la culture furlanis dutune cuntun fuart spirt civistic e euroregjonalistic mittel-european. Chest studiôs sloven, duncje, al cjape il puest dal prof. Alberto Travain, citadin di Udin, inventôr dal Circul e sô guide storiche, rivât insom di dîs agns di comant. Ve che dongje di Bizjak, che si à instalât sorestant di chê Clape ai 25 di Novembar 2014, te ricorence tradizionâl di Sante Catarine, cuntune cerimonie te Sale dai Ats di Palaç Antunin, a Udin, alì de Universitât, che tal 1994 chê Academie e je partide di là, a saran, cun funzions di prodean, il chimic Victor Tosoratti e, di cancelîr, il dot. Andrea Cantoni, contabil, compagnâts di cuatri conseîrs di presidence vâl a dî la prof.e Renata Capria D’Aronco (su la azion associazionistiche), sâr Pietro Maria Crestan (su la tradizion di azion studentescje), la prof.e Fulvia Romanello (su la azion scolastiche) e l’inz. Ennio Valdevit (su la tradizion di azion europeistiche-regjonalistiche). Par conseis sul maneç economic de Associazion si larà dilunc a metisi in mans dal fidât comercialist dot. Franco Gremese li che il dean discjadût Travain e il benemerit zovin ativist Francesco Nicolettis a jentraran tal senât de Socie. Chel istès prof. Travain, tal discors che al à fat di cumiât, al à contade sù in struc la storie de Clape che, di une posizion origjinarie di avanguardie, frontade suntune pretese ben resonade di citadinance in Friûl par lenghe e culture furlanis te vite dal teritori, sociâl e istituzionâl, si à cjatât a puartâ indevant, isolade e ridude parfin dentri di cierts zîrs furlanistons, la idee che al covente tornâ a implantâ un sens di citadinance di plante fûr, che al ameti, no dome proformis, lis identitâts storichis di un puest tal vivi locâl di sistemis nazionâi di chei vieris o aromai mondiâi. Su chest fat culì, il dean chel discjadût al à vût iniment i cetancj agns di impegn de Academie, dutune cul Fogolâr Civic, tal prudelâ iniziativis cul fin di tirâ sù un sens su chei ponts culì soredut tes scuelis e in mieç dai zovins. Il prof. Bizjak, presentant il so program, al à dit che il leam culturâl cul Moviment civistic-euroregjonalistic za dit al larà indevant e che e sarà grande disponibilitât a colaborâ cun altris istituzions e associazions prin di dut dal Friûl, de Slovenie e de Austrie. Pe ocasion a jerin diviersis rapresentancis de societât civîl e culturâl dal teritori chês dongje dal Circul e dal Moviment che si ju à menzonâts: de sorestanzie provinciâl udinese dal Istitût nazionâl talian dal Galon Turchin a chê dal Club UNESCO di Udin e a la priorie de Confraternite locâl dal Crist; de studiose dot.e Marisanta di Prampero de Carvalho al benefatôr pre Tarcisio Bordignon. Ancje il dean chel gnûf dal Coordenament Citadin dal Borc de Stazion di Udin, il primari dot. Fernando Luisi, al à partecipât a la ocasion. Lis delegazions dai cinc “cuintîrs” dal Fogolâr Civic – cui conseîrs movimentâi gjeom. Sergio Bertini, sâr Giuseppe Capoluongo, prof.e Renata Capria D’Aronco, siore Marisa Celotti, siore Jole Deana, sâr Francesco Nicolettis, tenôr Gianfranco Savorgnan e, tra i banderârs, siore Elvia Tosolini – a àn fat riverence, in finâl, cul inchin des lôr bandieris, sul moment tradizionâl de “cerimonie de gale” cussì clamade, là che il distintîf dal dean che al va sù juste ben si pontilu sul Confenon de Fradaie, at simbolic di un cjapâsi responsabilitât de gnove sorestanzie sociâl. Presint ancje il vessilîr gjenerâl sâr Gianfranco Passone, savi de Academie, cu la bandiere storiche aquileiese. De Associazion a jerin, duncje, i gnûfs dean e prodean, i conseîrs D’Aronco, Romanello e Valdevit, i trê savis e i controlôrs dot. Gianpietro Babuin e sâr Renato Chizzo.