MARTARS AI 27 DI ZENÂR 2015

Pe Zornade de Memorie, martars ai 27 di Zenâr 2015, un delegazion dal Moviment Civic Culturâl Alpin-Adriatic dal Fogolâr Civic, direzude dal so dean, prof. Alberto Travain, si à fermât a Udin li de Stazion dai trains devant de targhe dedicade a lis feminis furlanis che, sfidant cence armis il mat nazifassist, a àn socorût di scuindon i depuartâts che a passavin sui vagons destinâts ai cjamps di concentrament todescs. “Dutune cu la resistence armade di ogni colôr politic, chês feminis alì, chês fantacinis, di Udin e dal Friûl, tant che puare nestre Francesca De Marco, president mai dismenteât dal Coordenament Citadin dal Borc de Stazion di Udin, a àn riscatât de vergogne un popul par masse timp la plui part sometût di une tiranie disumane, nazionalistiche e razistiche: cul ricuardâ chês feminis il Fogolâr Civic ur fâs riverence, dongje di chês sinis che lis àn menadis vie a murî, ancje a dutis lis vitimis di une tragjedie dal Olocaust che sigûr e à ufindude la Umanitât e ancje ben antighis e compagn gloriosis tradizions dal lûc di armonie des diferencis!”. Cussì al à motivât il prof. Travain che te persecuzion dal diviers al à dit di no viodi sôl che une violazion dai dirits “universâi” dal Om cussì clamâts, ma ancje un atentât a grandis costumancis di civiltât di chel cûr gjeografic e di chê crosere culturâl de Europe che si concretin te regjon furlane.