MARTARS AI 29 DI DICEMBAR 2015

“Di Tomâs anglic a Beltram furlan insin a Oscar salvadorês e Pierpauli nestri”, di Thomas Becket a Bertrand de Saint Geniès fin a Oscar Romero e Pierpaolo Pasolini: diferents, estrems, dibatûts testemonis di une libertât e di une dignitât cuintricorint, int cul fiât di denunziâ ce che nol va, metûts dongje cun spirt laic intune memorie religjose e secolâr pandude tes formis de tradizion spirituâl europeane dominant, memorie slargjade a ducj “i precursôrs e i coparis defonts di un impegn di promozion e travuardie di umanitât e justizie”. Martars ai 29 di Dicembar 2015, si à ripetût, alì de glesie di Sant Jacum a Udin, lûc storic des memoreancis civichis, il presint anuâl di Moviment Civic Culturâl Alpin-Adriatic dal Fogolâr Civic e Circul Universitari Furlan de Academie dal Friûl, sot presidence dal prof. Alberto Travain, pai muarts de societât civîl di ogni ete e bande, te ricorence memoriâl che al è stât copât l’arcivescul medievâl inglês Tomâs di Cjantervuris, vignût sù par liende internazionâl e ancje spieli dal innomenât patriarcje-princip aquileiês Beltram di Sant Gjinês, natîf vascon e patron civic di Udin. Daûr de Sante Messe, dite di pre Luigi Zuliani, cun preieris par furlan, sloven, todesc e venit, lenghis di popul primariis storichis dal Friûl, lis bandieris di moviment e sezion dal Fogolâr Civic, rivoc dai cinc “cuintîrs” antîc o circoscrizions udinesis e furlanis dai timps dal Stât patriarcjâl di Aquilee, ur àn fat i onôrs ae cjare memorie di confradis, amîs e benemerits che no son plui, che ur è stât dedicât a chei un presint di rosis poiât li dal “Altâr dai Muarts” de tant benamade capele citadine. Dacjaaf des delegazions, i banderârs sociâi gjeom. Sergio Bertini (Cuintîr I: Udin “Marcjât Vieri” – Friûl Orientâl), siore Marisa Celotti (Cuintîr II: Udin “Aquilee” – Basse Furlane), sâr Gianfranco Savorgnan (Cuintîr III: Udin “Marcjât Gnûf” – Friûl Centrâl), siore Italina Della Schiava (Cuintîr IV: Udin “Glemone” – Alte Furlane), siore Jolanda Deana (Cuintîr V: Udin “Graçan” – Friûl Ocidentâl) in plui dal vessilîr gjenerâl sâr Gianfranco Passone.