A Udin al torne il Renc popolâr, assemblee storiche, mai superât spieli di democrazie partecipadore, che ur darà di gnûf diretementri vôs ai citadins municipâi. Martars ai 29 di Setembar 2015, te “Capitâl dal Friûl”, si à vivût un moment propit storic. “Autoriclamade” dal bas, che la iniziative le àn vude dôs fradaiis che a puartin indevant la tradizion civîl dal puest, vâl a dî il Moviment Civic Culturâl Alpin-Adriatic dal Fogolâr Civic e il Circul Universitari Furlan de Academie dal Friûl, si à tornade a dâ dongje, passâts 502 agns de volte de sô abolizion par cause di lotis internis furiosis, la assemblee di popul dal Comun di Udin ven a stâi chel Renc di partecipazion che costum al vûl che lu vedi pastanât juste il patriarcje medievâl di Aquilee Beltram di Saint Geniès, “Patron Civîl” de citât, che di fat la sô icone secolâr, vignude fûr de art dal pitôr Michele Ugo Galliussi e de ricamadore Antonietta Monzo Menossi, uficialmentri e à viert, puartade in sale di riunion, lis voris de adunance ospite dal Municipi cja de famose Loze dal Lionel. A rezi la imagjine dal Patriarcje fondadôr, partant, a son stâts i citadins Gianfranco Savorgnan, cjantant di oparis che al puarte il non de cjasade storiche campione dal Renc che al jere une volte, e Giuseppe Capoluongo, chel juste priôr di une des confraternitis plui vieris di Udin, che e je chê dal Crist. Popul, alore, “autoriclamât” e dut midiant di une propagande, inviade vie dal Fogolâr Civic diretementri sul teritori, cu pussibilitât di prescrivisi te assemblee, vierte cun ducj i dirits, si à clarît, nome che ai “citadins udinês scrits tes listis di votazion dal Comun, gjavâts chei tes istituzions votâts o ben nomenâts de politiche”. A chei citadins, al diseve il placât di clamade, in version bilengâl, par talian e furlan, ur sarès stât ricognossût titul tradizionâl di “proponi diret e votâ palês ogni sorte di istancis in cont dal guvier dal ben coletîf e ancje candidâsi e elei lôr rapresentants comuns che gjenerôs a ‘nt seguissin lis trafilis dentri des Aministrazions Publichis o cun altris sogjets destinataris”. Daûr dal plait di scree, ancje chel bilengâl, tignût dal dean des fradaiis promotoris vâl a dî il prof. Alberto Travain, discors sierât di cidine riverence par memorie dal prof. Adriano Ioan, caporion politic udinês muart di pôc, che al veve firmât tal 2013, dutune cul sindic candidât contrari, prof. Furio Honsell, l’impegn specific di sostignî une rinassince dal Renc locâl, ve che si à scomençât cu la presentazion di proponiments e domandaments popolârs, votâts daurman secont lis regulis de votazion palese, “more furlano”, che une volte za e usave tes cunvignis di Udin. Acetade, duncje, la propueste di organizazion dal dean Travain, par che si definissi un telâr provisori di cjariis, gjavadis de tradizion e purpûr rispuindint a bisugnis modernis; cjariis di dâ, con funzion anuâl, onorarie, ben libare e istès cuntun scuintri in pont di scjadince, par riorganizâ chê adunance storiche tal dì di vuê. Funzions di dean, organizativis, partant, la samblee jes à destinadis, ancje cul titul antîc di “camerarius” o “cameraro / cjamerâr”, ae prof.e Renata Capria D’Aronco. Compits, invezit, di garanzie ur son stâts assegnâts simpri al prof. Travain e al gjeom. Sergio Bertini, votâts cu la incarghe di “procuratores” o “procuratori / procuradôrs”. Di segretari che al documenti la vore de assemblee, cun tant di cualifiche di “cancellarius” o “cancelliere / cancelîr”, il congrès al à decidût di meti il dot. Carlo Alberto Lenoci. Po, la assemblee, pastanant sù circoscrizions eletorâls dutis sôs cjapant mani di une provisorie terminazion teritoriâl “per quinterios”, proponude dal prof. Travain e ispirade sul antîc sisteme di circoscrizions a spics cun borcs di centri e di perifarie metûts dongje, e à votât ancje trê “consiliarii” o “consiglieri / conseîrs” ven a dî la dot.e Maria Luisa Ranzato e lis sioris Jole Deana e Italina Della Schiava, cun funzion specifiche di svilupâ chel progjet di partecipazion dal Citadin. Ducj cuancj i elets a àn zurât, par talian e furlan, su pe icone dal Beltram, struc morâl de tradizion civîl di Udin. Ve che iI Renc rimodernât al à fat buine po la propueste di domandament simpri dal prof. Travain, indreçade a Sindic, Zonte e Consei dal Comun, juste ben par che si verifichin lis “strategjiis adotadis de Publiche Aministrazion udinese par evitâ il câs che il personâl burocratic al puedi intercalâsi tant che negatîf divisori framieç di citadins e lôr rapresentants elets”. La assemblee e à cjapât sù ancje la segnalazion de siore Mirella Valzacchi, destinade ai sorestants di Udin ma ancjemò prin, par competence, ae Regjon e ae SAF, sui “facii fastidis in particolâr par viei e par pidimentâts par colpe des condizions plui di dut di guide e di pratiche dai autobus citadins che ju puartin a sei cussì no da râr une sorte di bariere architetoniche di sghindâ”. Compagn la cunvigne e à ametût la richieste dal dot. Lenoci, di controi ma seris par podê fâi cuintri ae ocupazion indebite dai parcs di rotabii destinâts pai disabii. In finâl di riunion e à fevelât la dot.e Marisanta de Carvalho di Prampero, puartevôs storiche in Consei comunâl dal moviment di popul che al à promovude la proclamazion par Patron Civîl dal patriarcje-princip pari dal Renc, che di citadine ur à pandût l’agrât a Fogolâr Civic e Academie dal Friûl par vie dal lôr gjenerôs impegn dedicât a fâ in mût che chê antighe adunance de citât in zornade di vuê e puedi pardabon rionzisi.
PLAIT di scree dal RENC citadin rignuvît di Udin,
tignût dal Dean dal Moviment Civic Culturâl Alpin-Adriatic “Fogolâr Civic”
e dal Circul Universitari Furlan “Academie dal Friûl”,
prof. Alberto Travain
Citadins!
“…Si riducono a loro piacere in luoghi loro particolari, ne’ quali intervengono cittadini d’ogni conditione, in grosso numero, senza non solo che vi assista alcun pubblico rappresentante, ma neanco ne habbi alcuna scienza il Luogotenente di Vostra Serenità”: di chest spirt di libertât e partecipazion de int culì di Udin che al deve tant suspiet une volte i sorestants di Vignesie compagns di chel che al à vût scrit chestis dôs riis al Dôs, ve che e nas la idee che o sin ca vuê par chel. Tornâ a clamâ dongje o ancjemò miôr tornâ a dâsi dongje come Renc de citât, dal bas, di cjâf nestri, tant che la assemblee storiche di partecipazion dal popul di Udin che la tradizion e dîs che le à vude impastanade tal 1340 il patriarcje di Aquilee Beltram, che, compagn di Clistene tal Atenis dai timps dal Antîc, al varès tirâts dongje, intropâts e ametûts a votâ citadins di ogni nivel sociâl, par garanzie cuintri dal predomini malôs di crimis particolârs; istituzion massime di partecipazion te storie citadine, che ogni an si unive la dì di Sant Michêl, par disponi dal guvier dal public e votâ rapresentants che a fasessin la volontât popolâr. Chê assemblee le àn gjavade che a son ve cumò 502 agns, juste par garanzie, che al è il colm, incuintri dal predomini di crimis malosis, che a son ladis sù al lôr puest, altri colm, sioriis no miôr di chês che a jerin prin. Il popul di Udin al à vût indaûr e un tic superât i dirits politics pierdûts in chê volte sôl tal 1946, co sudits e suditis di Italie insiemit pe prime volte a àn votât l’implant juste di une republiche. Chei dirits ju vevin gjavâts ma par tancj secui a àn condurât, sot vie, tes memoriis dal puest, sapulidis sot vêi di polvar e di cjalin dabon simpri plui pençs avodâts a dismentie. Che lis vin propit discjoltis di li, nô dal moviment dal Fogolâr Civic, ancjemò dal 1989. E un tant lu vin fat no par vie che no vedin nuie altri ce fâ, tant che nus à fat, infeliç, notâ un element di rivuart de nostrane “famiglia di Palazzo”, ven a stâi dai fameis dal Comun. E un tant lu vin fat no par rivocâ nome, “no par rivivi ma rivificâ”: ve che o cjol lis peraulis di un biel resonâ dal sindic prof. Honsell che si riferive, ai 9 di Dicembar dal an passât, ae ativitât civiche-culturâl dal nestri Fogolâr. Rivificâ. Rivificâ, tornâ a soluzions che la nestre storie e à sperimentât cul cirî di dâ une rispueste a problemis e domandaments che a son di ogni timp. Pretindi e difindi il dirit di contâ su lis decisions dal propri destin di persone e di popul. “Un popolo che conta in una città che conta”: ve un sproc che al piture in ristret ce che e je la identitât storiche-civiche di Udin, puartât di bandiere dal moviment nestri e rivât e fat bon li de sorestanzie di chenti midiant dal ce biel Document di Prampero de Carvalho che tal 2001 si à otignût cun chel la proclamazion fûr dal ordenari, in Consei comunâl, dal Patriarcje Beltram, fondadôr dal Renc, par Patron Civîl juste dal municipi. Ai 17 di Avrîl 2013, candidâts sindic, ancje chei che dopo a son lâts a balotazion, che al vûl dî i professôrs Honsell e Ioan, sot votazions, alì de fontane di Place Sant Jacum, a àn vût firmât un capitolât di domadaments popolârs che ur al à presentât il Fogolâr Civic dulà che, il prin cjanul, cul titul “DEMOCRAZIA PARTECIPATIVA: RIFONDARE L’ARENGO CINQUECENTO ANNI DOPO LA SUA ABOLIZIONE”, al previodeve un cjapaa sù l’impegn a “sviluppare periodiche pratiche di partecipazione civica collegiale autodeterminata, propositiva e deliberativa quantunque giuridicamente non vincolante, da integrarsi nell’ordinamento municipale, ‘tant a dî tornâ a vê une ponte di ce che al jere il Renc citadin pastanât dal Patriarcje Beltram e abulît cinccent agns indaûr’”. Ve che il sindic Honsell, par vie uficiâl, ai 30 di Setembar 2013, al à memoreât in Consei comunâl il V centenari di cuant che al è stât butât jù chel Renc de citât cui dirits primarûi dal popul di Udin in pont di democrazie, ancje ben onorant chel cenacul civic che a’nt fâs rivoc te memorie e compagn te cussience publichis. Po ben vuê, devant almancul di ce che si intaie par une mancjance di iniziative de sorestanzie su chel troi alì, ve che il Fogolâr Civic, ospit dal Sindic culì te Cjase dai Citadins, al torne, duncje, a vierzi une pagjine plene di polvar di une storie antighe e gloriose di democrazie e partecipazion che ducj nô, di Udin ore presint, o sin clamâts a dâi un avignî!
In ricuart dal prof. Ioan nomenât cumò devant, che al è muart di pôc e che insiemit cul Sindic di vuê, si à za dit, al à volût firmâ l’intenzion di meti sigûr in zornade ce che al è stât juste il Renc di Udin, ve che o domandi di dedicâi, che si vierç la assemblee, un minût di cidin par onôr di memorie.