MARTARS AI 9 DI DICEMBAR 2014

Il Moviment Civic Culturâl Alpin-Adriatic dal Fogolâr Civic e il Circul Universitari Furlan de Academie dal Friûl a àn rignuvît di fieste spontanie dal sens di comunitât e di braure civiche regjonâl la ricorence significative de Pretension de Contadinance dal Friûl (9 di Dicembar 1503), inovâl che si à concepide une istituzion che e je stade implant fûr dal ordenari di control di popul sul guvier dal teritori, particolâr svant e contribût locâl te storie universâl de democrazie. Chês dôs Fradaiis, che a àn tradizion aromai, a àn fat fieste par chê date storiche cuntun presint pe mature civiche cul regâl di un façolet di bon auguri, opare de artiste Roberta Masetti, ufierte libare dai citadins, destinât a une delegazion di coscrits di Udin e dal Friûl, mot di sperance e afidament comunitari a chê zoventût che tal so sens civic al sta l’avignî di ogni cunvigne civîl e umane. La cerimonie e je stade te capitâl furlane, alì de Sale dai Matrimonis di chê istesse Loze dal Lionel che 511 agns indaûr e veve dât ricet a lis delegazions di popul vignudis indevant cu la storiche pretension di un cuintri-parlament civic regjonâl sostignût de citât di Udin, che e jere in chê volte capitâl politiche pardabon de fazion popolâr dal Friûl comandade di un ram de cjasade dai Savorgnans. “Il vuestri nol è nome che un rivivi ma un vivificâ la memorie storiche”: cheste e je stade la note di stime pandude dal sindic prof. Furio Honsell a chês dôs Organizazions, che ur à rinovât la ospitalitât de Sorestanzie comunâl par chel curiôs câs celebratîf, rivoc des gloriis de capitâl de Piçule Patrie. Il Prin Citadin al à, duncje, dit graciis a Fogolâr Civic e Academie dal Friûl pal contribût tal inzornâ in vuê la liende di une complicade storie civîl che e à implicât in Friûl “no nome une promiedie vôs in cjapitul dal Tierç Stât te rapresentance dal teritori – al à vût iniment Honsell – ma ancje formis gnovis di belance dai podês midiant di chel ciert cuintri-parlament de Contadinance”. “I Furlans – al à dit, di prionte, il Sindic – a àn un sens fuart des Istituzions, ma la lôr adesion no je mai cence critiche. Chel tant discuti che o ai fat câs dispès, cul fâ il Sorestant te tiere furlane, valôr impuartant alì che nol mene nome che a egoistichis divisions, o crôt che al sprofondi lis sôs lidrîs in cheste turbolente, vivarose Storie che e influìs ancjemò ben e no mâl in zornade di vuê”. A non de Citât, Honsell ur à fat, po daspò, i siei auguris chei miôr a chei cinc di Udin di disevot agns – cinc tant che i cuintîrs citadins di une volte – e al coscrit di paîs, rivât chest an dal Friûl “di là da la Aghe”. Daûr dal salût fat cul cûr, ai coscrits, dal president provinciâl udinês dal Istitût nazionâl talian dal Galon Turchin jenfri decorâts al valôr militâr, gjeom. Sergio Bertini, che “prin di dut di nono” ju à clamâts a plui responsabilitât tal curâ la istituzion de famee, di particolâr concretece al è stât il plait civîl dal prof. Alberto Travain, coordenadôr dal Fogolâr Civic, discors tignût in lenghe furlane, par onôr de Mari Aquilee e de liende storiche di une Furlanetât ristret di Europe e di Marimont. “O sin culì a strolegâ in ben pal avignî de nestre comunitât ricuardant gloriosis pretensions di un volte, di vee vôs in cjapitul e di vee sot control come popul il guvier dal teritori, indulà che in dì di vuê, juste propit cul non di une democrazie strambide, si fâs abûs di ogni libertât par parâ capriçs dal privât che a talpassin cence padin personis, fameis, scuelis, ativitâts e ancje Istituzions. Une societât di chê fate culì e je dabon un pericul pe democrazie che di chê, cun di fat, e je un straviament degradât e sigûr cence sintiment. Di un tant si à ben di fâ un calcul tal inzornâ e tal testemoneâ il câs de Contadinance dal Friûl a la zoventût che e ven sù cumò” al à cjalcjât Travain batint su la dibisugne grande di inviulâ un madressi civîl des cussiencis e un sens di Stât “no ministri dal capriç dai singui, ma tramontane de comunitât”. “No stait mai rinunziâ ai siums” ur à di Travain a chei zovins alì, che a son rivâts dongje ancje coscrits di agns prin: “se no son siums no son nancje progjets e, duncje, nol è spazi par tirâ sù un avignî di miôr”. Pandude la dediche, lete dal zovin Francesco Nicolettis tant che conseîr dal Fogolâr Civic su la zoventût, si ur à consegnât ai coscrits, compagnâts dal conseîr movimentâl sâr Eugenio Pidutti, i façolets menzonâts di bon auguri e li e je stade la riverence cerimoniâl des bandieris associativis. Dai fantats, po daspò, a àn fevelât Isabella Masutti, zovine udinese impegnade une vore tal sociâl, che e à pandût particolâr agrât al prof. Travain pai siei rimarcs su une volte e cumò, soredut pai riferiments a la capacitât di vê siums, e po Francesco Ros di Travês, autôr di une “Costituzion Europeane” che e à vût il laut dal President dal Europarlament, di chel de Republiche taliane e dal Vatican, coscrit di ferbinte passion civîl che, tal esprimi la sô gratitudin pal presint ricevût, al à ribatût un apel ai zovins a impegnâsi a riformâ in ben il sens civic e la politiche. In finâl, a son stâts i auguris di pre Tarcisio Bordignon, benemerit, valent e “discomut” predi furlan, “capelan” sociâl dal Fogolâr Civic, che al à clamade la zoventût a “no vivi di muarts” vâl a dî a no strassâ ma a sei splendits tal spindi ognidun la sô vite intun fâ dal ben par se e par chei altris che mai nol clopi. Tes delegazions dal Moviment a jerin ancje i conseîrs gjeom. Sergio Bertini, sâr Giuseppe Capoluongo, siore Marisa Celotti, siore Jole Deana, sâr Francesco Nicolettis, sâr Eugenio Pidutti, tenôr Gianfranco Savorgnan, il banderâr siore Elvia Tosolini e il vessilîr gjenerâl sâr Gianfranco Passone. Subit daûr de tradizionâl fotografie su pe scjale di tramontan de Loze dal Lionel che e da su Marcjât Vieri, imbandierade cul grant tricolôr civic furlan e european, al è stât il brindis usuâl de classe coscrite li dal Bar Savio di Place dai Grans, ridot public dal Fogolâr Civic te citât di Udin.