MIERCUS AI 14 DI ZENÂR 2015

“Contulit multis populis salutem…”: “Ur à puartât a tancj popui bonstâ…” al dîs il cjant dal Beât Durì dal Friûl o di Pordenon, che lis sôs notis a àn risunât a Udin li de glesie dal Carmin, là che al è sapulît, co e je stade la Sante Messe par sô memorie cul arcivescul bons. Andrea Bruno Mazzocato, sorestants e popul di dute la regjon, celebrazion stade juste miercus ai 14 di Zenâr 2015. Un invît particolâr i à rivât ancje al dean dal Moviment Civic Culturâl Alpin-Adriatic dal Fogolâr Civic, prof. Alberto Travain, che agns indaûr si jere messedât par puartâ indevant, cul Coordenament Citadin dal Borc de Stazion di Udin, un inzornament te societât locâl de maniere di viodi chel Frari Durì e ancje ben il mes “laic” dal so agjì tant che missionari european medievâl tal Lontan Orient. “Cul detâ lis sôs memoriis – al à motivât il prof. Travain, lât a messe puartantsi daûr une delegazion movimentâl – Durì al à rispuindût sigûr a lis curiositâts dal Ocident in cont dal Orient tant ‘favolôs’, ma al è restât simpri salt su la sô fe e su la sô civiltât che al à cirût di sparniçâlis, di ce che al à podût, insedantlis tes culturis nativis des contradis chês plui lontanis dulà che al è stât: il so fin nol jere chel ‘globalizâ’ il Continent Vieri ma di difondi la sô religjon par ogni cjanton di mont. In cont di chest al è sul seri ce pensâ, ancje par evitâ ciertis facilis bufulis mondialistichis!”.