MIERCUS AI 15 DI ZENÂR 2014

“Pari Sant, che si indegni di benedî cheste bandiere culì, de metropul furlane antighe di Aquilee che par passe mil agns e à metût adun tal rispiet gjeniis diferentis su la crosere de Europe latine, gjermaniche e slave, e compagn che si indegni di ricevi cheste letare ca di int dal popul che chei principis e vûl testemoneâju e puartâju indevant”: ve ce che i à dit a Pape Checo il benemerit pre Tarcisio Bordignon in Place Sant Pieri a Rome intant de Udience Gjenerâl di miercus ai 15 di Zenâr 2014. Il Pape, bussade la man – juste une ecezion – al vecjo plevan, al à benedide la bandiere turchine cu la acuile di Aquilee e dal Friûl, segnâl storic di unitât te varietât sul incrôs dal Continent Vieri, che je vevin mandade jù il Moviment Civic Culturâl Alpin-Adriatic dal Fogolâr Civic e il Circul Universitari Furlan de Academie dal Friûl sot dal lôr dean prof. Alberto Travain, fradaiis che al à ricevût di persone di chês ancje ben une letare (par latin, furlan e talian), cu la firme di un centenâr di lôr e l’invît a inviulâ la figure dal patriarcje di Aquilee Beltram di Saint Geniès par simbul o patron civic comun, “euroregjonâl”, dai popui de Mittel-Europe dâts dongje une volte de capitâl religjose e civîl di Aquilee. La ocasion e je stade chê di une preseade iniziative de innomenade Scuele “Ricami & Legami” di Udin, direzude de siore Antonietta Monzo Menossi, ricamadore famose e puartebandiere di chê art ator par dute la Italie, che i à puartât a Pape Checo un “pali” particolâr, parament liturgjic rivoc dal Bon Pastôr, destinât a patriarcjis e papis, ricamât tal specific cul “Pont Aquilee”, inventât de Menossi ispirade dai furniments e tassei dai mosaics de grande basiliche aquileiese. Ve daûr culì il test de letare di Fogolâr Civic e Academie dal Friûl consegnade a Pape Checo. “‘FIDELES ET CIVES ALPINAE ADRIATICAE EUROPAEAE REGIONIS AD SUMMUM ROMANUM PONTIFICEM. SANCTE PATER, SALVE! NOS FIDELES ET CIVES EUROPAEAE REGIONIS ALPINAE ADRIATICAE A TE PETIMUS UT BEATUS BERTRANDUS (1260†1350), AQUILEIENSIS PATRIARCHA MARTYR PRO DEFENSIONE POPULI SUI CONTRA TYRANNIDEM MAIORUM LOCI, CREETUR PATRONUS CIVIUM COMMUNIS TERRARUM ANTIQUAE AQUILEIAE METROPOLIS. POPULARES LITTERAE MISSAE SUNT AD INVESTIGANDUM SENSUM COMMUNEM EUROPAEAE REGIONIS ALPINAE ADRIATICAE RECTORUM ECCLESIARUM CATHOLICARUM ADRIENSIS-RHODIGIENSIS, BAUZANENSIS-BRIXINENSIS, BELLUNENSIS-FELTRENSIS, CLODIENSIS, COMENSIS, CONCORDIENSIS-PORTUSNAONENSIS, FLUMINENSIS, GORITIENSIS, GURCENSIS, IUSTINOPOLITANAE, LABACENSIS, MANTUANAE, MARIBORENSIS, MONACENSIS-FRISINGENSIS, ARENTINAE-POLENSIS, PATAVINAE, TARVISINAE, TERGESTINAE, TRIDENTINAE, SALISBURGENSIS, STRIGONENSIS-BUDAPESTINENSIS, UTINENSIS, VEGLENSIS, VENETIARUM, VERONENSIS, VESZPRIMIENSIS, VICENTINAE, VICTORIENSIS VENETORUM, VINDOBONENSIS, ZAGREBIENSIS. PRO INTENTIONE ET HUMANITATE AGIMUS GRATIAS MAXIME PASTORIBUS GURCENSI, MARIBORENSI, SALISBURGENSI, VENETIARUM ATQUE VERONENSI. SANCTE PATER, EXAUDI ILLOS QUI TRIBUUNT OBSEQUIUM SPECIEBUS CONFIRMATIS. ANNO DOMINI MMVI, DIE DOMINICO XI MENSIS IUNII, IN ECCLESIA UTINENSI SANCTI CHRISTOPHORI, SACELLO UNIVERSITATIS STUDIORUM FORI IULII, ET IN SEDIBUS PUBLICIS MOTUS CIVICI ALPINI ADRIATICI GORITIA ET UTINO, URBIBUS SORORIBUS AQUILEIAE FILIIS, ADRIAE ALPINAE MATRIS’. Al bon Pape di Rome FRANCESC / Cantin: Beât Beltram di Aquilee, patron civic euroregjonâl alpin-adriatic. / Pari Sant, si à culì inniment a Lui di persone chel domandament di popul achì parsore, presentât tal 2006 za cja’ di Sant Pieri des fradaiis furlanis che a son ca che I scrivin a pro che si ricognossi, di patron civic de bande di Europe metude dongje une volte de Glesie metropolitiche di Aquilee, chel Beât Beltram di Saint Geniès (1260†1350), patriarcje-princip e martar aquileiês, di riunde ocitane francese, liende storiche dal bon sorestant su la crosere europeane ladine, sclave, todescje e ongjare, vieli e pûr stombli simpri ferbint, framieç de sô int, di progrès sui principis, su la culture, su la economie, su la societât, su la politiche e la comunitât, santul dai sempliçs e scorie pai prepotents oltri che lôr vitime a cost de vite. Fat beât tal 1760 e proclamât di pôc, di ecezion, patron laic, tal 2001 cun at dal Consei comunâl di Udin, capitâl ultime dal Patriarcjât di Aquilee che al è stât, cumò la sperance è je che ancje la Glesie e sepi dabon meti in valôr jentri la int di vuê chel so fi benemerit passât parmieç dal tamês de liende tant che riclam a principis di societât e di comunitât insedâts te storie e te culture di un cûr antigon dal Continent Vieri. Promovi il Beât Beltram patron civic comun di chei popui che, rindûts fradis tal segn de Crôs de metropul di Aquilee jù pai secui, si son sbudielâts cent agns indaûr ai timps de Prime Vuere, al pues sei un pas sincîr e concret sul troi che al mene a meti dongje une anime europeane che intune cierte storie passade e cjate lidrîs di ideâi ben profondis e sigûr linfe sane pal avignî. Che il Signôr Lu conservi! FOGOLÂR CIVIC – ACADEMIE DAL FRIÛL / Udin, 8.I.2014 (si zontin un centinâr di firmis di citadins)”.