MIERCUS AI 19 DI AVOST 2015

“O capìs che contrastâ i alpins o chei che a àn fat l’alpin ca di nô par tancj e pues someâ une blesteme – nancje che la storie furlane, venite e trentine e podès ridusisi nome a la liende purpûr gloriose di un cuarp dal esercit talian! – ma ancje ben a cost di sei antipatic, te part di dean dal Moviment Civic Culturâl Alpin-Adriatic dal Fogolâr Civic, promotôr aduncje di culture civiche di recuperâle e miorâle partint propit di cheste nestre crosere di Europe, no pues daûr tuart a chel frari o a ben chel vescul di Vitori che al varès ve cumò di resint condizionât la leture in glesie de purpûr comutive ‘preghiera dell’alpino’ cuntune modifiche – disìn – di ciets sprocs calcolâts di vuerescs. E je ore passade che la Glesie e finissi di tolerâ e duncje di acetâ e di fat di poiâ la culture de vuere. Par vie secolâr o larìn dilunc po sigûr a combati, ma no stin a pretindi che Diu al benedissi lis nestris armis cemût che o vin fat falopant par milenis e mighe da râr cu la aprovazion dai nestris sorestants gleseastics. Un tant si professe in barbe des tradizions – che distès si vuardeilis, ma in clâf secolâr – dal nestris gloriôs Patriarcjât di Aquilee che i siei vescui in plui dal pastorâl a dopravin ancje ben la spade. Par dîle fûr dai dincj, al risulte dificil, par altri, capî se ciertis associazions di arme militâr a ricuardin i lôr muarts cu la juste asse viers des tantis malandretis vueris che a son stadis e condanant ducj chei sticeboris che a àn mandade tante zoventût a murî e a copâ ‘par difindi la patrie’, a disevin, dispès ancje in tiere foreste, o ben se si ridusin a sotan vie a celebrâ un dovê nome che vuarp, un ubidî vuarp a Istituzions dut fûr che sacradis e par nuie infalibilis: une celebrazion che in se no somee par nuie scuele di cussience critiche costrutive, di sens civic di partecipazion, di amôr vêr di patrie nassût spontani. Noaltris, dal Fogolâr Civic – mighe no pal fat che o sin i plui brâfs – o cirìn prin di dut ve cumò e simpri plui di invalorî l”amôr di patrie naturâl’ – ‘l’om che al combat pe Patrie, pai fruz, pe chiase sò’ e cjante une antighe balade furlane – vâl a dî la difese de proprie tiere, dai propris ‘fogolârs’, de patrie chê vere, concrete, reâl, dai afiets chei spontanis, no chê des cjacaris impastanadis dai sorestants. Une ocasion, duncje, par resonâ libars di schemis imponudis o ben acetadis…”. Ve ca il coment dal udinês prof. Alberto Travain, dean dal Moviment Civic Culturâl Alpin-Adriatic dal Fogolâr Civic in cont des polemichis discjadenadis dal câs sucedût a une cerimonie pe Fieste de Sunte li dal Pas di San Polt.