MIERCUS AI 19 DI MARÇ 2014

ll Moviment Civic Culturâl Alpin-Adriatic dal Fogolâr Civic e il Circul Universitari Furlan de Academie dal Friûl, sot direzion dal prof. Alberto Travain, a àn rignuvide la lôr tradizion di meti jù une rose alì dai gatars des presons dal Cjistiel di Udin, costum inviât di chês sociis alì tal 1997 par memoreâ ducj chei che tai secui, a cavalot des Alps di Jevât, a àn mostrât, juste a cost de vite, di sei tacâts pardabon a une patrie regjonâl cûr storic de Mittel-Europe, un tant tal inovâl che i àn taiât il cjâf a Marc di Murùs, ultin banderâr dal principât di Aquilee di une volte, puartebandiere dal standart chel famôs cu la acuile, discjavaçât propit in chê galere ai 19 di Març 1421 che no si jere pleât al domini di Vignesie. Tra chei “martars de patrie aquileiese”, tra chei patriots regjonâi o “euroregjonâi” ante litteram – stant che chê e jere la misure, internazionâl, di ca e di là des monts, dal Stât patriarcjâl di Aquilee – chest an culì si à volût ricuardâ, in particolâr, juste pai cinccent agns che al è stât condanât a murî, chel pre Bortul di Mortean, che te Rinassince al veve cirût di tornâ a meti sù il patriarcjât politic aquileiês parant fûr dal Friûl l’invasôr venezian cul jutori des armis asburgjichis. Al ricuart a jerin ancje l’assessôr dot. Enrico Pizza, rapresentant dai sorestants comunâi di Udin, capitâl ultime dal Patriarcjât, e il Diretôr dai Museus citadins, dot. Marco Biscione.