MIERCUS AI 23 DI AVRÎL 2014

In decenâi di ativitât a pro di une riscuvierte e di un increment des identitâts di comunitât storichis de capitâl furlane, miercus ai 23 di Avrîl 2014, la dì di Sant Zorç, a Udin, il Moviment Civic Culturâl Alpin-Adriatic dal Fogolâr Civic e il Circul Universitari Furlan de Academie dal Friûl, cun dean il prof. Alberto Travain, a àn volût fâ fieste in clâf secolâr pal tradizionâl patron dal vecjon suburbi disot bande a mont de citât, cul ricuardâ la sô storie dutune cun chê dai cuartîrs siei di riferiment comunâi vie pai timps. Un tant al è stât su la prime place de vile di Graçan, li che al è ancjemò il cjasament de glesie di Sant Zorç primarole e la sede de antighe Fradaie cul so non. Daûr di vê piturade la storie de comunitât citadine di borc jenfri dal Cormôr e de Roie di Palme, cun carateristichis autonomiis di milante agns e une vite sociâl e politiche ancje tant vivarose, il prof. Travain al à ricuardade la origjin de particolâr devozion locâl par Sant Zorç, che e somearès robe langobarde, e la tradizion, par dongje di chê, dal dragon-crot, che e ven fûr di li la nomee di “Crotârs” (derivade di “crot” vâl a dî, par furlan, scliçote) che a àn simpri vude chei di chel borc. “Fâi fieste secolâr al storic sant protetôr di un cuartîr citadin nol vûl mighe dî contestâ la sô tradizionâl fieste religjose, ma ben – al à rimarcât Travain, che al à fate la comemorazion dute pal furlan di Udin, variazion di citât de lenghe antigone naturâl de regjon – si tratarès di tirâ dongje la int ogni sorte ator di un simbul di comunion intune societât secolâr cetant o almancul un grum plui variade in pont di crodincis. Si che i simbui religjôs che a univin la comunitât cuant che la religjon e jere une par ducj o scuasit no si à di butâju o di bandonâju, ma recuperâju in clâf secolâr intun sens interculturâl, tant che in ogni câs rapresentatîfs di principis universâi che a metin adun, ben inlidrisâts te vicende dal teritori. Cuistâur sul front culturâl ai Sants Protetôrs di une volte une figure secolâr autonome di mût che a puedin ancjemò sei un riferiment di comunitât intune societât simpri plui variade: un tant si augurisi”. Lete la “canzonete” dal Sietcent in cont dal “crot di Grizan”, bocon di epiche locâl di popul che al conte lis impresis dal Sant cavalîr, l’incuintri sociâl si è sierât cuntun prindis che nol mancje mai sot de carateristiche loze de storiche ostarie “Al Marinaio”, che e da su la place viere che e jere une volte il cûr dal Comun vilan di Graçan e des sôs pertignincis. In plui de delegazion borghesane dal Fogolâr Civic cu tant di bandiere, a àn partecipât a la ocasion ancje int e rapresentancis de societât civîl citadine, ducj rivâts dongje par fâi onôr secolâr al simbul dal cavalîr difensôr dai debui. Il moment dal convivi al è stât organizât in particolâr in graciis de colaborazion dal ativist movimentâl gjeom. Sergio Bertini.

Precedente MERCOLEDÌ 23 DI APRILE 2014 Successivo GIOVEDÌ 24 APRILE 2014