MIERCUS AI 23 DI DICEMBAR 2015

“E je stade une anade no propite des miôr: la crisi che e continue a fâ il so cors, l’Orient di Mieç che al è dut une scjarnete, la Union Europeane che no rive a jessi unide e tantis altris robis a stan fasint sierâ l’an cuntun aiar di avilizion e pôre. Pôre che no je mai stade une buine guide! Di chê altre bande il Fogolâr Civic al à otignût dai sucès storics! I doi che plui mi stan sul cûr a son la icone dal Beât (Beltram) picjade tal Palaç dal Comun di Udin e la prime riunion, dopo secui, dal Renc! Magari a un che al cjale cun voi forescj a puedin someâ robis di pôc, di nuie, ma Diu nome al sa trop lavôr, pazience e sacrificis che a son stâts”. Al à doprât lis peraulis di un mes di auguris apassionât in lenghe furlane rivât de Anglie e scrit di Francesco Nicolettis, zovin confradi cetant valent, il prof. Alberto Travain, dean dal Moviment Civic Culturâl Alpin-Adriatic dal Fogolâr Civic e ancje dal Circul Universitari Furlan de Academie dal Friûl, te sô resonade conclusionâl su la ativitât dal 2015, al prindis sociâl chel prin di Nadâl stât miercus ai 23 di Dicembar dulà che al jere l’ospedâl storic citadin di Sante Marie de Misericordie dai Batûts a Udin, alì dal Bar Savio in Place dai Grans. “Il fin dal Fogolâr Civic al è chel di condurâ te libare testemoneance di volê tornâ a tirâ fûr e inzornâ la dignitât dal Citadin sul teritori: condurâ mutatis mutandis – al à motivât Travain – tignint impiade chê piçule lum che la sô flamute e puedi ben sei rigjitât di passâle a chei ‘iluminâts’ des gjenerazions a vignî. A son zire e volte 30 agns che, mastins e simpri cun gnovitâts, o condurìn salts, impegnâts, dignitôs. Preseâts amîs, colaborants, seguaçs, us stimi e us ringrazii ducj cuancj. L’Alt che nus tegni la man sul cjâf e nus tegni sù ancje juste doman, no pai nestris merits ma par increment dai princips che ur crodìn!”. Il cuarp sociâl al à cuintricambiât la ricognossince, la stime e i auguris al so dean midiant di un salût pandût par ducj dal tenôr Gianfranco Savorgnan, conseîr-banderâr dal Tierç Cuintîr movimentâl dal Friûl di Mieç che su chel si à zontât la colaborante siore Italina Della Schiava cuntun biel presint in poesie.