MIERCUS AI 24 DI JUGN 2015

Cun adesion libare al flash mob culturâl internazionâl inviulât de innomenade artiste furlane Roberta Masetti tal intent di rionzi tradizions e memoriis de Furlanie in cont dal inovâl di Sant Zuan Batiste, riferidis aes fiestis antighis di solstizi romanis di Ianus e Fortune e aes lôr cusuvrinis de Europe celtiche, il Moviment Civic Culturâl Alpin-Adriatic dal Fogolâr Civic, in colaborazion cul Circul Universitari Furlan de Academie dal Friûl e in cunvigne cul Club UNESCO di Udin, dutun sul puest cul Bar Savio, in plui di celebrâ chê scjadince di lunari te culture civîl de regjon cuntune civiche deposizion di rosis (“Mac di Sant Zuan”) alì de statue plaçarole di Ercul (“Florean”) a Udin ai 23 di Jugn 2015, vilie dal aniversari dai 1777 agns de vitorie di popul plui magnificade de storie furlane vâl a dî la resistence mastine de citât di Aquilee dal 238 cuintri de armade imperiâl romane, un tant cul jutori dal mitic diu celtic-carnic Belin, divinitât dal Soreli, al à volût, po daûr, inzornâ chel costum antigon des premonizions che si disii la “barcje di Sant Zuan”, destinât une volte ai pronostics de fantatis di maridâ in pont des sperancis di continuazion de stirpe e vuê mot tradizionâl neutri che chel Moviment li al à volût tornâ a leilu intune clâf civistiche vierte, tant chê bon auguri pe comunitât. Ve mo inalore che al Bar Savio di Udin, ridot public dal Fogolâr Civic su la storiche “Place dai Grans” che ancje chei une volte la int ju doprave par strolegâ, si à metût sù un “laboratori” pratic par rinovâi ae popolazion lis proceduris par fâ chês “barcjis di Sant Zuan” che si à ca iniment, strolighets tradizionâi antîcs fats cul blanc dal ûf che a son carateristics de ricorence di Sant Zuan Batiste. A direzi chel strani rituâl, il gjerent di chel nomenât ambient, vâl a dî la dot.e Daniela Michieli, judât dal personâl e dai confradis dal “Fogolâr” cul lôr dean prof. Alberto Travain. Passade un gnot fûr tal aiar – la “gnot di Sant Zuan”, co, daûr de crodince, il sanc dal Batiste al cole jù sul mont stramudât in rosade – sot dal clâr di lune, intun veri jemplât di aghe, il blanc dal ûf, in cjase di tancj che a àn volût provâle chê esperience particolâr, al à cjapât forme di nâf, galeon o velîr, juste robe di flabe, formis sieltis e fotografadis la dì dopo, simpri li dal Bar Savio, in cercje di imagjinis di incjant. E mighe nol baste. Ai 24 di Jugn 2015, la dì istesse di Sant Zuan Batiste, une delegazion dal Fogolâr Civic e je lade a Gurize, no sôl par fâ fieste pal inovâl dai 805 agns di fondazion citadine, ma ancje par ricuardâ lis particolârs tradizions dal puest pe dì di chel Sant: dal stramp strolighets sui agns ancjemò di vivi a base di “sioris” ven a stâi di “popcorn” ae incoronazion cu lis rosis des statuis di Sant Zuan Nepomuc che a son che vuardin i puints di là des muris de citât storiche!