MIERCUS AI 24 DI JUGN 2015

“No sin vignûts par imponi une identitât cuintri di chê altre, ma par dî che si scuen ben cusîlis dutis partint dal bas, che, se no, no si pues nancje presentâsi par une comunitât regjonâl!”: in chestis peraulis dal prof. Alberto Travain, udinês, dean dal Moviment Civic Culturâl Alpin-Adriatic dal Fogolâr Civic, ve mo duncje in struc il spirt de zimulazion intraregjonâl di iniziative di popul tra lis capitâls provinciâls di Gurize e Udin, inviulât di chê clape e siglât, miercus ai 24 di Jugn 2015, cul at significatîf de consegne al Comun sul Lusinç di une dediche artistiche, in ideâl par cont de int udinese, ae comunitât gurizane, opare dal pitôr furlan prof. Michele Ugo Galliussi, cun parsore il sproc zimulatori “In Aquileia fratres”, fradis parmieç de Mari Aquilee che in Gurize e Udin e à vût distints e privilegjâts erêts de sô tradizion di capitâl di chê prime Mittel-Europe culturâl unide che, jenfri Danau e Adriatic, Lât Maiôr e Balaton, al è stât sigûr il Patriarcjât di Aquilee. “Il riclam ae liende de ereditât di Aquilee, metropul plurietniche e internazionâl, nus à juste parût il plui ‘super partes’, il plui inlaçant e integrant in armonie lis diviersis identitâts e sensibilitâts che a distinguin il trat di chês dôs comunitâts alì” al à spiegât la guide dal moviment civic culturâl euroregjonalistic instradât scuasit 30 agns indaûr a Udin cun chê di judâ a rignuvî “dal bas” e in clâf secolâr lis leandis storichis fra lis comunitâts dal antîc Patriarcjât mittel-european nassût te regjon. Ricevude te Sale Blancje dal municipi di Gurize dal assessôr Stefano Ceretta, in rapresentance dal sindic Romoli, compagnât de dot.e Elettra Virgili, consulente linguistiche comunâl, la delegazion dal Fogolâr Civic, formade dal dean prof. Travain e dai conseîrs sociâi Sergio Bertini, Marisa Celotti, Jole Deana e Gianfranco Savorgnan, si à incuintrât in plen cu chê Aministrazion sul pont des sperancis par une armonie des identitâts storichis dal teritori, cul fin di rivâ a vê comunitât variadis e purpûr unidis e cusidis cuntun sens intune reet teritoriâl compartide. Di chê strade si à ancje profitât par ricuardâ l’inovâl dai 805 agns de fondazion citadine de capitâl dal Lusinç (24 di Jugn 1210) vâl a dî la nassion de comunitât urbane, il “complean de citât”, liberâl promozion dal Fogolâr Civic fintremai dal 2005, memoriâl de volte che i àn concedûts al borc dal puest privileçs civîi e economics, partencis dal so svilup civic autonim seguitîf. Ancje a Udin, dal 2001, il Fogolâr Civic al fâs fieste pal complean citadin, riferît ae costituzion, ai 13 di Setembar 1223, di dirits similârs pal borc dapît dal Cjistiel. Une nassion parele par dôs citât tant timp separadis de Storie e distès par tancj viaçs compagnadis… L’assessôr Ceretta, cul piturâ il cuadri sociâl variât e sclapât di Gurize di vuê, al à preseât e pandût mil graciis pai intindiments e pe vore dal Fogolâr Civic e po sigûr pe preziose dediche artistiche udinese ai Gurizans che e sarà dal moment esponude in municipi par testemoneance di fradaie civiche tra lis dôs capitâls di provincie.