MIERCUS AI 26 DI FEVRÂR 2014

Une acuile furlane di cjarte pestade, che e rît parsot, cuntun biliet di bancje tal bec, par motivâ che la coruzion e je ancje ben in Friûl e che no si sopuartile, al è stât un sogjet di chei cjapâts di smire dai students che a àn volût rapresentâ in place a Cividât lis necuiziis piês dal vivi di vuê, tal intent, ideâl almancul, di sdrumâlis. Sucès fûr dal ordenari, duncje, pe prime edizion cividine dal Carnevâl Civic Studentesc promovût dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl direzûts dal prof. Alberto Travain, manifestazion scolastiche che ogni an, rimodernant tradizions antighis de bande alpine-adriatiche o mittel-europeane – furlanis, venitis, carintianis, slovenis -, e inzorne il ricuart di chel ribalton regjonâl che e je stade la “Joibe Grasse” o “Crudel Zobia Grassa” cussì clamade dal lontan 1511, prime grande rivolte di popul de storie de Europe moderne, un tant midiant dal sdrumâ alegoriis fatis dai scuelârs in forme di toratis e intituladis ai mâi che a lambichin la societât dal dì di vuê. Ai 26 di Fevrâr 2014, a Cividât, in Place Delaide, i arlêfs de scuele mezane locâl “Elvira e Amalia Piccoli” a àn metût in rie une sglavinade di cjistieluts di cjarton colorâts e intestâts a vuere, coruzion, invidie, indiference, egoisim, razisim, violence, incuinament, bulisim e vie indevant, butâts jù dibot dal assessôr dal Comun sui servizis scolastics gjeom. Flavio Pesante, de preside, dot.e Anna Maria Buttazzoni, dal dean dal Club UNESCO di Udin, prof.e Renata Capria D’Aronco e dal coordenadôr des fradaiis promotoris, prof. Alberto Travain, a colps di mace o ben di spadon, imprescj rituâi fats e consegnâts a chescj de mularie in sens di autoritât sovrane che e aurìs dal popul. Il ricuart dal riviel popolâr furlan de “Joibe Grasse” – scjaps di scuelârs a àn parfin traviersât il centri de vile cun intor i garofui carateristics e sberlant il sproc de fazion popolane antighe ribele “Savorgnan! Savorgnan!” – si à volût compagnâlu cuntun pinsîr particolâr par ducj chei che te storie di Cividât, citât mari dal Friûl, jù pai secui si son rivoltâts e batûts cuintri des injustiziis: une letare pal sindic Balloch, che la iniziative le à preseade un grum pûr no podint sei, i fruts je àn consegnade a la sorestanzie comunâl par memorie de disfortunade e dismenteade “Conzure di Bertul” stade li tal 1404. In finâl, dopo di vêi imponût al assessôr Pesante chel cjapielat contadin simbolic che dal 2001 – co pe prime volte lu à metût tal cjâf il sindic di Udin dai timps che al jere il prof. Sergio Cecotti – al rapresente un cimeli storic de particolâr manifestazion, i scuelârs si son ducj dâts dongje in fieste ator de grande bandiere dal Fogolâr Civic che e unìs i colôrs zâl e turchin di Aquilee e de Europe cul blanc de antighe citadinance universâl romane, sperance di fraternitât e union des diferencis su la crosere dal Continent Vieri tra ricuarts di une volte e siums pal doman. L’assessôr al à prometût di fâ conservâ in municipi il baston e il spadon di len imbastîts pe ocasion de mularie, tant che testemoneance di une citât che si vise dai siei valôrs plui inlidrisâts e gloriôs e che ju rimoderne in zornade presint. In place al jere il banderâr di sezion dal 1n Cuintîr dal Fogolâr Civic (Friûl Orientâl), gjeom. Sergio Bertini.