MIERCUS AI 27 DI AVOST 2014

“Reverendissim, cun cheste si visiLu che vuê la assemblee di popul dal Moviment Civic Culturâl Alpin-Adriatic dal Fogolâr Civic, dade dongje in Place dai Grans a Udin alì che par vieri al jere l’ospedâl storic sociâl di Sante Marie de Misericordie, simbul e braure des tradizions di associazion de int de Capitâl furlane, e à vût destinât cun unanimitât di nomenâlu “Capelan” dal Moviment istès, intindint, te part di fradaie secolâr, la Sô funzion liberâl di servizi rituâl daûr principi de Glesie Catoliche tant che costum complen di valôrs che a marchin dabon lis tradizions di civiltât europeanis dal puest, cuntune vierzidure al mont dal sigûr largje e positive. Te convinzion di podê lâ dilunc a fâ stât de Sô colaborazion profonde sul front morâl e culturâl cu chê di tornâ a implantâ in sens plurâl lis nestris comunitâts, cence fal si mandin, culì, i salûts plui dilets e cordiâi”. Il predi furlan pre Tarcisio Bordignon, plevan preseât de parochie di Sant Piu X a Udin, impegnât, che ben si sa, di agnorum a inviulâ vierziduris ai domandaments de Umanitât mondiâl ma ancje a chei des lidrîs e des problematichis dal teritori, duncje, al à ricevût dal prof. Alberto Travain, dean dal Fogolâr Civic, la nomine, fate de assemblee sociâl ai 27 di Avost 2014, par “capelan” di chê organizazion culturâl di popul cun passe vincj agns su la grope, tal troi di tradizions antighis des associazions in Europe, dai timps des fradaiis religjosis e des corporazions secolârs de Ete di Mieç, di no dismenteâ, par un esempli, lis “nationes” vâl a dî i fogolârs nazionâi e locâi dai students des primis Universitâts dal Continent. Significative la interpretazion dade de funzion vuê di un “capelan” intune socie laiche: “costruts e mots de tradizion cristiane catoliche a son patrimoni antropologjic dal teritori, viert par sei compartît in vie interculturâl di ducj chei che si instalin, cence abadâ a riunde e crodincis” al à declarât il prof. Travain marcant che bisugne fâ in mût che il valôr sociâl di cierts simbui, inlidrisâts te Storie une vore, al puedi condurâ ancje in situazions misclicis o butadis secolârs ben e no mâl.