MIERCUS AI 30 DI LUI 2014

Il Moviment Civic Culturâl Alpin-Adriatico dal Fogolâr Civic e il Circul Universitari Furlan de Academie dal Friûl sot dal dean prof. Alberto Travain, a àn screât a Udin miercus ai 30 di Lui 2014 il lôr preziôs gnûf standart di taule, che al sarà fûr di cumò in ducj i incuintris sociâi des fradaiis, regâl de famose ricamadore furlane Antonietta Monzo Menossi cun figurade une antighe acuile aquileiese, gjavade fûr di un disen dal Sietcent dal cjaluni locâl Gian Domenico Bertoli che al veve copiât “l’Arme del patriarcato e della Città d’Aquileja” visibil une volte suntune piere pôc lontan de Basiliche patriarcjâl tant innomenade. “Il trat antîc ultin o prin medievâl di chel storic embleme lu rindin râr e atratîf riclam juste a lis origjinis de liende de prime metropul spirituâl de Mittel-Europe” al à marcât il prof. Travain, pandint dut l’agrât par chê donazion. “Ve un riclam a la lidrîs ideâl di un moviment che al sperarès di rionzi, di rimodernâ, in clâf secolâr, leams e principis che su chei si à fat sù une comune mentalitât parsore dai confins”.